Read lubukusu Bakh. 18 Bible Online

Bakh. 18 - lubukusu bible

Bakh. 18

¹Mu ndaalo echo se abao omwami mu sibala sie Baisiraeli tawe. Mala mu ndaalo ng'ene echo ekholo eya Dani yayimaanga kamaloba emenyemo sikila se baba banyoola kamaloba kabwe kosi kosi mu kholo cha Isiraeli tawe.

²Nio babaandu ba Dani barobora babaandu baraano be kamaani khukhwama mu kholo chabwe choosi mala babaruma mu ngoba cha Sora ne Esitaoli balambuule sibala mala basiyoote. Bababoolela bali, “Cha mulambuule sibala.” Nga bola mu sibala sie bikulu sia Efuraimu, bakona munju eya Mika.

³Nga ne baba mwa Mika, bamanya lilomaloma lio omulawi omuele oyo. Bamureeba bali, “Naanu owakhureera ano? Ewe olikho okhola siina ano? Kimilimo kiowo kili siina?”

⁴Ababoolela ali, “Khwauliilisiana ne Mika, anduunge khu mukholela nga omusaayi wewe.”

⁵Baboolela Omusaayi oyo bali, “Nosiima reeba Wele khwaba ne khulikho khucha khunyoola bulayi khu lukeendo lwefwe.”

⁶Omusaayi ababoolela ali, “Cha mu muleembe. Wele Omunyali Owa Bioosi ekhoyeele lukeendo luno.”

⁷Nio babaandu baraano abo barekukha bacha boola khu lukoba lwa Laishi. Babona babaandu be mu bwene omwo. Baba ne bamenya mu buliindi bulayi nga Basidoni. Babona bali babaandu ba Laishi baba be kumuleembe, babasila busa; se benana bali banyala bebwaakalwa tawe. Baba ne bibiindu bioosi nibio benya. Bamenyanga aleeyi khukhwama khu Basidoni ne se baba ne sisiindu siosi siosi nisio bakholanga ne babaandu babaandi bosi bosi tawe.

⁸Nga babaandu baraano abo bakobola e Sora ne Esitaoli, balebe babwe babareeba bali, “Muboone muriena sibala esio?”

⁹Bakobosia bali, “Khwaboone sibala esio, mala sili silayi lukali. Khuche khusibwaakale. Mukhela busa ano ne mukhali nende nisio mukhola tawe! Khola khangu, khuche mala khutiile kamaloba!

¹⁰Nga ne mucha, mulanyoola babaandu bakhebasiangakho bali banyala bebwaakalwa tawe. Kamaloba kali kamakali kaali nende buli sisiindu. Wele akhueele efwe kamaloba kano.”

¹¹Nio babaandu chimia sita khukhwama mu kholo eya Dani barura e Sora ne Esitaoli ne bakangile bulwaani bwe liie.

¹²Bacha baapa ekambi mu lukoba lwa Kiriati-Yearimu mu Yuda. Sisiene esio nisio sisiakila abuundu ao ne asilaangwa ali e Mahane-tani. Lukoba luno luli lubeka lwe Mumbo mwa Kiriati-Yearimu.

¹³Bachiililila khukhwama abwenao mala bola khu nju eya Mika mu sibala sie bikulu sia Efuraimu.

¹⁴Nio babaandu baraano abo ba baaba ne bacha khupelelesia sibala sisiaba siimbi Laishi, baboolela balebe babwe bali, “Mumanyile muli ndala khu chinju chino elimo efodi sifwaani sie khukhwisaaya sisiaakhwakho efwesa ne sifwaani sisiabeechwa. Mukhoya mwakanakana nisio mulakhola.”

¹⁵Bengila munju eya Mika, niio omulawi omuele amenyanga mala bareeba Omulawi oyo nga ne achiililila.

¹⁶Babaandu ba Dani chimia sita ba baba ne bakangile bulwaani bwe liie baba bemile e silibwa.

¹⁷Bayooti baraano abo bengila munju mala babukula sifwaani sisiabeechwa khu murongooro sisiaakhwakho efwesa, ne efodi. Omusaayi aaba ali e silibwa ne banamae bakangiile bulwaani.

¹⁸Nga babaandu abo baacha bengila munju mwa Mika mala babukula bibiindu bitakatifu ebio, omusaayi abareeba ali, “Mulikho mukhola siina?”

¹⁹Bamukobosia bali, “Sila okhalomakho likhuwa tawe. Yiicha oche ne nafwe mala obe omusaayi lundi omukambisi wefwe. Buli bulayi obe omusaayi khu kholo yoosi eye Baisiraeli namwe obe omusaayi owe enju eyo omundu mulala?”

²⁰Lino liasangaasia omusaayi nio abukula bibiindu bitakatifu mala arekukha ne nabo.

²¹Nio barekukha ne barangiisie babaana babwe, chikhaafu chabwe, ne bibiindu biabwe.

²²Baba bachile aleeyikho khukhwama khu nju eya Mika, nio babaandu ba baamenya siimbi ne Mika babaloondakho bapane. Banyoola Batani

²³mala babayokelela. Babaandu ba Dani bakobola mala bareeba Mika bali, “Makhuwa siina? Sipupu sino sioosi sia siina?”

²⁴Mika abakobosia ali, “Mwabukuule omusaayi wase ne bawele base nibo nakhola mwarekuukhe ne nabo mala mulikho mundeeba muli makhuwa sina? Siina nisio mundekhile nasio?”

²⁵Babaandu ba Dani bamuboolela bali, “Bwakhabeele bulayi ewe olekhe khulomakho likhuwa liosi liosi tawe; busa babaandu bano bakhola bario baambwa lirima mala bakhuseera, ewe nende be enju yowo boosi baafwa.”

²⁶Nio, babaandu ba Dani bachiililila ne lukeendo lwabwe. Mika aabona ali bali ne kamaani khumukhila niye, mala akobola engo.

²⁷Enyuma we babaandu ba Dani khu bukula omusaayi ne bibiindu nibio Mika aba ne akhola, bacha mala bebwaakala Laishi. Lukoba luno lwaba lwe kumuleembe lundi lwe babaandu bakhebasiangakho bali banyala bebwaakalwa tawe. Babaandu ba Dani beera ba baamenya mu lukoba olwo mala balwosia.

²⁸Se baba nende obaabina tawe, sikila Laishi lwaba aleeyi khukhwama e Sidoni mala se baba ne likhuwa liosi liosi ne babaandu babaandi tawe. Lukoba lwa Laishi lwaba mwitooma lia Beti-rehobu. Babaandu ba Dani bombakha lundi lukoba lwa Laishi mala bamenyamo.

²⁹Bakaluukhasia lisina lialwo liliaba Laishi liaba Dani, lisina lia kuuka wabwe Dani, okhwa Yakobo.

³⁰Babaandu ba Dani baarao sifwaani sisiabeechwa nisio basaaya mala Yonasani okhwa Kerishomu omwichukhulu owa Musa aba omusaayi khulwe Badani. Be lisaaye lia Kerishomu bakhola nga basaayi be kholo ya Dani nabwila babaandu ne babukulwa bayilwa mu mbaambe.

³¹Sifwaani sie khukhwisaaya sia Mika siaramayo siise sioosi nisio Liiema nilio basaayilangamo Wele liaba e Shilo.