Read lubukusu Bakh. 6 Bible Online

Bakh. 6 - lubukusu bible

Bakh. 6

¹Lundi Baisiraeli bakhola bumayaanu khu Wele Omunyali Owa Bioosi, nio Wele Omunyali Owa Bioosi alekhuula Bamidiani babamiiakho khulwe kimiiko saba.

²Bamidiani baba be kamaani khu Isiraeli mala Isiraeli bekisa khukhwama khu nibo mu mabina ne mu bikulu.

³Buli lwosi nga Baisiraeli bamiichanga bumiicho bwosi bwosi Bamidiani ne Baamaleki bechanga ne chikholo che mu sichiimi mala ne babebwaakala.

⁴Baapa ekambi khu maloba kabwe mala bonaka bibiaalwa khukhwama ebunaswa khukhwola khu lukoongo luli siimbi Kasa. Babukula kamakheese koosi, chikhaafu ne chipunda mala se balekhelakho Baisiraeli sisiindu siosi siosi sie khulia tawe.

⁵Becha ne chikhaafu chabwe ne kamaeema kamakali nga chisike. Nibo ne chingamia chabwe baba bakali abeele se banyala babalwa tawe. Becha mala bonaka kamaloba lukali.

⁶Baisiraeli se baba nende nisio bakhola ebweeni wabwe tawe. Baisiraeli balilila Wele Omunyali Owa Bioosi abayeete.

⁷Nga Baisiraeli balilila Wele Omunyali Owa Bioosi abayeete khulwe Bamidiani,

⁸Wele Omunyali Owa Bioosi abarumira omung'oosi. Omung'oosi aloma ali, “Wele Omunyali Owa Bioosi, Wele owa Isiraeli aloma ali, namurusia mu bunasioobi mu Misiri.

⁹Namureesia khukhwama khu Bamisiri ne khukhwama khu baandu ba bamunaania mu sibala sino. Naoona Bakanaani nabarusia khukhwama mu maloba kabwe mala namua enywe kamaloba ako.

¹⁰Namuboolela ndi ese ndi Wele Omunyali Owa Bioosi, Wele wenywe mukhasaaya bawele be Baamori nibo mu menyile mu maloba kabwe tawe. Ne se mwandekeresia tawe.”

¹¹Nio malaika owa Wele Omunyali Owa Bioosi echa khu sirekere sia Ofira mala ekhala asi we kumukhoonge kukwaba kwa Yoashi owe luuya lwa Abieseri. Omusoleeli wewe Gidioni aba alikho aulula engaanu mu bwikisi mwiloo lie khukhamululilamo endali, nio Bamidiani bakhakhola bario baboona engaanu tawe.

¹²Malaika owa Wele Omunyali Owa Bioosi abonekhela Gidioni ebweeneyo mala aloma ali, “Ewe oli omundu omunyindaafu lundi owe kamaani, Wele Omunyali Owa Bioosi ali ne nawe!”

¹³Gidioni amureeba ali, “Wele Omunyali Owa Bioosi aaba ne ali ne nafwe sina sikila kano koosi ne kakhwekholekhakho? Bili waena bibiindu bie khuukia nibio bapaapa befwe bakhuboolela nibio Wele Omunyali Owa Bioosi akholanga nga ne abareera khukhwama Misiri? Wele Omunyali Owa Bioosi akhumwaata, mala akhulekha khu siisa sie Bamidiani.”

¹⁴Nio Wele Omunyali Owa Bioosi amurakho omwene ali, “Khoche ne kamaani kowo kano mala oreesie Isiraeli khukhwama khu Bamidiani. Ese samwene niise olikho okhuruma.”

¹⁵Gidioni akobosia ali, “Ne ese nyala ndiena khureesia Isiraeli? Luuya lwase nilwo lutekhele mu kholo eya Manase mala lundi ese ndi omukeekhe lukali mu baandu be enju yefwe.”

¹⁶Wele Omunyali Owa Bioosi akobosia ali, “Ese ndakhuyeeta mala ewe olatubuundula Bamidiani oli fwana ne bali omundu mulala yeng'ene.”

¹⁷Gidioni akobosia ali, “Wele Omunyali Owa Bioosi waaba ne osiimisiibwe ne nase, mbelesie simanyisio oli ewe niwe olikho olomaloma.

¹⁸Nosiima okharekukha tawe khukhwola nga ndakhureerera siianwa sie biakhulia.” Wele Omunyali Owa Bioosi aloma ali, “Ndaliinda khukhwola nga ne okobola.”

¹⁹Nio Gidioni engila munju yewe mala ateekha emeeme, arumikhira bufu chikiilo likhumi khuteekha kumukaati kukhalimo limela liosi liosi tawe. Ara enyama mu sikono ne kumuunyu akuchukha mu saachi mala abireera khu malaika owa Wele Omunyali Owa Bioosi asi we kumukhoonge.

²⁰Malaika amuboolela ali, “Ra enyama ne kumukaati khu lwanda luno mala obichukhekho kumuunyu.” Gidioni akhola ario.

²¹Nio malaika owa Wele Omunyali Owa Bioosi aayila esiimbo niyo aaba ne nayo akitiisia khu nyama ne khu mukaati. Kumulilo kwama mu lwanda mala kwosia enyama ne kumukaati. Mala malaika chana aakoriokha.

²²Nio Gidioni amanya ali aaba aboone malaika owa Wele Omunyali Owa Bioosi mala aloma ali, “Njete ee Omwami WELE! Sikila ese naboone malaika wowo moni na moni!”

²³Wele Omunyali Owa Bioosi amuboolela ali, “kumuleembe kube ne nawe. Okharia tawe. Se olafwa tawe.”

²⁴Gidioni ombakhila Wele Omunyali Owa Bioosi alutare mala akitiuukha ali, “Wele Omunyali Owa Bioosi ali kumuleembe.” (Khukhwola luno alutare yino esiima busa e Ofira lukoba lwe kumuliango kwa Abieseri.)

²⁵Siilo esio Wele Omunyali Owa Bioosi aboolela Gidioni ali, “Bukula euunwa eya raraao ne euunwa ekiindi eye bukhulu bwe kimiiko saba. Techula alutare eya raraao eya Baali mala rema okwisie asi sifwani sia Asiera, sili siimbi a alutare.

²⁶Yombakha alutare endaayi khu Wele Omunyali Owa Bioosi, Wele wowo khu ngaaki khwe sisiili sino. Mala bukula euunwa eya khabili, mala okiosie nga siianwa khulwe khurumikhira chiikhu che sifwani sia Asiera nisio oremiremo wakwiisia.”

²⁷Nio Gidioni abukula bakholi bewe ekhumi mala akhola niko Wele Omunyali Owa Bioosi aba ne amubooleele. Gidioni aba omuri lukali khu baandu be enju yewe, ne khu baandu be mu lukoba khukhwombakha alutare kumuusi, nio akhola ario silo.

²⁸Nga babaandu be lukoba ne benyokha makhelebeende endaalo eloondakho, banyoola alutare eya Baali ne sifwani sia Asiera biaremirwe biakwile, mala euunwa eya khabili yaba yoseebwe khu alutare eyaba ne yombakhweo.

²⁹Bareebana bali, “Naanu okholile kano?” Bareeberesia mala banyoola bali, Gidioni okhwa Yoashi niye owaba ne alikholile.

³⁰Nio baboolela Yoashi bali, “Reera omusoleeli wowo ano khumwire! Sikila atechuule alutare eya Baali mala aremire akwisiisie asi sifwaani sia Asiera siili a alutare.”

³¹Yoashi aboolela boosi ba baaba ne bamwichilekho ali, “Enywe mwemile ano khulwa Baali? Mulikho mu mupanila? Yesi yesi olamupanila aleerwa ne bukhaasia tawe. Kaaba bali Baali ali wele, lekha omwene ekhupanile khulwa Alutare yewe yatechulwa.”

³²Nono khukhwamila ao Gidioni alaangwa Yerubaali[17], lisina liili ne sifuno lili, “Lekha Baali ekhupanile omwene,” Sikila Gidioni akwiisia alutare eya Baali.

³³Nio Bamidiani boosi, Baamaleki ne chikholo che mu sichiimi chebuusia alala, chambukha luluuchi lwa Yoritani mala bebuusia mu litooma lia Yesireeli.

³⁴Gidioni echusibwa ne Roho owa Wele Omunyali Owa Bioosi mala apa ekhoombi khulaanga babaandu be Babieseri bamuloondekho.

³⁵Aruma barume mu sibala sia Manase yoosi khubalanga bamuloondekho. Aruma barume khu kholo cha Asieri, Sebuluni ne Nafutali, mala akhaba boosi becha baambaana ne naye.

³⁶Nio Gidioni aboolela Wele ali, “Waloma oli ocha khureesia Isiraeli khubirira khwise.

³⁷Ndikho nda bufuumbo bwe kamakheese asi khu liloba niio khuulilaanga engaanu. Yaaba kumutikhinyi luume ne lulaba khu bufuumbo bwong'ene, ne se lulaba ne asi tawe, aba ndamanya ndi olikho ocha khukhundumikhira ese khuonia Baisiraeli.”

³⁸Nio kaba kario. Nga Gidioni ne enyokha makhelebeende endaalo eloondakho akhamulula bufuumbo arusiamo luume lwechula sibuumba.

³⁹Lundi Gidioni aboolela Wele ali, “Khakhuaambia lirima tawe, lekha ndomalomekho lundi lulala lwong'ene. Nosiima lekha khole likela liliindi ne bufuumbo. Siise sino lekha bufuumbo bube bubalakafu ne asi abe anyifu.”

⁴⁰Silo esio Wele akhola ario. Endaalo eloondakho makhelebeende, bufuumbo bwaba bubalakafu, ne asi khwiloba aaba luume lwanyisisieo.