Read lubukusu Bakh. 3 Bible Online

Bakh. 3 - lubukusu bible

Bakh. 3

¹Wele Omunyali Owa Bioosi aalekha chikholo chindala mu sibala khukhaka Baisiraeli bakhaabirira mwiie mu Kanaani tawe.

²Akhola lino nio ekesie buli eselukho eye Baisiraeli ke liie, lukali khu abo abele bakhabakho mwiie tawe.

³Babalekhwa mu sibala baba babaami baraano be Bafilisiti, Bakanaani boosi, Basidoni ne Bahibi bamenyile mu bikulu bia Lebanoni khukhwama khu sikulu sia Baali-Herimoni khukhwola khu silibwa sie Hamati.

⁴Chikholo chino chaba likhako khu Isiraeli khumanya ne kali bali Baisiraeli balaria kamalaka niko Wele Omunyali Owa Bioosi aba ne aele bakuuka baabwe khubirira khu Musa namwe tawe.

⁵Khwako, Baisiraeli bamenya mu maloba ke Bakanaani, Bahiti, Baamori, Baperisi, Bahibi ne Bayebusi.

⁶Bakhwaana ne nabo mala basaaya bawele baabwe.

⁷Baisiraeli bebilila Wele Omunyali Owa Bioosi, Wele wabwe bamukholela bumayaanu mala basaaya bawele Baali ne Asieroti.

⁸Nio Wele Omunyali Owa Bioosi aambila Baisiraeli lirima mala alekha omwami Kushani Rishadhaimu owe Mesopotamia abape ne khu baula. Baba asi wewe kimiiko munaane.

⁹Nio Baisiraeli balilila Wele Omunyali Owa Bioosi, mala Wele Omunyali Owa Bioosi aruma omundu abaabine. Oyuno aba Otinieli okhwa Kenasi. (Kenasi aba wandaaye owa Kalebu.)

¹⁰Roho owa Wele Omunyali Owa Bioosi amwichakho, mala aaba omwimeelesi owe Baisiraeli. Otinieli acha mwiie mala Wele Omunyali Owa Bioosi amuyeeta aula omwami owa Mesopotamia oyo.

¹¹Kumuleembe kwaba mu sibala khulwe kimiiko kamakhumi kane ne Otinieli afwa.

¹²Baisiraeli lundi bakhola kamamayaanu khu Wele Omunyali Owa Bioosi. Sikila kano, Wele Omunyali Owa Bioosi akhola omwami Ekironi owe Bamoabu aba ne kamaani khukhila Baisiraeli.

¹³Ekironi aambana ne Baamoni ne Baamaleki baula Baisiraeli mala baamba Yeriko, lukoba lwe kamakheendu.

¹⁴Baisiraeli baba asi we bunyali bwa Ekironi khulwe kimiiko ekhumi na munaane.

¹⁵Lundi Baisiraeli balilila Wele Omunyali Owa Bioosi mala aruma omundu abaabina. Oyuno aba Ehudi omundu we kumukoota owaba okhwa Kera, khukhwama mu kholo eya Benjamini. Baisiraeli baruma Ehudi khu mwami Ekironi owe Bamoabu amuyilile biianwa.

¹⁶Ehudi aba abasile embalu buleeyi bwe liraango, eyokiia chimbeka chombi. Akiboa khu nduukhu eye sikele siewe siseecha mala akwisiakho chingubo.

¹⁷Nio abukula biianwa ayilila Ekironi owaba omundu omunefu lukali.

¹⁸Nga amala khumua biianwa, Ehudi aboolela babaandu bababisuta barekukhe bache.

¹⁹Ne Ehudi omwene ayuukha akobolela amabaale kamabeche siimbi Kilikali, khu Ekironi mala aloma ali “Omwami, ndi ne likhuwa lia babili fweng'ene.” Nio omwami arusia lilaka khu bakholi bewe ali, “Rura, mukhulekhe fweng'ene!” Boosi barura enje.

²⁰Nga omwami ne aba ne ekhaale yeng'ene mu lusiro lunyifu lwe munju angaaki, Ehudi amuchao mala aloma ali, “Ese ndi ne likhuwa liowo khukhwama khu Wele.” Omwami enyokha eema.

²¹Ne kumukhono kumukoota Ehudi abukula embalu khukhwama khu nduukhu eye lubeka luseecha mala auuna omwami enda.

²²Embalu yoosi yengila ne siini siosi mala kiminaawa kiakifuunikha. Ehudi se akikhweesa yarura munda mwo omwami tawe.

²³Nio Ehudi arura mu lusiro acha anje, ekala kimiliango akikhomekha,

²⁴mala arekukha. Bakholi becha mala babona kimiliango kimikhomekhe ne bebaasia busa bali omwami ali mukari alikho eyeeta.

²⁵Baliinda siise sileeyi mala nga ne akhekula kumuliango tawe, babukula lufunguo mala bakwikula. Ne abwenao banyoola omwami wabwe akwile amukhe afwiile.

²⁶Nga baba ne basiliindiilila Ehudi elukha. Acha abirira emabaale kamabeche mala elukhila e Seira.

²⁷Nga ne olayo, mu ngulu cha Efuraimu, apa ekhoombi, khulaanga Baisiraeli bache mwiie, nio abaraangirira bekha khukhwama khu bikulu.

²⁸Aloma ali, “Nondekho! Wele Omunyali Owa Bioosi amueele buuli khu basiku benywe, Bamoabu.” Nio, baloonda khu Ehudi bekha mala baamba kamafubukho niko Bamoabu baba bacha khwambukhilamo Yoritani. Se bafukiilila omundu akhaba mulala yeng'ene ambukhe tawe.

²⁹Endaalo eyo beera ambi chielefu ekhumi che banamae balayi lukali be Bamoabu. Se aliio owelukha aona tawe.

³⁰Endaalo eyo Baisiraeli baula Bamoabu mala kumuleembe kwaba mu sibala khulwe kimiiko kamakhumi munaane.

³¹Omwimeelesi oloondakho aba Siamukari okhwa Anasi. Yesi aonia Baisiraeli khulwe khukhwira Bafilisiti chimia sita ne siimbo eye chikhaafu.