Read lubukusu Bakh. 2 Bible Online

Bakh. 2 - lubukusu bible

Bakh. 2

¹Malaika owa Wele Omunyali Owa Bioosi aama e Kilikali acha Bokimu mala aboolela Baisiraeli ali, “Namurusia e Misiri mala namureera mu sibala nisio nalaka bakuuka benywe. Naboola ndi, ‘Ese se ndifunaka endakaano yase ne nanywe tawe.

² Mukhakholakho endakaano yosi yosi ne babaandu bamenyile mu sibala sino tawe. Mutechule ne khukhwonaka chi alutare chabwe.’ Ne kakhali se mwariire lilaka liase tawe. Siina nisio mukholile sino?

³Nono, muboolela enywe ndi se enja khuona babaandu bano barure ebweeni wenywe nga ne muliba ne mulikho muchiililila khuula tawe. Baliba basiku[6] benywe, mala bawele baabwe bakhabe kumureko khwinywe.”

⁴Nga malaika owa Wele Omunyali Owa Bioosi ne aloma lino, babaandu ba Isiraeli boosi barakikha khulila.

⁵Nio balaanga abuundu ao bali Bokimu[7]. Abwenao baanilao siianwa khu Wele Omunyali Owa Bioosi.

⁶Yoshua alekhuula babaandu ba Isiraeli bache, mala buli omundu acha abukula kumukabwa kwewe kwe kamaloba.

⁷Nga Yoshua aba ne asiilio omulamu, Baisiraeli bakholelanga Wele Omunyali Owa Bioosi. Ne enyuma we lifwa liewe bachiililila khukhola bario. Bakhola bario nga babemeelesi babona bibiindu biboofu bioosi nibio Wele Omunyali Owa Bioosi aaba ne akholeele Isiraeli ne basiili balamu.

⁸Omukholi owa Wele Omunyali Owa Bioosi, Yoshua okhwa Nuni, afwa ne ali ne bukhulu bwe kimiiko emia ndala ne likhumi.

⁹ Asiikhwa mu maloba kewe omwene e Timunati-Sera mu sibala sie lukulu lwa Efuraimu ebunaswa we sikulu sia Kaashi.

¹⁰Eselukho eyo yoosi yafwa mala eselukho eyaloondakho yebilila niko Wele Omunyali Owa Bioosi aaba ne akholeele Isiraeli.

¹¹Mala Baisiraeli bakhola bumayaanu khu Wele Omunyali Owa Bioosi nga barakikha khusaaya Baali.

¹²Baloba khusaaya Wele Omunyali Owa Bioosi, Wele we bakuuka babwe, Wele owabarusia e Misiri. Baisiraeli barakikha khusaaya bawele babaandi, bawele be babaandu ba baba siimbi. Babasikamila mala baambia Wele Omunyali Owa Bioosi lirima.

¹³Baloba khusaaya Wele Omunyali Owa Bioosi mala bakholela ba Baali ne Ashitoreti.

¹⁴Nio Wele Omunyali Owa Bioosi aba omurafu lukali khu Baisiraeli. Alekha banuuli babebwaakala mala babanuula kimiaandu. Alekhuula basiku ba baba siimbi babakhila kamaani mala Baisiraeli se banyala khukhweliinda lundi tawe.

¹⁵Buli lwosi nga ne bachichaanga mwiie, Wele Omunyali Owa Bioosi se abechanga lubeka lwabwe tawe, bulayi bwene nga aaba ne aboolile. Baba mu butinyu bukali.

¹⁶Nio, Wele Omunyali Owa Bioosi aelesia Baisiraeli babemeelesi ba babaonia khukhwama khu banuuli.

¹⁷Ne kakhali Baisiraeli se baulila ke babemeelesi babwe tawe. Se baba bang'ali khu Wele Omunyali Owa Bioosi tawe, mala basaaya bawele babaandi. Bakuuka baabwe baba baria kamalaka ka Wele Omunyali Owa Bioosi. Ne kakhali lisaaye lie bakuuka bano lialekha khuria kamalaka.

¹⁸Buli lwosi nga Wele Omunyali Owa Bioosi aechanga Baisiraeli omwimeelesi, amuyetaanga mala abaonia khukhwama khu basiku babwe mu bulamu bwo omwimeelesi oyo bwoosi. Wele Omunyali Owa Bioosi aabakholelaanga siisa mu buchuuni bwabwe ne mu minaanio.

¹⁹Ne buli lwosi omwimeelesi ne afwiile, babaandu bakaluukhananga bakobola khungila chikhale ne likhola libi khukhila eselukho eyaba ne ebirire. Bakholelanga ne khusikamila bawele babaandi mala baloba khulekha chingila chabwe chikhiikha.

²⁰Wele Omunyali Owa Bioosi aambwa lirima khu Baisiraeli. Aaloma ali, “Ekholo yino yafunaake endakaano niyo nalaka bakuuka baabwe baliinde. Se bandiire ese tawe.

²¹Se ndaoona lundi chikholo chichaba ne chisiili mu sibala nga Yoshua ne akhafwa, chiruremo tawe.

²²Ndachirumikhira khukela Baisiraeli ndole baloonda chingila chase nga bakuuka baabwe ne bakhola namwe tawe.”

²³Nio Wele Omunyali Owa Bioosi alekha chikholo echo chisikale mu sibala omwo. Se akhola Yoshua abaula tawe, namwe se abaoona khangu baruramo enyuma we lifwa lia Yoshua tawe.