Read lubukusu Lif. 10 Bible Online

Lif. 10 - lubukusu bible

Lif. 10

¹Nio nabona malaika okundi owe kamaani ekha aasi khukhwama mwikulu. Aaba aboelwe mu lifuumbi, ne lufutu lwamukarire khu murwe kwewe; mumoni mwewe mwaba nga enyanga, ne bikele biewe biaba nga chinjeko che kumulilo.

²Aaba ne sitabu sitiiti sibambulwe mukhono mwewe. Aswaala sikele siewe siseecha khu nyanja, ne sikele siewe siikhasi khu sibala,

³mala alaanga ne kumumilo kumuboofu kukwauliilikhana nga liiulukhuma lie chitalang'i. Nga amala khulaanga, libalukha saba liakobosia ne liiulukhuma.

⁴Ne nga libalukha saba liauliilikha, naba nenya khuandika, ne kakhali naulila kumumilo khukhwama mwikulu ne kuloma kuli, “Ra mu mwoyo nga esiiri niko libalukha saba liboolile. Okhakaandika aasi tawe.”

⁵ Nio, malaika niye nabona ne emile khu nyanja ne khu sibala asuta kumukhono kwewe kumuseecha kwalola mu ngaaki

⁶ne echuba mwisina lia Wele, olimenya mindali na mindali, owabuumba likulu, sibala, ne nyanja nende buli siindu silimo. Malaika aloma ali, “Se khulaba lundi ne liiayilila tawe!

⁷Ne kakhali nga malaika okhola saba ne apa ekhoombi yewe, aba Wele alamaliilisia lirekekha liewe lie mu bwikisi, nga ne aaboolela bakholi bewe, bang'oosi.”

⁸ Nio kumumilo nikwo naba ne mbulile ne kulomaloma khukhwama mwikulu kwamboolela ese kuli, “Cha obukule sitabu sibambulwe siili mu mukhono mwa malaika owimile khu nyanja ne khu sibala.”

⁹Nacha khu malaika na musaba ambelesia khatabu khatiiti akho, mala amboolela ali, “Khabukule mala okhalie; khalaba khalulu munda mwowo, ne mukhanwa mwowo khalaba khanulu nga bubuukhi.”

¹⁰Nabukula khatabu khatiiti chana khukhwama mukhono mwewe mala nakhalia; mala khaba khanulu nga bubuukhi mukhanwa mwase. Ne nga ne nakhamila, khaba khalulu munda mwase.

¹¹Nio naboolelwa ndi, “Khukhwola lundi oboole burume bwa Wele khu kholo chingali, ne babaandu be chinomo chingali ne babaami.”