Read lubukusu 2 Yn. 1 Bible Online

2 Yn. 1 - lubukusu bible

2 Yn. 1

¹Ese omwimeelesi — khu mukhaaye omukoosi ne babaana bewe, nibo nasiima mu bung'ali. Ne se ndi seng'ene tawe, ne naabo boosi bamanyile bung'ali bamusiima enywe,

²sikila bung'ali buli mwifwe mala bulaba nafwe mindali.

³Lekha Paapa Wele ne Yesu Kristo, oli Omwana owa Paapa, bakhuelesie efwe kumwalaalo ne siisa, ne kumuleembe, bibe bibiefwe mu bung'ali ne mu busiime.

⁴Naba omusangaafu lukali khunyoola balala khu baana bowo ne bamenyile mu bung'ali nga Paapa ne akhulakiilisia.

⁵ Ne luno, omukhaaye khusaba ewe ndi, lekha fwesi khusiimane buli mulala nowasie. Se ndikho khuandikila lilaka liya tawe; lili lilaka nilio khwaba nalio khukhwama khale.

⁶Busiime buli bali khumenye mu khuloonda kamalaka ka Wele. Lilaka nga mwesi ne mwaulila khukhwama mu khurakikha, lili bali mweesi khukhwola mumenye mu busiime.

⁷Babeeyi bakali bamalile khucha mu sibala siosi, babaandu bakhafukiilila bali Yesu Kristo echa nga omundu tawe. Omundu nga oyo ario ali omubeeyi lundi Omusiku owa Kristo.

⁸Mube meso, nio mulekhe khutibia nisio mwakholela kimilimo, ne mulanyoola kumuruuru kwenywe mu bwichufu.

⁹Omundu yesi yesi obiriirira kamekisio ka Kristo ne khulekha khu kamenyamo tawe, se ali ne Wele tawe. Ne oyo omenya mu mekisio ka Kristo aba ali ne Paapa no Mwana boombi.

¹⁰Nono, omundu yesi yesi ne echa okhekisia liliekisia lino tawe, mukhamwakaanila mu chingo chenywe tawe, namwe mwamukheesia tawe.

¹¹Sikila yesi yesi owenyela omundu lukano luno kumuleembe, aba yesi afukiilisiana naye mu mamayaanu niko omundu oyo akholanga.

¹²Ndi ne kamakali ke khu muboolela, ne se nyala khu kaboolela khu karatasi ne bubwino tawe; ne kakhali, ndola ndi ndamukeniia enywe nio ndomalome nanywe moni na moni, nio khusangaale mu bwichufu.

¹³Babaana bo mukhaana wenywe omukoosi bamurumiire enywe kimileembe kiabwe.