Read lubukusu Bakh. 16 Bible Online

Bakh. 16 - lubukusu bible

Bakh. 16

¹Endaalo ndala Samusoni acha mu lukoba lwa Kasa mala anyoolayo omukhasi omueeyani mala akona naye.

²Babaandu ba Kasa baboolelwa bali Samusoni ali mu lukoba lwabwe. Nio babotookhelela abuundu ao mala bamwekhinila a silibwa sie lukoba siilo siosi. Basila chi ne bamonyana busa bali, “Khulinde khukhwola nga bulasia makhelebeende mala khumwire.”

³Ne kakhali Samusoni akona khu sitaanda khukhwola mu silo akari, mala enyokha aamba kumuliango kwe silibwa sie lukoba ne kamatooche mala abisuta mungaaki abira khu mabeka kewe. Abisuta abioosia khu ngaaki khwe lukulu lulwaloleelela lukoba lwa Heburoni.

⁴Enyuma wa kano Samusoni asiima omukhasi lisina bali Delila, owamenyanga mu litooma lia Soreki.

⁵Babaami be Bafilisiti bacha khu Delila mala bamuboolela bali, “Reka Samusoni mala omanye sikila ne ali ne kamaani kamakali ne engila niyo khunyala khwamukhayilamo kamaani mala khwamuboa, khwamukhila. Ne buli mulala khwifwe alakhua bitonyi bie fwesa chimia ekhumi na ndala.”

⁶Nio Delila aboolela Samusoni ali, “Nosiima mbolele siikhukholanga ne oba ne kamaani kamakali po orio. Omundu ne enya khukhuboa mala akhuminye kamaani, anyala akhola ariena?”

⁷Samusoni amukobosia ali, “Baaba ne bamboela chisia che buyiingo chimbia saba chikhali chinyomu tawe, ndaba omutekhele nga omundu yesi yesi okundi.”

⁸Nio babaami Bafilisiti barerera Delila chisia che buyiingo chimbia saba chikhali chinyomu tawe, mala aboela Samusoni.

⁹Delila aaba ne babaandu baliindile mu lusiro lwe mukari. Aboolela Samusoni ali, “Samusoni! Bafilisiti balikho beecha!” Ne Samusoni akitulaka chisia che luyiingo nga luusi ne lukitukhanga ne luaambile kumulilo. Nio bung'ali bwe kamaani kewe khumanyikhana tawe.

¹⁰Delila aboolela Samusoni ali, “Lola ewe olakholanga ese omusilu, mala se olamboolelanga bung'ali tawe. Nosiima mboolele nga omundu anyala akhuboa ewe.”

¹¹Samusoni aloma ali, “Kaaba bali bamboa kimikoye kimiya nikio bakhaboelakho sisiindu tawe, nyala naba omutekhele nga omundu okundi yesi yesi.”

¹²Nio Delila abukula kimikoye kimiya amuboa mala aloma ali, “Samusoni! Bafilisiti balikho beecha!” Babaandu baba baliindiilile mu lusiro lwe mukari. Nio akitula kimikoye kiarura khu makhono kewe nga luusi.

¹³Delila aboolela Samusoni ali, “Ewe osiikhola busa ese omusilu mala se olikho umboolela bung'ali tawe. Mboolele nga omundu ne anyala akhuboa.” Samusoni aloma ali, “Waaba ne osuuka bituuta saba bie lichuune liase mala obiboe alala mala oliboe khu sichaangi ndaba omutekhele busa nga omundu yesi yesi okundi.”

¹⁴Nga Samusoni aaba ne akona Delila abukula bituuta saba bie lichuune liewe, abiruka biaba kumukoye abiboa khu sichaangi, mala aloma ali, “Samusoni! Bafilisiti balikho beecha!” Enyokha akhweesa akhuula sichaangi, kumukoye kwe lichuune kwachunukha.

¹⁵Nio Delila aloma ali, “Onyala waloma oriena oli wasiima, mala kumwoyo kwowo se kuli khwise tawe? Ewe wakholile ese omusilu khukhwola khataru mala se wambooleele siikhukholaanga noba ne kamaani tawe.”

¹⁶Delila nga achiililila khumureeberesia buli ndaalo, Samusoni aluilila.

¹⁷Mala ekhumaliilikha Samusoni aboolela Delila bung'ali ali, “Lichuune liase likhaabekwakho ne lubeko tawe. Ese naanwa khu Wele Omunyali Owa Bioosi nga omunadhiri[31] khukhwama khu siise nisio nasaalilwamo. Kaaba bali lichuune liase libekwakho, se ndaba ne kamaani tawe, mala ndaba busa omutekhele nga omundu okundi yesi yesi.”

¹⁸Nga Delila ne amanya ali amuboleele bung'ali arumania likhuwa khu baami Bafilisiti ne aloma ali, “Kobola lundi lulala luno. Amboleele bung'ali.” Nio beecha, mala bareera ne chirupia.

¹⁹Delila aoleelesia Samusoni khu bikele biewe akona liilo. Nio Delila alanga omundu mala aabeka[32] Samusoni bituuta saba bie lichuune liewe. Delila arakikha khumunaania sikila aba kamaani kamuwele.

²⁰Nono Delila ayokela ali, “Samusoni! Bafilisiti balikho beecha!” Samusoni enyokha khukhwama mwiilo ebaasia ali, “Ndenyokha mala ndekukhe mu bulekhuule nga kholanga busiele.” Se amanya ali Wele Omunyali Owa Bioosi amulekhile tawe.

²¹Bafilisiti bamuaamba mala bamufutula chimoni. Bamuyila e Kasa bamuboa khu minyololo kie kumukasa mala bamura khu milimo kie khusia nali mu siboe.

²²Ne kakhali lichuune liewe liarakikha khumela lundi.

²³Babaami be Bafilisiti bebuusia alala khukhwekhoya ne khukhola kumulukha khu wele wabwe Dakoni. Bemba bali, “Wele wefwe akhukholile khwatiila omusiku wefwe Samusoni!”

²⁴Nga babaandu ne babona Samusoni, bemba khufumia wele wabwe bali, “Wele akhueele bukhili khu musiku wefwe, omusiku owonaka sibala siefwe, ne khukhwira babaandu befwe bakali.”

²⁵Nga babaandu baba ne bekhoya baloma bali, laanga Samusoni eeche akhusangaasie.[33] Bareera Samusoni khukhwama mu siboe bamukhola abasangaasia.[34] Bamukhola abe akari we chinjeko.

²⁶Samusoni aboolela omusoleeli owaba ne amuraangirire khulwe khumutiila kumukhono ali, “Lekha niaambe khu njeko chichatiila enju. Nenya netiilekho.”

²⁷Enju yaba yechuule babaandu baseecha ne bakhasi. Babaami boosi be Bafilisiti babamo. Baseecha chielefu chitaru ne bakhasi baba khu ngaaki khwe enju baloleleele Samusoni nga aba ne asangaasia baandu.

²⁸Nio Samusoni aasaba Wele Omunyali Owa Bioosi ali, “Ee, Omwami WELE, nosiima khebulile, nosiima mbe kamaani luno lwong'ene lundi, nio nyale khuruungia Bafilisiti bano khulwe khufutula chimoni chase chombi.”

²⁹Samusoni eamba khu njeko chibili che akari chichatiila enju. Eamba kumukhono mulala buli khu njeko.

³⁰Nio Samusoni aloma ali, “Lekha ese efwe ne Bafilisiti!” Nio asindikha ne kamaani kewe koosi mala enju yakwa khu baami be Bafilisiti nende buli mundu. Samusoni eera babaandu bakali mu lifwa liewe khukhila nibo eera ne asiili omulamu.

³¹Nio bawandaaye nende be enju eya Samusoni bekha becha bamubukula mala bamusiikha akari wa Sora ne Esitaoli mu siliindwa sia Manoa, raraawe. Samusoni aba omwimeelesi owe Baisiraeli khulwe kimiiko kamakhumi kabili.