Read lubukusu Lif. 1 Bible Online

Lif. 1 - lubukusu bible

Lif. 1

¹Sitabu sino sili kamakhuwa ke bibiindu nibio Yesu Kristo afuunula. Wele aamuelesia niye lifunulwa lino nio naye ekesie bakholi bewe kamakhuwa kaali siimbi khukhwekholekha, Kristo aakhola bibiindu bino biamanyikha khu mukholi wewe Yoana khulwe khumurumira malaika,

²mala Yoana aaboolile bioosi nibio aabona. Lino nilio liboola liewe khuloondekhana ne burume bubwama khu Wele ne bung'ali bubwafuunulwa ne Yesu Kristo.

³Omundu osoma sitabu sino aabiitwa chikhabi, lundi barekeeresianga kamakhuwa ke bung'oosi bwe burume buno, mala baria kakaandikwa mu sitabu sino babiitwa chikhabi! Sikila siise sie bibiindu bino khukhwekholekha sili siimbi.

⁴ Kimileembe khukhwama khu Yoana kicha khu chikanisa saba mu sibala sia Esia: Kumwalaalo ne kumuleembe khukhwama khu Wele omenyile mindali, owabao lundi okheeche, khukhwama khu roho saba baali ebweeni we Ndebe yewe eye bubwami,

⁵ lundi khukhwama khu Yesu Kristo omuloli omusuubilwa, owe khunyoa mukhulamusibwa khukhwama mu bafu lundi ooli omuruki owe babaami be sibala bibe nanywe. Aakhusiima efwe, ne khulwe lifwa lie khukhwerusia aakhuonia efwe khukhwama mu bwoni bwefwe;

⁶ mala aakhukhola efwe khuba basaayi khukhalabanila Wele wewe ooli Paapa wewe. Luyali ne bunyali bibe khu Yesu Kristo mindali na mindali! Amina.

⁷ Lola, alikho echela mu maleesi! Buli mundu alamubona, bakhaba abo ba bamuunanga. Babaandu boosi khu sibala bakhalile ne khukhwiunamila. Mala kaliba kario.

⁸ Omwami Wele Omunyali Owa Bioosi, aloma ali, “Ese we khunyoa lundi omumaliilisi,” oliio, owabaao lundi okheeche.

⁹Ese Yoana, wandaayenywe, lundi ooli omuloondi wa Yesu, ese ndi omusaangi wasienywe mu lifwiilisia khulwe khukhwekhaliilikhila siibi sisiichanga khwaabo bali be Bubwami bwewe. Namwaatwa khu sibala sisiakarwa ne kameechi sia Patimo, sikila naba nelwachile elomo eya Wele, ne bung'ali nibwo Yesu afunula.

¹⁰Khu ndaalo yo Mwami naba mu Roho, mala naulila kumumilo kwe angaaki kukwauliilikha nga ekhoombi, ne kulomaloma enyuma wase.

¹¹Kwaloma kuli, “Aandika mu sitabu niko olikho obona mala oyile mu chikanisa saba mu ngoba chino: Efeso, Simina, Perikamo, Siatira, Sarite, Filatelefia ne Laotikia.”

¹²Nekhebukha mbone olikho oolomaloma khwise, mala nabona biteetwe bie chitaa saba bie sahabu,

¹³ ne akari wabio aabao mulala ofwaana nga Omwana wo mundu afwarire ekaanjo endeeyi eyoola aasi khu bikhandakilo biewe, lundi aaba eboyile kumusiipi kwe sahabu khu sifuba siewe.

¹⁴ Lichuune liewe liaba liwaanga chwe nga bufuumbo buwaanga, ne chimoni chewe chaba nga chinjaso che kumulilo;

¹⁵ bikele biewe biang'enang'ena nga kumukasa nikwo boselia mu mulilo baapilila ne khumiuusia, ne kumumilo kwewe kwauliilikha nga kameechi ke mwikhupo ne kaoloola.

¹⁶Asuta angaaki ching'enieesi saba mu mukhono kwewe kumuseecha, ne mbalu enjoki chimbeka chombi yama mukhanwa mwewe. Bubweeni bwewe bwakhosia nga enyanga.

¹⁷ Nga namubona, nakwa mu bikele biewe nga omufu. Andaakho kumukhono kwewe kumuseecha mala amboolela ali, “Okharia tawe! Ese ndi owe khunyoa lundi omumaliilisi.

¹⁸Ese ndi omulamu! Naba nafwa, ne luno ndi omulamu mindali na mindali. Ese ndi ne bunyali khu lifwa ne khu sibala sie bafu.

¹⁹Nono, andika bibiindu nibio olikho obona, alala ne bibiindu biliio luno ne bilikho bicha khwikholekha.

²⁰Sino sili sifuno sisiakukhuulilwa sie ching'enieesi saba nicho oboone mu mukhono kwewe kumuseecha, ne biteetwe saba bie sahabu bie chitaa: ching'enieesi saba, chili malaika be chikanisa saba, ne biteetwe saba bili chikanisa saba.