Read lubukusu Bakh. 15 Bible Online

Bakh. 15 - lubukusu bible

Bakh. 15

¹Enyuma we siise Samusoni akeniia omukhasi wewe mu siise sie khukesa engaanu aamuyilila emeeme. Aaboolela paapa owo mukhasi wewe ali, “Nenya khubona omukhasi wase mu lusiro lwewe.” Ne paapa owo omukhasi wewe se aamufukiilila engilemo tawe.

²Aboolela Samusoni ali, “Ng'ali nebaasia ndi wamubiila, nio namuelesia omukeesia wowo. Ne kakhaba kario wandaaye wewe omukeekhe ali ne lukoondo lulayi khukhilakho omukhulu. Onyala wamubukula mu bweyaangu bwo oyo?”

³Samusoni aloma ali, “Siise sino se ndabiiywakho khu nisio ndakhola Bafilisiti tawe!”

⁴Nio Samusoni acha mala aamba chinjusi chimia chitaru. Aamba chibili chibili achiboa kimikhiinga kiacho alala mala aboelela enjaso khu lifundikho lie kimikhiinga ekio.

⁵Aambia chinjaso mala alekhuula chinjusi echo chengila mu sambu che Bafilisiti che engaanu. Mu ngila yino osia engaanu niyo baaba ne bakesile, akhaba ne neeyo eyaba ne siili mu mikuunda kie kimiseituni kiosi.

⁶Nga Bafilisiti bareeba owaba ne akholile kano, baboolelwa bali aaba Samusoni sikila paapa owo omukhasi wewe, omundu owa Timuna aba aelesie omukeesia owa Samusoni omukhasi owa Samusoni. Nio Bafilisiti bacha bosia omukhasi[27] oyo lundi bosia ne nju eya raraawe.

⁷Samusoni aboolela Bafilisiti ali, “Sikila mwakholile murio, nja khumuruungia.”

⁸Abebwaakala mala eera bakali, mala acha amenya mu lubangaachi lwe libina e Edamu.

⁹Bafilisiti becha baapa ekambi mu Yuda mala bebwaakala lukoba lwa Lehi.

¹⁰Babaandu ba Yuda babareeba bali, “Siina sikila ne mukhuseera?” Bafilisiti babakobosia bali, “Khwichile khuamba Samusoni mala khumukholele nga niye yesi ne aakhukholele efwe.”

¹¹Nio babaandu ba Yuda chielefu chitaru bacha sie bina mu lubangaachi e Etamu mala baboolela Samusoni bali, “Ewe se omanyile oli Bafilisiti nibo bakhwamiia efwe tawe? Nono okhukholeele efwe siina sino?” Samusoni abakobosia ali, “Mbakholeele niko baakholela.”

¹²Baboolela Samusoni bali, “Efwe khwechile khukhuboe nio khuche khukhwakaanisie khu Bafilisiti.” Samusoni aboola ali, “Suubisie muli enywe mwabeene se mulanjira tawe.”

¹³Baloma bali, “Tawe, efwe khulakhuboa busa mala khukhwakaanisie khu Bafilisiti. Se khukhwira tawe.” Nio bamuboa ne kimikoye kibili mala bamurusia mu libina.

¹⁴Nga ne oola e Lehi, Bafilisiti becha chimbilo niio ali, bamuyokelela. Abwene ne abwene Roho owa Wele Omunyali Owa Bioosi amwichakho ne kamaani, mala Samusoni akitula kimikoye kikiaba khu makhono kewe, nga luusi luaambile kumulilo.

¹⁵Samusoni ayuula sikuumba sie lunyaanyilo lwe punda eyaba ne efwiile busa embi ari. Ne sikuumba esio eera babaandu eelefu ndala.

¹⁶Nio Samusoni emba ali, “Ne sikuumba sie lunyaanyilo lwe punda, nabuusia bipupu ne bipupu[28], ne sikuumba sie lusaya lwe punda neera babaandu eelefu.”

¹⁷Nga amala khuloma ario amwaata eyo sikuumba sie lunyaanyilo lwe epunda olwo. Abuundu niio kano kekholekhela alaangwa bali Ramati-lehi[29].

¹⁸Nio Samusoni aulila bulesia bukali, asaba Wele Omunyali Owa Bioosi mala aloma ali, “Ewe niwe oumbeele ese, omukholi wowo bukhili bukali buno. Nono fwe sikila bulesia? Ndiilwe ne Bafilisiti basiinde bano?”

¹⁹Wele ara abuundu enuma e Lehi eyo, mala kameechi katubukha. Samusoni anywa mala eulila bulayi. Nio esebele eyo akilaanga lisina ali, Eni-hakore[30]. Esebele eyo esiili Lehi khukhwola endaalo yino.

²⁰Samusoni emeelela Baisiraeli khulwe kimiiko kamakhumi kabili mu ndaalo che Bafilisiti.