Read lubukusu Bakh. 5 Bible Online

Bakh. 5 - lubukusu bible

Bakh. 5

¹Nio Debora ne Baraka okhwa Abinoamu bemba kumwenya khu ndaalo eyo bali,

²Babemeelesi barangirira babaandu mu Isiraeli, nio babaandu beaana babeene. Wele Omunyali Owa Bioosi afume!

³Ulila, Ee baami; rekeeresia, Ee bakhulu; khu Wele Omunyali Owa Bioosi ndemba, ndemba kumwenya khu Wele Omunyali Owa Bioosi, Wele owe Baisiraeli.

⁴Wele Omunyali Owa Bioosi, nga ne waama mu bikulu bie Seiri, nga ne waama mu sibala sia Edomu, liloba liaterema, mala efula yakwa, Yee, kamafuumbi kachukha kameechi.

⁵ Bikulu biaterema, ebweeni wa Wele Omunyali Owa Bioosi, niye Wele Omunyali Owa Bioosi owa Sinai, Wele owe Baisiraeli.

⁶Mu ndaalo cha Siamukari, okhwa Anati, mu ndaalo cha Yaeli, kimiila kiawa, ne bakeendi batalaandilanga khu ngila che khu ndulo.

⁷Bukhili bwawa, bwawa mu Isiraeli, khukhwola nga Debora[9] ne wema, wema nga maayi owe Baisiraeli.

⁸Nga ne barobora bawele bayia, liie liaba mu bilibwa. Engabo namwe lifumo biabonekhakho mu baandu chielefu arubaine mu Isiraeli?

⁹Kumwoyo kwase kuli alala ne banamae bakhulu be Baisiraeli, babeaana babeene khukhwama mu baandu. Wele Omunyali Owa Bioosi afume!

¹⁰Kaboole[10], enywe mukeendela khu punda chiwaanga, enywe mumwikhalila kamasisinwa kamalayi, ne nanywe mubira khu ngila.

¹¹Rekeeresia! Kumumilo kwe babaandu balikho beemba a sebele che kameechi, abwenao baboola bikholwa bie bukhili bwa Wele Omunyali Owa Bioosi, bukhili bwe Baisiraeli! Nio babaandu ba Wele Omunyali Owa Bioosi bakeenda boola khu bilibwa biabwe.[11]

¹²Yinyokha, yinyokha Debora! Yinyokha, yimba kumwenya, yinyokha! Yinyokha Baraka, okhwa Abinoamu, yimeelela baambe be mwiie bowo!

¹³Nio babalekhwa bekha beecha khu baandu be efuma, babaandu ba Wele Omunyali Owa Bioosi beekha becha[12] khwise, baula babaandu be efuma.

¹⁴Becha khukhwama Efuraimu bekha mu litooma[13], enyuma we ekholo eya Benjamini ne balebe bayo. Banamae bakhulu bakeenda bekha khukhwama e Makiri, ne basuti be siimbo yo mwimeelesi, baama e Sebuluni.

¹⁵Babemeelesi ba Isakari becha ne Debora, ekholo eya Isakari yaba eyeyikinwa khu Baraka. Baatima bacha mwitooma ne baloonda khu Baraka, mu kholo eya Rubeni. Liabamo lireeberesia likali mu miooyo!

¹⁶Sikila siina ne mwekhala mu matuuli ke kamakheese? Khurekeeresia babaapa kumulele kulaanga lituuli lie kamakheese? Mu kholo eya Rubeni, liabamo lilireeberesia liboofu mu miooyo!

¹⁷Kileati amenya ebukwe owa Yoritani. Ne Dani, sikila siina ne ekhala sia meeli? Asieri ekhala nasilile khu sikiingi sie enyanja, mala aliindilila a mafubukho keewe.

¹⁸Babaandu ba Sebuluni nende ba Nafutali beaana bulamu bwabwe abuundu aesuta[14] angaaki mu lukoongo.

¹⁹Babaami becha bapana, bapana ne babaami ba Kanaani, a Taanachi ambi ne kameechi ka Makito. Bapana ne se banuula efwesa bacha ne nayo tawe.

²⁰Ching'enieesi che mwikulu chapana, Mu mbilo chabwe chapana ne Sisera.

²¹Luluuchi lwa Kishoni lweeya, lweeya babaandu ba Sisera. Luluuchi lwe kamaani, luluuchi lwa Kishoni, mwoyo kwase, keenda, ne bunyindaafu!

²²Nio chifarasi chapukuta asi bikhakayu, chapukuta ne ndiri, ne kamaani kaacho.

²³“Laama Merosi,” malaika owa Wele Omunyali Owa Bioosi, laama ne burafu bamenywa balwo, sikila se beecha baabina Wele Omunyali Owa Bioosi tawe, se beecha khuaabina Wele Omunyali Owa Bioosi khukhwaama khu be kamaani tawe.

²⁴Yaeli abe ne chikhabi mu bakhasi boosi, mukha Heberi Omukenayi, owe ekhabi lukali, mu bakhasi bamenyile mu maeema.

²⁵Sisera asaba Yaeli kameechi, mala niye amua kamabeele; amureerera kamabeele kamabou, khu sibuumba sie bubwami.

²⁶Yaeli aamba sichaangi sie liiema, ne kumukhono kwewe kumuseecha aamba sikweelo sie bakholi; apa Sisera amutubundula kumurwe, mala amuuna amufutula siaanga.

²⁷Sisera ayeekha, akwa, alambaala a bikele bia Yaeli, a bikele bia Yaeli ayeekha, akwa; niio ayeekha, akwa afwilao.

²⁸Maayi owa Sisera alolela[15] mu litirisia, maayi owa Sisera alolela mu numa; “Sikila siina kamakaari kewe ne kakhakhola khangu tawe? Sikila siina chindiri che chifarasi chewe ne chiaayiliile khukhwola?”

²⁹Bakholi bewe be siikhasi bakesi bamukobosia, naye, omwene, ekobosia ali,

³⁰“Banyala baba ne balikho bakabana bibiindu nibio baambile mu mbaambe, omukhaana mulala namwe babili khu buli mundu. Chingubo che bukusi bwe angaaki khu Sisera, chingubo che kamapala kang'enang'ena mwikosi mwa kwini.”[16]

³¹Nono, bakhoya babuna, basiku bowo boosi, ee Wele Omunyali Owa Bioosi! Ne basaale bowo bakhoya baaba nga enyanga, ne esoa mu maani kaayo. Nio sibala siaba ne kumuleembe khu miiko kamakhumi kane.