Read lubukusu Yudi 1 Bible Online

Yudi 1 - lubukusu bible

Yudi 1

¹ Ese Yudi, omukholi owa Yesu Kristo, lundi wandaaye owa Yakobo Khwaabo nibo Wele aalanga, bamenyile mu busiime bwa Paapa Wele ne mu buliindi bwa Yesu Kristo:

²Nyoola siisa sia Wele, kumuleembe ne busiime mu bwichufu.

³Basaale base bakoosi, nakholanga kamaani khumuandikila kamakhuwa ke buonia nibwo khuli nabwo, nga ne neulila ndi nenyekha mbaandike ebarwa khangu khumutinyilisia enywe mu khupanila lisuubila nilio Wele aelesia khale babaandu bewe.

⁴Sikila babaandu balala bakhamanyile Wele tawe, baakhwichilemo mu bwikisi, babaandu bayuusia elomo eye kumwalaalo kwa Wele wefwe nio bachiililile khukhola ke sifwaabi ne khuloba Yesu Kristo, oli yeng'ene Omwami lundi Wele wefwe. Kamaandiko kang'oola khaale siiukuumo nisio bakhanyoole.

⁵ Akhaba ne mumanyile kano koosi, nenya khubakhebusia nga Omwami aareesia Baisiraeli ne khubarusia mu Misiri, ne kakhali ekhumaliilikha aabunia bakhasuubila tawe.

⁶Khebulila malaika bakhanyalikha ne bunyali bwabwe bwa ng'ali tawe, ne kakhali baalekha bumenyo bwabwe. Baabowa kiminyololo kia mindali na mindali aasi mu siilima, niio Wele aababiikha khukhwola khu Ndaalo emboofu niyo bakhakhalakilwekho.

⁷ Khebulila Sodomu ne Komora, ne chingoba che aembi, che babaandu babakhola nga malaika abo bakhola ne khukhwiyingisia mu bukhobani ne sifwaabi. Banyoola siiukuumo sie kumulilo kwa mindali nga sisiekesio sia abuwaanga khu boosi.

⁸Mu ngila ng'ene eyo, babaandu bano bali ne kamalola kabakhola ne bakhola bubwoni mu mibili kiabwe; balekelesia bunyali bwa Wele ne khukhoma bibuumbe bie luyali bili angaaki.

⁹ Akhaba malaika omukhulu Mikaili se akhola kano tawe. Mukhulomaloma khwewe ne Sietani, nga bayinganilanga khu mubili kwa Musa, Mikaili se aakhalakila Sietani khu mukhoma tawe, ne kakhali aloma ali, “Wele omwene akhurafwire!”

¹⁰Ne kakhali babaandu bano beela mu khukhoma sisiindu siosi siosi nisio bakhamanyile tawe; ne bibiindu nibio bamanyile mu ngila eye kumwiima, nga eye chisaang'i che mundaa, bino nibio bibiindu bibieene bibabunia.

¹¹ Bali ne silaamo! Baloondile engila niyo Kaini aabirirakho. Chirupia chakilile beyingiisie mu mabi niko Balamu aakhola. Bakholile sileka nga Kora ne aakhola mala bosi babunile nga niye.

¹²Ne luyoka lwabwe bukhalimo chisoni tawe, bali nga kamarokondo ke buchafu mu naikara chenywe che kumuleembe. Beyibaasia busa babeene lundi bali nga kamafuumbi niko ekhuungu euucha ne se kareera efula tawe. Bali nga kimirongooro kikhaama kamatuunda akhaba mu siise siakio tawe. Bali nga kimirongooro kikiakhuulwa ne kimili kiakio lundi bafwiile sio.

¹³Bali nga bibuli bie kamaani khu nyanja, ne bikholwa biabwe bie chisoni bibonekha nga lifuro. Bali nga ching'enieesi chiyiiya-yiiya, nicho Wele aabiikhila abuundu we sisiilima siboofu po!

¹⁴ Enoka owaba owe selukho ekhola saba khukhwama khu Adamu, ang'oola khaale kano khu nibo ali, “Rekeeresia! Omwami akheeche ne malaika bewe batakatifu chielefu,

¹⁵khukhalakila babaandu boosi, ne khuukuuma boosi khulwe bikholwa biikhali bie buwele nibio bakhola lundi khulwe kamakhuwa kamabi koosi niko babaandu bakhamanyile Wele tawe balomaloma khuloondekhana naye!”

¹⁶Babaandu bano busiele belung'unya ne khubiiya babaandi. Baloonda liliekoomba liabwe libi embakha yabwe eye khukhwebonia ne khukhwalisia lulimi khu baandi, nio banyoole nisio benya.

¹⁷Ne kakhali enywe, basaale base khebulila niko mwaboolelwa khaale ne barumwa bo Mwami wefwe Yesu Kristo.

¹⁸ Bamuboolela enywe bali, “Nga chindaalo chimaliilisi ne chiliola, babaandu baliicha bali mukholela enywe sienya meno, babaandu baloonda liliekoomba liabwe likhali lie buwele tawe.”

¹⁹Bano nibo babaandu bareera liliabukhana, baloonda busa liliekoomba lie kimibili kiabwe, bakhali ne Roho tawe.

²⁰Ne kakhali enywe, basaale base, khemuchiililile khukhwiyombakha mu lisuubila litakatifu lukali. Khemusabile mu bunyali bwa Roho Omutakatifu,

²¹lundi mwebikhe mu busiime bwa Wele, nga ne mu silindiilila Omwami wefwe Yesu Kristo mu siisa siewe amuelesie enywe bulamu bwa mindali.

²²Kholela siisa abo bakhali nasuubi mwisuubila tawe,

²³yulakho balala, mubaonie khukhwama mu mulilo; ne khu baandi bakhoolele siisa ne buuri, ne kakhali biila chingubo chabwe chilikho kamarokondo ke liliekoomba liabwe lie bubwoni.

²⁴Khuyo onyala khumuliinda enywe nio mukhakwa tawe ne khumureera enywe mu buluungi ne khukhwikhoyela ebweeni we khubao khwewe khwe luyali

²⁵khu Wele yeng'ene Omuonia wefwe, abe owe luyali, Omukali, Omunyali Owa Bioosi ne bunyali khubirira mu mwami wefwe Yesu Kristo khukhwama khaale ne naluno, nende buli lwoosi. Amina.