Read lubukusu 3 Yn. 1 Bible Online

3 Yn. 1 - lubukusu bible

3 Yn. 1

¹ Ese omwimeelesi — khu mukoosi wase Kayo niye nasiima mu bung'ali.

²Omusaale wase omukoosi, khusabila ndi buli siindu sibe silayi khwiwe lundi obe omulamu. Manyile ndi oli omulamu mu roho.

³Nasangaala lukali nga balala khu bawandaayefwe bakristo ne boola mala bamboolela nga ne oli omusuubilwa khu bung'ali, nga buli lwoosi nomenyanga mu bung'ali.

⁴Se siliio sisisiimisia lukali khukhila khuulila bali babaana base bamenyile mu bung'ali tawe.

⁵Omusaale wase omukoosi oli omusuubilwa khu milimo nikio okholelanga bakristo basio, akhaba ne bali bakeni.

⁶Baboolela e kanisa kamakhuwa ke busiime bwowo. Nosiima bayeete bachiililile ne lukeendo lwabwe mu ngila ekhasiimisie Wele.

⁷Sikila barakikha lukeendo lwabwe khu milimo kia Kristo, ne bakhafukiililakho buyeeti bwosi bwosi khukhwama khu baandu bakhasuubila tawe.

⁸Efwe bakristo nono, khukhwola khuyeete babaandu bano, nio khusaange mu milimo kiabwe khulwe bung'ali.

⁹Naandike ebarwa enyiimbi khu kanisa; ne Tioturefe, owenyanga khuba omwimeelesi wabwe, mala se eenya khurekeeresia niko mboola tawe.

¹⁰Nga ne ndecha, ndalomaloma koosi niko akholile, kamabi niko alomaloma khwifwe ne bubeeyi nibwo aboolanga! Ne se kali ako kong'ene tawe; se akaanilanga bawandaayefwe Bakristo nga ne bechanga tawe, ne lundi akhingiililanga abo babenyanga khubakaanila, ne khukhaka khubaoona barure mu kanisa!

¹¹Musaale wase omukoosi, okhaloonda kamabi tawe, ne kakhali loonda kamalayi. Yesi yesi okhola kamalayi aba ali owa Wele; yesi yesi okhola kamabi aba akhaabonakho Wele tawe.

¹²Buli mundu alomanga khu bulayi bwa Demetirio; bung'ali bubwene bulomanga bulayi bwewe. Ne sesi ndasakho khuboola buloli bwewe, ne ewe omanyile oli buloli bwase buli bwa ng'ali.

¹³Ndi ne kamakali khukhuboolela, ne kakhali se nenya khukhola ndio ne kalamu ne bubwino tawe.

¹⁴Ndi suubi khu khubona bwangu, nio khulomalome moni na moni.

¹⁵Kumuleembe kube nawe. Basaale bowo boosi bakhurumire ewe kimileembe. Kheesia basaale befwe boosi moni na moni.