Read lubukusu Bakh. 19 Bible Online

Bakh. 19 - lubukusu bible

Bakh. 19

¹Mu ndaalo echo Isiraeli ne ekhaba no mwami tawe abao omulawi owaba omukwa mu sibala sie bikulu sia Efuraimu. Aabukula omukhaana khukhwama e Betelehemu mu Yuda abe omukhasi niye aamenyia busa nga omusaale.

²Omukhasi oyo aaloba omulawi oyo mala aakobola munju eya raraawe e Betelehemu, amenyayo kimieesi kine.

³Nio omuseecha wewe amuloondakho khu musaaya akobole naye. Omundu oyo acha ne omukholi wewe ne chipunda chibili. Eecha munju eya paapa owo mukhasi wewe ne nga paapa owo mukhaana oyo ne abona omulawi oyo, amwakaanila ne busangaafu.

⁴Paapa owo mukhaana oyo amusaba abeekhoo khu siise mala abao khu ndaalo chitaru. Nio ne balia, ne banywa ne khukonayo.

⁵Kumutikhinyi kwe ndaalo ekhola khane benyokha makhelebeende mala berekekha khurekukha bache. Ne kakhali paapa owo mukhaana aboolela omulawi oyo ali, “Liakho sisiindu nio muche.”

⁶Nio lundi babaandu babili abo, paapa owo mukhaana no mulawi, bekhala asi mala balia, banywa alala. Nio paapa owo mukhaana aboolela mulawi ali, “Nosiima kona eno mala kumwoyo kwowo kusangaale.”

⁷Omulawi enyokha ali arekukhe, mala paapa owo omukhasi amusaba akone. Nio akonayo siilo sisiindi.

⁸Endaalo ekhola kharaano, Omulawi enyokha kumutikhinyi makhelebeende ali arekukhe, ne kakhali paapa owo omukhaana aloma ali, “Nosiima liakho sisiindu mala oliinde khukhwola ekolooba.” Nio babaandu babili abo, paapa owo mukhaana ne omulawi baliila alala.

⁹Nga omundu oyo no mukhasi wewe no mukholi berekekha khurekukha, paapa owo mukhaana aboolela omulawi ali, “Lola, bwelabuule, nosiima kona lundi silo sino. Sisiilima silikho siamba, kona ano mala ouluukhe. Kumutikhinyi onyala wenyokha makhelebeende oche engo.”

¹⁰Ne kakhali omulawi oyo se enya khukonayo siilo sisiindi tawe, nio niye no mukhasi wewe barakikha lukeendo lwabwe. Baba ne chipunda chibili ne chilikho khale bibiindu bie khwikhala kho mu mikoongo kiacho.

¹¹Yaba oli ekolooba enje ne elikho etiimba, bola siimbi e Yebusi (nilwo lukoba lwa Yerusalemu). Nio omukholi aaboolela omwami wewe ali, “Lekha khwingile mu lukoba luno lwe Bayebusi mala khukonemo silo sino.”

¹²Ne kakhali omwami wewe aloma ali, “Se khulikho khucha khwima khwingile mu lukoba lwe bareende, babaandu bakhali Baisiraeli tawe. Khulabira khwole Kibea.”

¹³Nio aaboolela omukholi wewe ali, “Yiicha khubire mala khuchekho ebweeni nio khukonele e Kibea namwe Rama.”

¹⁴Nio babira e Yebusi mala bachiililila ne lukeendo lwabwe. Enyanga beele yakwile nga boola Kibea mu sibala sie ekholo eya Babenjamini.

¹⁵Baacha bakone mu lukoba omwo siilo esio. Bacha mu lukoba mala bekhala akari we lukoba sikila se abao omundu yesi yesi owababukula bache bakone munju mwewe tawe.

¹⁶Nga ne baba abwenao omusaakhulu echa niio bali khukhwama khu milimo kiewe mu mukuunda. Omusaakhulu yuno ama mu sibala sie bikulu sia Efuraimu, aaba omukwa mu Kibea. (Babaandu be abwenao baba be ekholo eya Benjamini.)

¹⁷Omusaakhulu oyo aabona omukeni akari we lukoba mala amureeba ali, “Ewe wama waena? Ne olikho ocha waena?”

¹⁸Omulawi amukobosia ali, “Khwama e Betelehemu mu Yuda. Khuli khu lukeendo lwefwe khucha engo[36] mu sibala sie bikulu sia Efuraimu. Nacha e Betelehemu mu Yuda, ne luno ndikho nja engo wase.

¹⁹Mbao omundu oumbukuule nje ngone munju mwewe tawe. Khuli ne siakhulia ne bunyaasi bwe chipunda, kumukaati ne endali bio mukhasi wase ne nase ne omukholi wase yesi. Khuli nende buli siindu nisio khwenya.”

²⁰Omusaakhulu oyo aloma ali, “Ese namwakaaniile mukone mungo mwase! Ndamuliinda, mukhakona enje mu lukoba tawe.”

²¹Nio abayila mu mwewe, mala aliisia chipunda chabwe. Bakeni bewe besiinga bikele mala balia ne khuunywa.

²² Nga baba ne balikho bekhoya, babaandu be mbelekeu khukhwama mu lukoba babotookhelela enju mala barakikha khukhupa kumuliango. Baboolela omusaakhulu oyo bali, “Rusia oreere ano omundu owichile munju mwowo! Khwenya khukone ne naye!”

²³Omusaakhulu oyo arura enje mala ababoolela ali, “Balebe base, ne musiima mukhakhola sisiindu sie sifwaabi nga esio sirio tawe! Omundu yuno ali omukeni wase.

²⁴Lola, khuli ano no mukhasi wewe niye aamenyia busa nga omusaale, no mukhaana wase owe yabwana. Khe mbarusie enje, mala munyala mwakona nabo, mu bakhole nisio mwenya. Ne kakhali mukhakhola sisiindu sibi lukali sirio khu mundu yuno tawe!”

²⁵Ne babaandu abo se bamurekeeresia tawe. Nio omulawi oyo abukula omukhasi wewe chana mala abarusia enje. Baakwa khu mukhasi oyo siilo sioosi nabwila nga bwasia.

²⁶Oli bulikho busia omukhasi oyo echa, mala akwa amuliango we enju eyo musaakhulu oyo, niio omuseecha wewe aaba nali. Omukhasi oyo aaba amuliango ao khukhwola nga enje ne yabaayukha.

²⁷Omuseecha wewe enyokha kumutikhinyi mala nga ne ekula kumuliango, narakikhe lukeendo lwewe, anyoola omukhasi wewe alambaliile ebweeni we nju, mala aakolosiisie kamakhono khukhwola khu muliango.

²⁸Amuboolela ali, “Yinyokha khuche.” Ne se amukobosia tawe. Nio aara kumubili khu punda, mala arakikha lukeendo lwewe lwe khucha engo.

²⁹ Nga ne ola engo, engila munju mwewe aabukula kumubano mala akhalamo omukhasi wewe omufu oyo, bitonyi likhumi ne bibili. Ayila bitonyi bino mu kholo yoosi eya Isiraeli.

³⁰Buli mundu owabonakho sitonyi esio aloma ali, “Sisiindu nga sino siri, sikhakholekhakho namwe siabonekhakho khukhwama nga Baisiraeli barekukha barura e Misiri tawe! Khukhoya khukholekho sisiindu khu lino! Silaba silala sina?”