Read lubukusu Bakh. 7 Bible Online

Bakh. 7 - lubukusu bible

Bakh. 7

¹Endaalo ndala Gidioni ne babaandu bewe boosi benyokha makhelebeende mala bebuusia a Sebele eya Haroti: Ekambi eye Bamidiani yaba mu litooma ebunaswa siimbi ne lukulu lwa More.

²Wele Omunyali Owa Bioosi aboolela Gidioni ali, “Babaandu nibo oli ne nabo bali bakali lukali khwise khubakhola baule Bamidiani. Banyala bebaasia bali babeene nibo babaulile mala balobe khukhumba ese efuma.

³ Boolela babaandu oli, ‘yesi yesi oli omuri akhoya ache engo ne efwe khulekhala a Sikulu sia Kileati ano.’ ” Nio babaandu chielefu kamakhumi kabili ne kabili bakobola engo, ne chielefu likhumi bekhala.

⁴Nio Wele Omunyali Owa Bioosi aboolela Gidioni ali, “Osiili ne babaandu bakali lukali. Babukule obayile eluuchi mala ebweeneyo ese ndakhwaukhasiliamo. Ne khuboolela ndi omundu ache ne nawe ne akhache. Ne khuboolela ndi omundu se acha ne nawe tawe, ne se akhache tawe.”

⁵Gidioni abukula babaandu abekhisia eluuchi, mala Wele Omunyali Owa Bioosi amuboolela ali, “Yaukhasia buli sia mulala okamulila busa kameechi ne lulimi lwewe nga embwa, khukhwama khu buli sia mulala osikama asi khu masikamo kewe nio anywe.”

⁶Babaandu chimia chitaru baanyaka busa kameechi ne kamakhono mala ne bakamulila busa. Ne babaandu babaandi boosi basikama khu masikamo kabwe nio banywa.

⁷Wele Omunyali Owa Bioosi aboolela Gidioni ali, “Ndakhuonia mala khukhole oule Bamidiani ne babaandu chimia chitaru bakamulile busa kameechi. Boolela babaandu babaandi boosi bache engo.”

⁸Nio Gidioni abukula biakhulia biabo ba baaba ne bacha ne chikhoombi, abasibula bache engo wabwe niye aarama nende babaandu chimia chitaru echo. Ekambi eye Bamidiani yaba emwalo wabwe mwitooma.

⁹Siilo esio Wele Omunyali Owa Bioosi aboolela Gidioni ali, “Yinyokha wibwaakale ekambi eye Bamidiani, ese ndakhukhola oule.

¹⁰Ne waaba noli omuri khukhwibwakala, yiicha oche mu kambi no mukholi wowo Pura.

¹¹Olaulila niko balikho baloma, ne olanyoola kamaani ke khukhwibwaakala.” Nio Gidioni no mukholi wewe Pura beekha bacha khu ndulo khwe kambi yo musiku.

¹²Bamidiani, Baamaleki ne chikholo che mu sichiimi baba basalaniile mu litooma nga sipupu sie chisike mala baba ne chingamia chingali nga kumuyekhe khu sikiingi sie nyanja.

¹³Nga Gidioni ne ola aulila omundu ne alikho aboolela omusaale wewe ke kamarooro. Aba alikho aloma ali, “Ndoorire ndi kumukaati kwe eshayiri kupiringiikhe kwengila mu kambi eye Bamidiani mala kwekuba liiema liakwa mala liaba busa asi.”

¹⁴Omusaale wewe akobosia ali, “Eli embalu yo Muisiraeli, Gidioni okhwa Yoashi! Se sinyala siaba sisiindu sisiindi siosi siosi tawe! Wele amukholile akhukhile efwe Bamidiani ne banamae boosi.”

¹⁵Nga Gidioni ne aulila kamarooro ko mundu oyo ne liboola liako, akwa asi asikama mala asaaya Wele. Nio akobola mu kambi eye Baisiraeli mala aloma ali, “Yinyokha sikila Wele Omunyali Owa Bioosi alamukhola enywe muule banamae be Bamidiani.”

¹⁶Aabukhania babaandu chimia chitaru mu bipupu bitaru mala aelesia buli mundu ekhoombi ne chisaachi ne chinjaso mukari mwacho.

¹⁷Ababoolela ali, “Nga ne noola khu ndulo khwe kambi, ndoleelele mala nisio ese khola mwesi khola.

¹⁸Nga sipupu siase ne nase ne khupa chikhoombi chefwe, nono enywe mwesi khupa chichenywe ne mubotookhelela ekambi yoosi mala muyokele muli, ‘Khulwa Wele Omunyali Owa Bioosi ne khulwa Gidioni!’ ”

¹⁹Gidioni ne babaandu bewe chimia chitaru beecha khu ndulo khwe kambi ne sisikaale siise sikeekhe khukhwola chisa sita che silo enyuma we khukaluukhania baliindi be silo. Nio baapa chikhoombi mala barakaka chisaachi nicho abeele ne batilile.

²⁰Nio bipupu bibiindi bibili bioosi biakhola birio. Boosi batiila chinjaso chabwe mu mikhono kiabwe kimikhasi ne chikhoombi mu mikhono kiabwe kimiseecha mala bayokela bali, “Embalu eya Wele Omunyali Owa Bioosi nende eya Gidioni!”

²¹Buli mundu eema abuundu wewe babotookhelela ekambi, mala banamae bo musiku boosi belukha ne bakukuula burafu.

²²Ne nga babaandu ba Gidioni baba balikho baapa chikhoombi chabwe, Wele Omunyali Owa Bioosi akhola banamae basiku bebwaakalane babene ne babene buli mulala no kundi ne chimbalu chabwe. Banamae basiku chana belukha balola Beti-shita lubeka lwa Saretani boola e Beti-sua, boola khu lukoba lwa Abeli-mehola siimbi ne Tabati.

²³Nono, babaandu khukhwama mu kholo cha Nafutali, Asheri, nende bewa Manase boosi balaangwa barure, mala batimania Bamidiani.

²⁴Gidioni aruma barume mu ngulu cha Efuraimu choosi khuboola ali, “Yiikha mwiche mupane ne Bamidiani. Tiila kamafubukho ke luluuchi lwa Yoritani ne chinjichi khukhwola e Beti-bara khuliinda Bamidiani bakhambukha tawe.” Baefuraimu be siseecha balaangwa alala, mala batiila luluuchi lwa Yoritani ne chinjichi khukhwola Beti-bara.

²⁵Baamba babaami babili ba Midiani Orebu ne Seebu, berera Orebu a lwanda lwa Orebu, ne Seebu niio bakhamululilanga Endali eya Seebu. Bachiililila khutimania Bamidiani. Bareera kimirwe kia Orebu ne Seebu khu Gidioni owaba ne ali ebukwe owa Yoritani.