Read lubukusu Bakh. 9 Bible Online

Bakh. 9 - lubukusu bible

Bakh. 9

¹Abimeleki okhwa Gidioni acha khu balebe ba maawe e Shekemu. Nga olayo ababoolela

²bareebe babaandu ba Shekemu bali, “Enywe murobora lilala siina? Ba okhwa Gidioni kamakhumi saba bamwaamie namwe omundu mulala? Khebulila muli Abimeleki ali owenywe lundi kamafuki kenywe.”

³Balebe ba maawe baboolela babaandu ba Shekemu kamakhuwa ako koosi, mala babaandu ba Shekemu bakhalaka khuloonda Abimeleki sikila aba omulebe wabwe.

⁴Bamua bitonyi bie fwesa kamakhumi saba khukhwama mu lukaangu lwa Baali. Chirupia chino aana nga kumuruuru khu baandu be sipoli lundi be situluungu mala baamuloondakho.

⁵Nio acha munju eya raraawe e Ofira mala erera bawandaaye be sisoleeli kamakhumi saba khu libaale lilala. Yotamu, wandaaye omusoleeli omutiiti owa Gidioni ekisa mala khwirwa tawe.

⁶Nio babaandu be chingoba cha Shekemu nende be mu sibala sie kimiliinda Beti-milo bebuusia alala mala bacha a murongooro kumukhoonge e Shekemu bamiia Abimeleki.

⁷Nga Yotamu aulila kakekholeekhe, acha eema khu ngaaki khwe sikulu sia Kerisimu mala apa luyoka ne ababoolela ali, “Enywe baandu ba Shekemu, ndekeresie, nio Wele yesi amurekeeresie enywe!

⁸Khaale kimirongooro kiebuusia alala khurobora omwami wakio, kiaboolela kumurongooro kumuseituni kili, ‘Ewe khwaamie efwe.’

⁹Kumurongooro kumuseituni khwakobosia kuli, ‘Enywe mwenya ese ndekhe khurusia kamafura kase karumikhanga khuelesia bawele, ne babaandu lukoosi mala emwamiie?’

¹⁰Nio kimirongooro kiaboolela kumurongooro kumutuli kili, ‘Ewe yiicha okhwaamie efwe.’

¹¹Ne kumutuli kwakikobosia kuli, ‘Ese ne mwaamiie aba nenyekhana ndekhe khurusia bibiaamo bilayi lundi binulu.’

¹²Nio kimirongooro kiaboolela kumusabibu kili, ‘Ewe, yiicha obe omwami wefwe.’

¹³Kumusabibu kwakobosia kuli, ‘Ese ne mwaamiia enywe, nenyekhana ndekhe khurusia endali ekholanga bawele ne babaandu basangaala.’

¹⁴Nio kimirongooro kioosi kiaboolela sichakha sie kamawa kili, ‘Ewe yiicha okhwaamie efwe.’

¹⁵Sichakha sie kamawa siakobosia sili, ‘Mwaaba ng'ali ne mwenya ese mbe omwami wenywe, yiicha mala mwikhale mu siiniini siase. Mwaba ne mukhakhola murio tawe, kumulilo kulaburukha khukhwama musakia chase che kamawa mala kwoosie kimirongooro kimitarakwa kia Lebanoni.’ ”

¹⁶Yotamu areeba babemeelesi ba Shekemu ali, “Enywe ng'ali mwabeele ne bung'ali ne bubweyikinwa nga mwakholile Abimeleki abe omwami wenywe? Mwakhebuliile khukholela Gidioni nende be enju yewe bulayi, nga sikholwa siewe ne siolana khukholelwa ku?

¹⁷Khebulila muli paapa wase amupanila enywe, aana bulamu bwewe khumuonia enywe khukhwama khu Bamidiani.

¹⁸Ne endaalo yino enywe mwakalukhaane khu be enju eya paapa. Mwerire basoleeli bewe, kamakhumi saba khu libaale lilala. Ne mwakholile Abimeleki, omwana owo mukholi owa Gidioni omukhaana khuba omwami amiie babaandu ba Shekemu; khubeela bali nga ne ali omulebe wenywe.

¹⁹Nono liaba nilio mukholile endaalo eya luno khu Gidioni ne khu be enju yewe lili lilieyikinwa lundi lia ng'ali sangaalila Abimeleki, mala mulekhe yesi amusangaalile enywe.

²⁰Ne liaba ne likhali lirio tawe, kumulilo kukhoya kuburukhe khukhwama khu Abimeleki mala kwoosie babaandu ba Shekemu nende be mu sibala sie kimiliinda Beti-milo; mala kwosie Abimeleki.”

²¹Nio Yotamu elukha acha amenya a Beeri sikila aba ariire Abimeleki wandaaye.

²²Abimeleki amiia Isiraeli khulwe kimiiko kitaru.

²³Nio Wele akhola Abimeleki ne babaandu ba Shekemu babiilana mala bamukaluukhanakho.

²⁴Wele akhola kano nio Abimeleki ne babaandu ba Shekemu, babamuramo kumwoyo khukhwira basoleeli ba Gidioni kamakhumi saba, banyoole kumuruungo kwe kamamayaanu kabwe.

²⁵Babaandu ba Shekemu bara babaandu khu sikulu khungaaki bekise mala bebwaakale Abimeleki, lundi banuula buli mundu owabira khu ngila yabwe. Abimeleki aboolelwa lino.

²⁶Nono Kaali okhwa Ebeti acha e Shekemu ne bawandaaye mala babaandu ba Shekemu baba ne lilieyikina mu niye.

²⁷Babaandu abo bacha mu mikuunda kiabwe babuusia kamatuunda ke kimisabibu bareera mala bang'oona endali mala baba ne naikara. Bacha bengila munju eya wele wabwe, niio baalia ne khunywa ne khukhoma Abimeleki.

²⁸Kaali aloma ali, Abimeleki niye nanu? “Efwe khuli babaandu ba lukano siina mu Shekemu? Siina sikila ne khukholela Abimeleki? Niye ali naanu? Okhwa Gidioni! Ne Sebuli amwamisiangakho kamalaka, ne efwe siina sikila ne khumukholela? Ria kuuka wenywe Hamori, owanjisia luuya lwenywe!

²⁹Mbanga bali ese owemelelela babaandu bano, andi narusiao Abimeleki! Nakhaboolele[18] Abimeleki nditasa banamae bowo mala olure enje upane liie.”

³⁰Sebuli omuruki we lukoba lwa Shekemu nga aulila kamakhuwa ka Kaali okhwa Ebeti aba ne bubeeleli bukali.

³¹Arumania[19] mu bwikisi babaandu khu Abimeleki ne aloma ali, “Lola Kaali okhwa Ebeti ne balebe bewe bechile mu lukoba mala balikho baachilisia babaandu be lukoba balekhe khu khuria ewe.

³²Nono ewe ne babaandu bowo baali ne nawe khe muche mukone mu mikuunda.

³³Mwinyokhe makhelebeende enyanga ne soa mala mwibwaakale lukoba khangu. Nga Kaali ne babaandu bewe barura mupane. Bape lukali nga munyala!”

³⁴Nio Abimeleki ne babaandu bewe boosi bacha silo mala bekisa enje wa Shekemu mu bipupu bine.

³⁵Nga Abimeleki ne babaandu bewe babona Kaali arura enje mala eema a silibwa sie lukoba olwo, benyokha niio baba ne bekisile.

³⁶Kaali ababona mala aboolela Sebuli ali, “Lola! Babaandu balikho bekha bama khu ngaaki khwe lukulu!” Nio Sebuli amukobosia ali, “Abo se bali babaandu tawe. Ebio bibiniini bie bikulu busa.”

³⁷Kaali aloma lundi ali, Lola! “Babaandu balikho beekha mu luongwa lwe sikulu becha, mala sipupu silala silikho siichila khu muyila kwe a murongooro kumukhoonge kwo mulakusi.”

³⁸Nio Sebuli aboolela Kaali ali, “Lilomaloma liowo lie khukhwilola khuboofu lili waena? Ewe se oli niwe owareebire oli sina sikila efwe ne khukholelanga omundu Abimeleki yuno? Abano bali babaandu nibo ewe walekelesienge! Nono rura oche upane ne nabo.”

³⁹Kaali arangirira babaandu ba Shekemu mala apana ne Abimeleki.

⁴⁰Kaali elukha mala Abimeleki amutimakho. Babaandu bewe bakali baumiia, yakhaba esilibwa e lukoba.

⁴¹Abimeleki amenya abuundu bali Aruma. Ne Sebuli arusia Kaali ne bawandaaye mu Shekemu mala khumenyayo lundi tawe.

⁴²Endaalo eloondakho Abimeleki amanya ali babaandu ba Shekemu baba balikho berekekha khurura bache mwiie,

⁴³Abukula babaandu bewe abakabukhasia mu bipupu bitaru mala ekisa mundaa. Nga ne abona babaandu ne barura mu lukoba ne becha, arura niio aba ne ekisile abeere.

⁴⁴Abimeleki ne sipupu siewe batima bacha bema a silibwa ne bipupu bibiindi bibili ebio biebwaakala babaandu ba baaba enje mu mikuunda mala biabeera boosi.

⁴⁵Bukhupani bwachiililila endaalo emuufu. Abimeleki ne babaandu bewe baamba lukoba, beera babaandu baalwo. Nio atechula lukoba chana mala aluchukhakho chumbe.

⁴⁶Nga babemeelesi be mu lukoba lwa Shekemu ne baulila kakekholekha, belukhila mu nju eya Eliberiti eyasirwa bulayi.

⁴⁷Abimeleki aboolelwa ali bengilemo.

⁴⁸Niye ne babaandu bewe baniina mu sikulu sia Salimoni embi ne Shekemu. Ebweeneyo abukula eaywa, arema lusakia khu murongooro, mala alura khwibeka. Aboolela babaandu bewe bakhole khangu nga niye akhola.

⁴⁹Nio buli mundu arema lusakia lwe kumurongooro, mala babaandu abo boosi baloonda khu Abimeleki mala babungikha chisakia a nju eya Eliberiti. Baambia enju eya Eliberiti mala boselia babaandu ba baabaamo boosi, mukari. Boosi bafwa eelefu ndala, bakhasi ne baseecha.

⁵⁰Nio Abimeleki acha khu lukoba lwa Tebesi alubotookhelela mala alubukula.

⁵¹Mukari mwe lukoba endeleelwa eye kamaani yabaamo, mala buli mundu mu lukoba omwo, elukhilamo. Beyikalila mukari mala baniina mu sisuli.

⁵²Abimeleki echa khukhwibwaakala endeleelwa. Acha emuliango khukhwosia endeleelwa eyo;

⁵³ nio mukhasi mulala apiringisiakho lususi lwamukwa khu murwe mala lwamwara siianga.

⁵⁴Alaanga khangu omwimeelesi owamusutilanga bulwaani mala amuboolela ali, “Rusia embalu yowo mala unjire. Se nenya babaandu balome bali omukhasi niye wanjira ese tawe.” Nio omwimeelesi oyo auna Abimeleki lifumo afwa.

⁵⁵Nga Baisiraeli ne babona bali Abimeleki afwiile, boosi bakobola engo.

⁵⁶Mungila yino Wele aruunga Abimeleki kamamayaanu niko akholela raraawe nga ne eera bawandaaye kamakhumi saba.

⁵⁷Lundi Wele akhola babaandu ba Shekemu banyoola butinyu khu mamayaanu kaabwe, nga Yotamu, okhwa Gidioni, ne abalaama.