Read lubukusu Bakh. 17 Bible Online

Bakh. 17 - lubukusu bible

Bakh. 17

¹Abao omundu lisina liewe bali Mika. Amenyanga mu sibala sie lukulu lwa Efuraimu.

²Aboolela maawe ali, “Ese ndi nende elefu ne emia ndala che fwesa eyeebwa. Nauliile ne olaama omwifwi. Ese niye owabukula.” Maayi wewe aloma ali, “Mwana wase, Wele Omunyali Owa Bioosi akhoya akhubiite chikhabi.”

³Nio akoboselia maawe chirupia echo. Maawe aloma ali, “Khukhwimia silaamo mwana wase, siikhakhubakho tawe, ese samwene naanile efwesa yino khu Wele Omunyali Owa Bioosi. Chilarumikhirwa khubeecha sifwaani sie khukhwisaaya mala sifunikhwe ne efwesa. Nio luno ndakhukoboselia ewe bitonyi bie fwesa.”

⁴Nga akoboselia maawe, maawe abukula bitonyi chimia chibili bie efwesa abielesia omubasi owang'oona sifwaani sie khusaaya, mala siareebwa munju mwa Mika.

⁵Ne Mika aba ne abuundu wewe e khukhwisaaya wele. Akhola bifwaanane ne Efodi[35]

⁶ Se abao omwami mu Isiraeli mu ndaalo echo tawe; buli omundu akholanga siosi siosi nisio enya.

⁷Siise esio aabao omusoleeli Omulawi owamenyanga mu lukoba lwa Betelehemu mu Yuda.

⁸Aarekukha aarura e Betelehemu acha ayiima abuundu aandi amenyeyo. Nga aba ne ali khu lukeendo, ola khunju eya Mika mu sibala sie lukulu sia Efuraimu.

⁹Mika amureeba ali, “Waama waena?” Amukobosia ali, “Ese ndi omulawi khukhwama e Betelehemu lwe Buyuda. Ndikho mbiima abuundu e khumenya.”

¹⁰Mika amuboolela ali, “Menya ne nase. Ba omukambisi wase lundi omusaayi wase, mala ndakhua bitonyi bie efwesa buli kumwiiko, chingubo ne siakhulia siowo.” Nio omulawi acha.

¹¹Omulawi omuele oyo afukiilila khumenya ne Mika mala aba nga omwana wewe

¹²Mika amurobora abe omusaayi wewe, mala amenya mungo mwa Mika.

¹³Mika aloma ali, “Luno namanyile ndi Wele Omunyali Owa Bioosi acha khukhola bibiindu bibe bilayi khwise sikila ndi no omusaayi ooli omulawi.”