Read lubukusu Bakh. 8 Bible Online

Bakh. 8 - lubukusu bible

Bakh. 8

¹Nio Baefuraimu baboolela Gidioni bali, “Siina sisiakila ne okhakhulaanga nga wacha khu khuupana ne Bamidiani? Siina sikila ne okhukholela efwe kano?” Beng'ulung'unya burafu.

²Mala Gidioni aababoolela ali, “Niko ese kholile se kalekhaana nende niko enywe mukholile tawe. Akhaba matiiti niko enywe Baefuraimu mukholile kali ke bukhala khukhila niko be kumuliango kwase kwoosi.

³ Wele areerire Orebu ne Seebu, babaami be Bamidiani mu makhono kenywe. Ese ekholile siina ne khulekhaania nende niko enywe mukholile?” Nga ne aloma ario se baba lundi ne lirima tawe.

⁴Gidioni ne babaandu bewe chimia chitaru baba bechile khu luuchi lwa Yoritani mala abeele balwambukhe. Baba baluile lukali, ne baba basiitimania basiku Bamidiani.

⁵Nga boola e Sukoti, aboolela babaandu be mu lukoba ali, “Ne musiima eelesiakho babaandu babanondilekho bano kimikaati; sikila baluile, mala ese ndikho ndimania Seebu ne Salimuna babaami ba Midiani.”

⁶Ne babemeelesi ba Sukoti baloma bali, “Se waambile khale Seba ne Salimuna tawe mala wenya khuelesie banamae bowo kimikaati?”

⁷Nio Gidioni aloma ali, “Bulayi nono! Nga Wele Omunyali Owa Bioosi ne alara Seba ne Salimuna mu makhono kase, khamupile enywe kamawa ne lunani khukhwama mu sichiimi.”

⁸Gidioni ama ao mala achiililila ola e Penueli mala aaboolela babaandu be ebweeneyo nga aaboolela ba Sukoti.

⁹Nio aababoolela ali, “Ndikho nja mala nga ne ngobola ne esili omulamu mu muleembe, khatechule endeleelwa yenywe ngikwisie asi!”

¹⁰Seba ne Salimuna baba bali e Karikori ne banamae babwe. Khu banamae boosi be chikholo che bukwe, embi babaandu chielefu likhumi ne chiraano bong'ene ba baaba ne baramire. Banamae eelefu ndala ne kamakhumi kabili baba beriirwe.

¹¹Gidioni aniina achiila khu muyila kwe babaandu babamenyanga mu maeema ebukwe owa Noba ne Yokibea, mala bebwaakala banamae khulwe khubasiindusia busa.

¹²Babaami babili ba Midiani, Seba ne Salimuna, belukha, ne Gidioni abatimania mala abatiila. Lino liakila banamae Bamidiani bareenga.

¹³Nio Gidioni okhwa Yoashi akobola khukhwama mwiie, khubirira Heresi.

¹⁴Nga ola Heresi, atiila omusoleeli mulala khukhwama e Sukoti mala amureeba. Omusoleeli oyo aandikila Gidioni kamasina kamakhumi saba na saba ke babemeelesi ba Sukoti.

¹⁵Nio Gidioni acha khu baandu ba Sukoti mala ababoolela ali, “Mukhebulila nga ne mwalobile khukhunjeeta? Mwaboola muli se munyala mwambelesia siakhulia siosi siosi khu banamae baluile tawe, sikila abeele khatiila Seba ne Salimuna tawe!”

¹⁶Nio abukula kamawa ne lunani khukhwama mu sichiimi mala abirumikhira khuelesia babemeelesi ba Sukoti kumunaanio.

¹⁷Lundi atechula endeleelwa e Penueli mala eera babaandu be lukoba olwo.

¹⁸Nio Gidioni areeba Seba ne Salimuna ali, “Babaandu nibo enywe mweera e Tabori bali waena?” Bakobosia bali, “Baba bafwaana nga ewe. Buli mulala khu nibo aba afwaana busa nga omwana owo mwami.”

¹⁹Nio Gidioni aloma ali, “Baaba wandaayase be sisoleeli, babaana ba maayi. Nga Omwami Wele Omunyali Owa Bioosi ne amenyile mindali, abanga se mwabeera ta, andi ese se ndamwiira enywe tawe.”

²⁰Nono Gidioni aboolela Yeteri omusoleeli wewe omubele ali, “Chiililila obeere!” Ne omusoleeli se arusia embalu yewe tawe; aba ariire sikila abeele asili omwana.

²¹Nio Seba ne Salimuna baboolela Gidioni bali, ewe wamwene yiicha okhwiire sikila kamaani ko omundu kalekhaana no omwene. Nio Gidioni eera Seba ne Salimuna mala abukula kimikasa kikiaba mu makosi ke chingamia chabwe.

²²Enyuma wako Baisiraeli baboolela Gidioni bali, “Ba omwami wefwe, ewe ne lisaaye liowo no mwichukhulu wowo okhuonisie khukhwama khu Bamidiani.”

²³Gidioni akobosia ali, “Ese se ndaba omwami wenywe tawe, namwe omwana wase se alaba tawe. Wele Omunyali Owa Bioosi alamuruka enywe.

²⁴Lekha ese musabe enywe sisiindu silala. Buli mulala khwinywe ambelesie ese bipalakasa bie khu maru nibio mwabukuule.” (Bamidiani bafwaranga bipalakasa bie sahabu busa nga Baisimaeli.)

²⁵Baisiraeli bakobosia bali, “Khulaba ne bulekhuule khukhuelesia ewe.” Baala esuuka asi mala buli sia mulala araakho bipalakasa bie khu maru.

²⁶Bipalakasa bie sahabu nibio Gidioni asaba biaba embi busiro bwe chikiilo kamakhumi kabili ne bino se biaba alala ne kimikasa, ne chingubo chinapenda nicho babaami ba Midiani bafwaranga tawe, namwe chikaala chichaba mu makosi ke chingamia chabwe.

²⁷Gidioni akhola sifwaani sie sahabu eyo mala asira mu lukoba lwe mungo mwewe, lwa Ofira Baisiraeli boosi balekha Wele mala bacha Ofira khusaaya sifwaani esio. Sifwaani sino siaba kumureko khu Gidioni ne enju yewe.

²⁸Nio Bamidiani bakhilwa ne Baisiraeli mala se babariikhirisia lundi tawe. Sibala siaba ne kumuleembe khulwe kimiiko kamakhumi kane nabwila Gidioni ne afwa.

²⁹Yerubaali akobola mungo mwewe mala amenyamo.

³⁰Aaba ne babaana basoleeli kamakhumi kabili sikila aba ne bakhasi bakali.

³¹Lundi aaba no mukhasi okundi niye aamenyia busa nga omusaale mu Shekemu. Omukhasi oyo amusalila omwana omusoleeli mala amutiuukha lisina ali Abimeleki.

³²Gidioni okhwa Yoashi afwa busaakhulu, mala asiikhwa mu siliindwa sia raraawe Yoashi, e Ofira, mu lukoba lwe kumuliango kwa Abieseri.

³³Nga Gidioni ne afwa busa ari, babaandu ba Isiraeli, bakobola lundi basikamila Baali. Bakhola baaliberiti khuba wele wabwe.

³⁴Mala babaandu ba Isiraeli se bakhebulilakho wele wabwe, Wele Omunyali Owa Bioosi owabasikula khukhwama mu makhono ke basiku baabwe chimbeka choosi tawe.

³⁵Ne se babaakho ne busiime khunju eya Gidioni khu bulayi nibwo Gidioni akholela Isiraeli tawe.