Read lubukusu Bakh. 13 Bible Online

Bakh. 13 - lubukusu bible

Bakh. 13

¹Baisiraeli lundi bakholela Wele Omunyali Owa Bioosi kamamayaanu. Nio Wele Omunyali Owa Bioosi abalekhuulila Bafilisiti babamiia khulwe kimiiko kamakhumi kane.

²Mu siise esio omundu abao lisina liewe bali Manoa, khukhwama mu lukoba lwa Sora. Aaba owe ekholo eya Dani. Omukhasi wewe aaba omukuumba.

³Malaika owa Wele Omunyali Owa Bioosi abonekhela omukhasi wewe mala amuboolela ali, “Ewe oli omukuumba, ne olaesia mala osaale omwana omusoleeli.

⁴Nono okhanywa endali namwe kamalwa namwe okhalia siakhulia sie kumusilo tawe.

⁵ Ne enyuma omusoleeli wowo ne asaaliilwe, se olimubekakho lichuune tawe, sikila khukhwama khu ndaalo eye lisaalwa liewe aliaanwa khu Wele nga Omunadhiri.[21] Alirakikha kimilimo kie khuonia Baisiraeli khukhwama khu Bafilisiti.”

⁶Nio omukhasi owa Manoa acha mala aboolela omuseecha wewe ali, “Omundu owa Wele ambonekheele. Abeele owe khurisia busa nga malaika owa Wele. Se mureebire niio amile tawe, lundi se amboleele lisina liewe tawe.

⁷Ne kakhali amboleele ali, ndaesia mala saale omwana omusoleeli. Amboleele ali khanywakho endali namwe kamalwa, namwe nalia siosi siosi sisiakanisibwa tawe, sikila omwana yuno akhabe Omunadhiri khu Wele mu bulamu bwewe bwoosi.”

⁸Nio Manoa asaba Wele Omunyali Owa Bioosi ali, “Wele Omunyali Owa Bioosi nosiima lekha omundu owa Wele niye ewe warumire, akobole lundi khwifwe mala akhwekesie efwe nisio khukhoyeele khukhola khu mwana olisaalwa.”

⁹Wele akhola nga Manoa ne asaba, mala malaika owa Wele akobola lundi khu mukhasi owa Manoa nga aba ne ekhaale mu mukuunda. Omuseecha wewe se aba ne naye tawe.

¹⁰Nio omukhasi atima acha amuboolela ali, “Lola! Omundu wechile endaalo eyo ambonekheele lundi.”

¹¹Manoa enyokha aloonda khu mukhasi wewe. Aacha khu mundu oyo mala amureeba ali, “Ewe niye omundu olomalomenge no mukhasi wase?” Akobosia ali, “Yee.”

¹²Nio, Manoa areeba ali, “Kamakhuwa kowo nga kakheche khukhwikholekha, siina nisio omwana oyo enyekhana akhole? Limenya siina nilio akhoyeela amenye?”

¹³Malaika amukobosia ali, “Omukhasi wowo akhoya akhola buli siindu nisio muboolele.

¹⁴Se akhoyeela alia siakhulia siosi siosi siing'oonwa khukhwama khu musabibu tawe, se akhoyeele anywe endali yosi yosi namwe kamalwa, namwe alie siakhulia siosi siosi sisiakaanisibwa tawe. Akhoya akhole buli siindu nisio namulaka.”

¹⁵Manoa aaboolela malaika owa Wele Omunyali Owa Bioosi ali, “Khukhusaaya nosiima yikhalakho akeekhe mala khukhwirire emeeme khu khung'oonele siakhulia.”

¹⁶Ne malaika owa Wele Omunyali Owa Bioosi akobosia Manoa ali, “Akhaba ne unjingisia, se ndalia khu siakhulia siowo tawe. Ne kakhali ne okhola siianwa sie khukhwosia siaane khu Wele Omunyali Owa Bioosi.” (Manoa aloma ario sikila se amanya ali oyo aba malaika owa Wele Omunyali Owa Bioosi tawe.)

¹⁷Manoa areeba malaika owa Wele Omunyali Owa Bioosi ali, “Khuboolele lisina liowo nio khukhue lukoosi kamakhuwa kowo ne kaliba ng'ali.”

¹⁸ Malaika areeba Manoa ali, “Siina sikila ne wenya khumanya lisina liase? Lili lisina lie kamakana.”[22]

¹⁹Nio Manoa abukula emeeme ne siakhulia mala abianila khu alutare eye lulwanda khu Wele Omunyali Owa Bioosi okholanga ke kamakana.[23]

²⁰Nga kumulilo ne kwaba ne kulikho kutirira khukhwama khu alutare, Manoa no mukhasi wewe babona malaika owa Wele Omunyali Owa Bioosi ne alikho aniinila mu lumemu lwe kumulilo ne acha mwikulu. Manoa ne omukhasi wewe bekhupa asi.

²¹Nio Manoa bamanya bali omundu oyo aaba malaika owa Wele Omunyali Owa Bioosi, se babonakho malaika owa Wele Omunyali Owa Bioosi oyo lundi tawe.

²²Manoa aboolela omukhasi wewe ali, “Efwe ng'ali khulafwa sikila khwaboone Wele!”

²³Ne kakhali omukhasi wewe amukobosia ali, “Abaanga Wele Omunyali Owa Bioosi enyile khukhwiira efwe andi se afukiilile biianwa biefwe tawe. Andi se akhwekeesie efwe kano koosi namwe akhubooleela bibiindu nga ebio birio tawe.”

²⁴Mukha Manoa asaala omwana owe sisoleeli mala amutiuukha lisina ali, Samusoni. Omwana oyo achoa mala Wele Omunyali Owa Bioosi amubiita chikhabi.

²⁵Ne Roho owa Wele Omunyali Owa Bioosi arakikha khumuramo kamaani nga aaba ne ali Mahane-tani akari wa Sora ne Esitaoli mu Dani.