Read lubukusu Bakh. 4 Bible Online

Bakh. 4 - lubukusu bible

Bakh. 4

¹Enyuma we khufwa khwa Ehudi, Baisiraeli lundi bakhola bumayaanu khu Wele Omunyali Owa Bioosi.

²Nio Wele Omunyali Owa Bioosi abalekhela Yabini aabaula. Yabini aaba omwami Omukanaani owamiia mu lukoba lwa Hasari. Komanda wewe owe liie aba Sisera, owamenyanga e Harosheti-hakoimu.

³Yabini aba ne kamakaari ke bichuuma ke liie chimia tisa. Mala amiia Baisiraeli ne burafu ne sisiayuumba khulwe kimiiko kamakhumi kabili. Nio Baisiraeli balilila Wele Omunyali Owa Bioosi abayeete.

⁴Nono Debora mukha Lapitoti aaba omung'oosi lundi omwimeelesi owe Baisiraeli mu siise esio.

⁵Ekhalanga asi we kumukheendu akari wa Rama ne Beteli mu sibala sie lukulu sia Efuraimu, ne Baisiraeli bachichangayo khulwe bukhalaki bwewe.

⁶Endaalo ndala arumania balange Baraka okhwa Abinoamu khukhwama mu lukoba lwa Keteshi mu Nafutali. Nio amuboolela ali, “Wele Omunyali Owa Bioosi, Wele owa Isiraeli, akhulaka ali, ‘Bukula babaandu chielefu likhumi khukhwama mu kholo cha Nafutali ne Sebuluni, mala obayile khu sikulu sia Tabori.

⁷Ndareera Sisera omukhulu we banamae ba Yabini akhupane ne nawe a luuchi lwa Kishoni. Alaba ne kamakaari ke bibia ne banamae, ne ese ndakhukhola omuule.’ ”

⁸Nio Baraka akobosia ali, “Ndacha, ewe waaba ne olacha alala ne nase, ne waaba ne okhacha ne nase tawe, sesi se endacha tawe.”

⁹Debora amukobosia ali, “Bulayi; ndacha ne nawe, ne ewe se olanyoola efuma khulwe khuula tawe sikila Wele Omunyali Owa Bioosi alaana Sisera khu mukhasi.” Nio Debora arura acha Keteshi alala ne Baraka.

¹⁰Baraka alanga chikholo cha Sebuluni ne Nafutali chiche e Keteshi mala babaandu chielefu likhumi bamuloondakho. Debora acha ne naye.

¹¹Mu siise esio Heberi Omukenayi aaba oombakha liiema liewe e Keteshi, siimbi amuruba a Saananimu. Aba auuya acha aleeyi khukhwama khu Bakenayi babaandi be lisaaye lia Hobabu mukhwewe owa Musa.

¹²Sisera amanya ali Baraka aba aniinile khu sikulu sia Tabori.

¹³Nio alaanga bamureerere kamakaari kewe ke bichuuma chimia tisa ne babaandu bewe boosi. Nio abaruma khukhwama e Harosheti-hakoimu bache khu luuchi lwa Kishoni.

¹⁴Nio Debora aboolela Baraka ali, “Cha! Wele Omunyali Owa Bioosi alikho akhurangirira ewe. Endaalo yino olaula Sisera.” Nono, Baraka arekukha ekha khukhwama khu sikulu sia Tabori ne babaandu bewe chielefu likhumi.

¹⁵Nga Baraka ne banamae bewe ne bebwaakala, Wele Omunyali Owa Bioosi akoyaania Sisera alala ne babaandu bewe be kamakaari ke mwiie. Sisera ekha arura mu likaari liewe mala atima ne bikele elukha.

¹⁶Baraka atimania kamakaari ne banamae khukhwola Harosheti-hakoimu mala banamae ba Sisera boosi berwa, se aliio omundu owarama tawe.

¹⁷Sisera elukha acha engila mu liiema lia Yaeli. Yaeli aba mukha Heberi Omukenayi. Sisera engila mu liiema lia Yaeli sikila omwami Yabini owa Hasori aba ne kumuleembe nende be enju eya Heberi.

¹⁸Yaeli arura acha akaanila Sisera mala amuboolela ali, “Omwami, yiicha mu liiema liase okharia tawe.” Nio echa engila mala Yaeli amubiimba liruungeeti.

¹⁹Sisera aboolela Yaeli ali, “Ndikho mbulila bulesia, nosiima mbekho kameechi enywe.” Yaeli afunula eoochwa[8] eye lisieelo eye kamabeele amua anywa mala amufuunikha lundi.

²⁰Nono Sisera amuboolela ali, “Yiima amuliango kwe liiema ne omundu yesi yesi ne echa ne akhureeba ali, ‘Naanu oli muno?’ Muboolele oli mundumo tawe.”

²¹Sisera aba aluile lukali, liilo liamuaamba. Nio Yaeli abukula enyundo ne sichaangi sie liiema, amuchao mala amwiira khulwe khumukhoma sichaangi. Akhoma siabira mu siaanga siengila mwiloba.

²²Nga Baraka ne echa ne alikho ayiima Sisera, Yaeli arura acha amwakaanila, mala amuboolela ali, “Yiicha ano! Ndakhwekesia omundu niye olikho oyiima.” Nio Baraka engila mwiiema anyoola Sisera afwiile. Sichaangi sie liiema siaba siabirire mu murwe kwewe.

²³Endaalo eyo Wele aelesia Baisiraeli bukhili khu Yabini omwami owe Bakanaani.

²⁴Baisiraeli bachiililila khuloondelesia Yabini, omwami owa Kanaani khukhwola nga bamubunia.