Read lubukusu Bakh. 20 Bible Online

Bakh. 20 - lubukusu bible

Bakh. 20

¹Nio Baisiraeli boosi khukhwama a Dani lubeka lwe ebunaswa khukhwola e Beerisheba lubeka lwe ebunafubo, ne akhaba khukhwama mu sibala sia Kileati lubeka lwe bukwe, bafukiilila kumulaango. Bebuusia alala boosi ebweeni wa Wele Omunyali Owa Bioosi e Misipa.

²Babemeelesi be chikholo che Baisiraeli choosi babao mu khubuusiana alala khwe babaandu ba Wele. Babao banamae bakeenda busa khu bikele chielefu chimia chine.

³Mu siise esio babaandu Babenjamini baulila bali Baisiraeli boosi bebuusiisie e Misipa. Baisiraeli bareeba bali, “Khuboolele kamamayaanu kano kakholekhe kariena?”

⁴Omulawi, omwene mukhasi niye beera akobosia ali, “Ese no mukhasi wase khwacha e Kibea mu sibala sie ekholo eya Benjamini khukonayo.

⁵Babaandu be Kibea becha khukhuseera. Mu silo babotookhelela enju. Benya khu khunjira ese, ne kakhali bakwa khu mukhasi wase siilo sioosi mala afwa.

⁶Nabukula omufu namutonyatonyamo bitonyi, mala nayila sitonyi buli mu kholo ndala eya Isiraeli: Babaandu bano bakholile sikholwa simayaanu sie sifwaabi mu Isiraeli.

⁷Enywe mwesi Baisiraeli muli ano, mukholakho siina khu lino?”

⁸Babaandu boosi bema alala mala baloma bali, “Se aliio mulala khwifwe olacha engo tawe.

⁹Lino nilio khulakhola: Khulapa chikura mala khurobore babaandu bebwaakale Kibea[37].

¹⁰Khakhubukule babaandu batiiti khukhwama mu buli ekholo eye Baisiraeli barusie siakhulia khu banamae ne babaandi bache mala baruunge Kibea[38] khulwe sikholwa simayaanu nisio bakholile mu Isiraeli sino.”

¹¹Nio Baisiraeli boosi bebuusia alala ne sifuno silala, khukhwibwaakala lukoba lwa Kibea.

¹²Baisiraeli baruma babaandu mu lukoongo lwe ekholo eya Benjamini lwosi balome bali, “Enywe mwakholile sifwaabi sina sino?

¹³Nono rusia bamayaanu abo mu Kibea efwe khubeere, mala khurusie mu Isiraeli bumayaanu buno.” Ne kakhali babaandu ba Benjamini balekelesia Baisiraeli basiaabwe.

¹⁴Babaandu bama mu ngoba cha Benjamini chosi becha e Kibea khu khuupana ne Baisiraeli babaandi.

¹⁵Babaandu ba Benjamini balaanga banamae endaalo eyo chielefu kamakhumi kabili, ne chielefu sita khukhwama mu ngoba chabwe.

¹⁶Alala ne nabo, babaandu ba Kibea babuusia baseecha chimia saba ba baaba be kumukoota. Buli mulala khu nibo aba anyala achukucha libaale liacha liapa omundu niye enyile omwene.

¹⁷Ekholo eya Benjamini ne ekhalikho tawe, Baisiraeli bebuusia alala chielefu chimia chine che banamae babamanya khu khupana liie.

¹⁸Baisiraeli bacha abuundu we khukhwisaaya e Beteli mala ebweeneyo bareeba Wele bali, “Kholo sina elanyoa yibwaakale babaandu ba Benjamini?” Wele Omunyali Owa Bioosi akobosia ali, “Ekholo eya Yuda.”

¹⁹Nio Baisiraeli barakikha lukeendo kumutikhinyi endaalo eloondakho mala baapa ekambi siimbi ne lukoba lwa Kibea.

²⁰Baacha khukhwibwaakala banamae Babenjamini mala bemisia banamae baloleelela mu lukoba.

²¹Banamae Babenjamini barura mu lukoba lwa Kibea beera banamae Baisiraeli chielefu kamakhumi kabili ne chielefu chibili endaalo ng'eneyo.

²²Ne kakhali Baisiraeli bachuubana banyoola kamaani mala lundi bema berekekha khu liie abuundu ao ne abwene niio baba endaalo eye khunyoa.

²³Baisiraeli baacha ebweeni wa Wele Omunyali Owa Bioosi bekhalayo balila khukhwola ekolooba mala basaba Wele Omunyali Owa Bioosi bali, “Lundi khuche mwiie khupane ne bawandaayefwe Babenjamini?” Nio Wele Omunyali Owa Bioosi aloma ali, “Cha mupane ne nabo.”

²⁴Nio Banamae ba Isiraeli bacha khu banamae ba Benjamini lukhola khabili.

²⁵Babenjamini boosi barura mu Kibea lukhola khabili, mala siise sino beera banamae be Baisiraeli chielefu ekhumi ne munaane.

²⁶Nio babaandu Baisiraeli bacha e Beteli mala balilila Wele Omunyali Owa Bioosi. Se balia siakhulia tawe khukhwola ekolooba. Baana biianwa bie khuosia nende bie kumuleembe khu Wele Omunyali Owa Bioosi.

²⁷Nio basaba Wele Omunyali Owa Bioosi (Mu ndaalo echo Lisanduku lie Ndakaano eya Wele liaba ebweeneyo.

²⁸Ne Fineasi okhwa Eliesa, Eliesa okhwa Aruni akholanga ebweeni walio mu ndaalo echo). Baloma bali, “Khuche lundi mwiie khupane ne bawandaayefwe, Babenjamini, namwe khulekhe?” Nio Wele Omunyali Owa Bioosi aloma ali, “Cha sikila kumutikhinyi khamukhole enywe mu bakhaye.”

²⁹Nio Baisiraeli banamae babotookhelela mu bwikisi Kibea.

³⁰Khu ndaalo ekhola khataru, Baisiraeli bacha khu khupana ne ba Benjamini. Berekekha a Kibea nga bakholanga buli siise.

³¹Babenjamini barura bapane mu lukoba, nga bakholanga, barakikha khukhwirira Baisiraeli balala khu muyila kucha e Beteli ne khu muyila kucha e Kibea. Beera embi Baisiraeli kamakhumi kataru.

³²Babenjamini baloma bali, “Khulakhaya busa nga ne khwabakhayile.” Ne kakhali Baisiraeli baloma bali, “Lekha khwilukhe mala bakhuloondekho khubarusie mu lukoba bache khu muyila.”

³³Nio nga banamae be Baisiraeli besendekhelela enyuma mala beema a Baalitamari, Baisiraeli ba baaba ne bekisile barura khaangu khukhwama mumbo mwa Keba.

³⁴Baisiraeli chielefu ekhumi, babaroborwa khukhwama mu Isiraeli yosi bebwaakala Kibea mala liie liaba litinyu. Babenjamini se bamanya ne bali siimbi khubunisibwa tawe.

³⁵Wele Omunyali Owa Bioosi akhola Isiraeli yakhaya banamae be Babenjamini. Baisiraeli beera basiku babwe chielefu kamakhumi kabili ne chielefu chiraano, ne mia ndala, endaalo eyo.

³⁶Mala Babenjamini bamanya bali bakhiliilwe. Banamae be Baisiraeli beela enyuma khukhwama khu Babenjamini sikila baba beyikiine babaandu babekisa babotookhelela mu bwikisi Kibea.

³⁷Baisiraeli babekisa batimaka khangu bacha e Kibea, mala beerayo buli mundu.

³⁸Banamae be Baisiraeli ne babaandu babebuulila baba barao simanyisio. Simanyisio siaba liliisi ne lilikho liniina mu ngaaki khukhwama mu lukoba.

³⁹Baisiraeli ba baaba mwiie bakobola nga baboona liliisi. Khulwe siise sino Babenjamini baba beerire khale Baisiraeli kamakhumi kataru. Bebaasia bali babakhayile busa nga mataayi.

⁴⁰Nio, simanyisio sie liliisi siabonekha ne lirakikha khuniina mu ngaaki khukhwama mu lukoba. Babenjamini balola enyuma wabwe, mala barangararwa khubona lukoba lwosi lulikho luya.

⁴¹Nio Baisiraeli bakobola mala Babenjamini baayaaya lukali sikila bamanya bali, bali siimbi khubuna.

⁴²Bakobola enyuma khukhwama khu Baisiraeli, mala belukha ne bacha engila echa mu sichiimi. Ne kakhali baambilwa akari kari we banamae Baisiraeli ba baaba luno ne balikho bama mu lukoba[39], mala babuna.

⁴³Baisiraeli beera omusiku wabwe. Babatimania mala bababunisila a Noha lubeka lwe ebukwe owa Kibea.

⁴⁴Banamae be Babenjamini chielefu ekhumi ne chielefu munaane beerwa.

⁴⁵Banamae babaandi belukha bacha lubeka lwe musichiimi bola khu lwanda lwa Rimoni. Khu nibo chielefu chiraano cheererwa khu miila. Baisiraeli bachiililila khutimania baramire boola e Kitomu, babeera chielefu chibili.

⁴⁶Nio Babenjamini babeerwa endaalo eyo boosi alala baba chielefu kamakhumi kabili ne chiraano. Baba boosi banamae banyindaafu.

⁴⁷Ne kakhali Babenjamini chimia sita banyala khukhwilukha bekhupa mu sichiimi bola e Lwanda lwa Rimoni mala bamenyayo khulwe kimieesi kine.

⁴⁸Baisiraeli bakobola khu Babenjamini ba baaba ne baramire mala beera babaandu boosi, bakhasi ne babaana ne bibiaayo bioosi. Boosia buli lukoba luliyo.