Read lubukusu Bakh. 21 Bible Online

Bakh. 21 - lubukusu bible

Bakh. 21

¹Nga Baisiraeli ne baba ne bebuusiisie e Misipa, bechuba lukali bali, “Se alio mulala khwifwe olifukiilila Omubenjamini akhwe omukhaana khukhwama mwifwe abe omukhasi wewe tawe.”

²Nio, Baisiraeli bacha mu lukoba lwa Beteli mala bekhala ebweeni wa Wele khukhwola ekolooba. Balila mu bubeeleli bukali.

³Baloma bali, “Wele Omunyali Owa Bioosi, Wele owa Isiraeli, siina sikila lino ne liekholekhe? Siina sikila ekholo eya Benjamini ne eli siimbi khuela mu Isiraeli?”

⁴Makhelebeende, nga ne bwasia kumutikhinyi babaandu Baisiraeli benyokha bombakhayo alutare. Baana biaanwa bie khukhwosia nende bie kumuleembe.

⁵Nio Baisiraeli bareeba bali, “Elikhoo ekholo yosi yosi khukhwama mu kholo che Baisiraeli choosi ekhaacha ne nafwe khukhwebusia alala ebweeni wa Wele Omunyali Owa Bioosi e Misipa Ku?” (Bareeba lireeba lino sikila baba bechuba burafu bali omundu yesi yesi okhachiile e Misipa tawe aleerwa.)

⁶Baisiraeli bakholela bawandaayabwe Babenjamini siisa mala baloma bali, “Endaalo yino Isiraeli yatibiisie ekholo ndala khu kholo chayo.

⁷Khwechuba ebweeni wa Wele Omunyali Owa Bioosi khuli se khulilekhuulakho Babenjamini bakhwe bakhaana befwe tawe. Khukhola khuriena nio babaandu Babenjamini banyoole bakhasi?”

⁸Nga ne bareeba khumanya kaaba bali se yabao ekholo yosi yosi mu kholo che Baisiraeli ekhaacha mu libuusiana e Misipa ne babaandi tawe, banyoola bali se abayo omundu yesi yesi khukhwama mu kholo eya Yabesi mu Kileati tawe.

⁹Nga kamasina ne kalaangwa ke banamae, se abao omundu khukhwama e Yabesi owafukiilila tawe.

¹⁰Nio sisiikhasio sie Baisiraeli siaruma banamae babwe banyindaafu chielefu ekhumi ne chibili ne khubalaka bache beere buli mundu mu Yabesi, akhaba bakhasi ne babaana.

¹¹Bababoolela bali, “Yiira babaandu be siseecha boosi ne akhaba buli mukhasi okhali ne eyabwaana tawe.”

¹²Banyoola mu baandu be Yabesi bakhaana be yabwana chimia chine, nio babareera mu kambi e Shilo, lukoba luli mu sibala sia Kanaani.

¹³Nio libuusiana lioosi liaruma likhuwa khu Babenjamini ba baaba e Lwanda lwa Rimoni bababoolele bali khumale liie.

¹⁴Babenjamini bakobola, mala Baisiraeli babaandi babaa bakhaana khukhwama e Yabesi nibo baba bakheriire tawe. Ne se baboola tawe.

¹⁵Baisiraeli bakholela Babenjamini siisa sikila Wele Omunyali Owa Bioosi aukhasia chikholo cha Isiraeli.

¹⁶Nio babemeelesi bakhulu Baisiraeli baloma bali, “Bakhasi be babaandu ba Benjamini beriirwe. Khulakhola khuriena nio khunyoolele Baseecha baramire bakhasi?

¹⁷Isiraeli se ekhoya yatibia ndala khu kholo ekhumi ne chibili tawe. Khukhoya khuyiime engila mala ekholo eya Benjamini ebeo.

¹⁸Ne fwe se khufukiilila bakhwe bakhaana befwe tawe, sikila khwara silaamo khu mundu yesi yesi ofukiilila omubenjamini akhwe mulala khu bakhaana befwe.”

¹⁹Nio bebaasia bali, “Naikara eya Wele Omunyali Owa Bioosi eya buli mwiiko e Shilo elikho echa khubao.” (Shilo eli lubeka lwe ebunaswa owa Beteli, lubeka lwe ebunafubo owa Lebona, lundi lubeka lwe ebukwe we kumuila kuuli akari wa Beteli ne Shekemu.)

²⁰Baboolela Babenjamini bali, “Khemuche mala mwikise mu mikuunda kie kimisabibu mala mulindiliile.

²¹Nga bakhaana ba Shilo ne becha khukhina, murure khukhwama mu mikuunda kie kimisabibu mu siise sia naikara. Buli mulala khwinywe aambe omukhaana ne kamaani khukhwama mu bakhaana bano mala amubukule akobole ne naye mu sibala sia Benjamini.

²²Ne bapaapa babwe namwe bawandaayabwe basoleeli ne bamwichakho bamuyinganie mubaboolele muli, ‘Ne musiima mukhulekhele sikila se khwababukulile mwiie khukhwama mwinywe babe bakhasi befwe tawe. Ne, enywe se mwafunaake khukhwechuba khwenywe tawe, sikila se mwakhuele busa mwabeene tawe.’ ”

²³Nono Babenjamini bakhola bario. Buli mulala khu nibo arobora omukhaana khukhwama mu bakhaana ba baaba ne balikho bakhina e Shilo mala acha ne naye aba omukhasi wewe. Nio bakobola mu sibala siabwe nisio Wele abaelesia, bombakha lundi chingoba chabwe mala bamenyamo.

²⁴Ne Baisiraeli babarama boosi barekukha, mala buli mundu akobola khu kholo ne khu be nju yewe, ne khu maloba kabwe niko Wele abaelesia.

²⁵ Se abao omwami mu Isiraeli mu siise esio tawe. Buli mundu akholanga siosi siosi simusiimisia.