Read lubukusu Bakh. 14 Bible Online

Bakh. 14 - lubukusu bible

Bakh. 14

¹Endaalo ndala Samusoni ekha acha e Timuna abonayo omukhaana Omufilisiti.

²Akobola engo mala aboolela paapa ne maawe ali, “Aliio omukhaana Omufilisiti emwalo e Timuna ousiimisie lukali. Cha munderere, nenya abe omukhasi wase.”

³Paapa ne maawe bamureeba bali, “Siina sikila nocha mu Bafilisiti basiinde bano oenjemo omukhasi? Se onyala wanyoola omukhaana mu kholo yefwe tawe?” Ne Samusoni aboolela raraawe ali, “Yuno niye kumwoyo kwase kwenya.”

⁴Paapa ne maawe se bamanya bali Wele Omunyali Owa Bioosi niye owenya kano kakholekhe tawe. Wele Omunyali Owa Bioosi ayiimanga bubweyaangu bwe khukhwibwaakala Bafilisiti. (Mu siise sino Bafilisiti baba bamiia Baisiraeli.)

⁵Nio Samusoni ekha acha e Timuna ne paapa ne maawe. Nga ne baba ne balikho babira mu mikuunda kie kimisabibu aulila etalang'i ne eulukhuma ne yiicha niio Samusoni aaba.

⁶Abwene ne abwene Roho owa Wele Omunyali Owa Bioosi echa khu Samusoni aaba ne kamaani mala atabulaka etalang'i mu bitonyi ne kamakhono busa nga otabulaka emeeme. Ne se aabakho ne sisiindu mukhono tawe. Mala se aboolela basaasi bewe nisio aba ne akholile tawe.

⁷Nio acha mala akachula nomukhaana mala omukhaana amusiimisia.

⁸Enyuma we chindaalo ngekhe, Samusoni akobolayo khucha khubukula omukhaana oyo abe omukhasi wewe. Oli bali khu lukeendo aukha arura khu ngila acha khulola etalang'i niyo eera, mala auka khubona sisusuuchu sie enjukhi yengisiemo ne bubuukhi buli mu talang'i eyafwa chana.

⁹Ataula bubuukhi mu makhono akeenda ne alia. Nio acha niio paapa ne maawe baba mala abaelesia bubuukhi bubuundi. Babulia, ne Samusoni se ababoolela nio abwamiisie tawe.

¹⁰Paapa owa Samusoni acha munju eyo mukhaana Omufilisiti oyo, mala Samusoni akholela babaandu naikara emboofu lukali khuloondekhana ne kumwiima kwe baele.

¹¹Nga Bafilisiti ne bamubona baruma basoleeli baele kamakhumi kataru bekhale ne naye.

¹²Mala Samusoni ababoolela ali, “Khayo mupile kumunayi. Ne mwaba ne munyala mwamboolela nisio kuboola khulwe chindaalo saba cha naikara yino, aba ese ndamua enywe chingubo cha katani kamakhumi kataru ne chingubo cha naikara kamakhumi kataru.

¹³Ne mwaba ne mukhanyala khukhumboolela nisio kuboola tawe, aba enywe mulamba ese chingubo cha katani kamakhumi kataru ne chingubo cha naikara kamakhumi kataru.” Mala bamukobosia bali, “Khuupile efwe kumunayi kwowo khukuulile.”

¹⁴Samusoni aloma ali, “Khukhwama mu esio siilia, siamamo sie khulia. Khukhwama mu esio sie kamaani, siamamo sinulu.” Enyuma we chindaalo chitaru baele abo se baba babuulile kumunayi okwo tawe.

¹⁵Khu ndaalo ekhola khane[24] baboolela mukha Samusoni bali, “Ombelesia omuseecha wowo akhubuulile nisio kumunayi kuboola. Kaaba bali se okhola orio tawe khulakhwosia[25] ewe nende be enju eya raraao boosi. Enywe babili mukhulangile nio mukhunuule?”

¹⁶Nio mukha Samusoni acha khu Samusoni ne alikho alila mala aloma ali, “Ewe se wayisiima tawe! Wayimbiila! Ewe wapiile babaandu base kumunayi, ne se umboolela nisio kuboola ta!” Samusoni amukobosia ali, “Lola, se naboolelakho akhaba paapa ne maayi tawe, siina sikila ekhuboolele ewe?”

¹⁷Mukha Samusoni alila ario khu ndaalo saba cha naikara choosi. Ne khu ndaalo eya saba Samusoni amuboolela nisio kumunayi kuboola, sikila omukhasi amuyingiilila lukali. Nono mukha Samusoni abuulila Bafilisiti kumunayi.

¹⁸Nio oli khu ndaalo ekhola saba Samusoni ne akhacha munju eye khukona[26], Bafilisiti baba ne likobosia. Nio becha khu Samusoni bamuboolela bali, “Siina sinulu khukhila bubuukhi? Siina sie kamaani khukhila etalang'i?” Nio Samusoni ababoolela ali, “Mubaanga se mulimiile emasoti yase endoro tawe andi se mubuulile kumunayi kwase tawe.”

¹⁹Abwene ne abwene Roho owa Wele Omunyali Owa Bioosi amwingilamo amua kamaani mala Samusoni ekha e Ashikeloni, erayo babaandu kamakhumi kataru, abafuula chingubo mala aelesia babaandu bababuula kumunayi chingubo cha katani chana. Enyuma wako akobola engo ne akhalaale lukali khu ka kekholekha.

²⁰Nio omukhasi owa Samusoni aebwa omundu owaba omukeesia wewe khu ndaalo eye siselelo.