Read lubukusu Lif. 11 Bible Online

Lif. 11 - lubukusu bible

Lif. 11

¹ Nio naebwa lusaala lulwaba nga lusaala lwe khupiima, mala naboolelwa ndi, “Cha opiime Lukaangu lwa Wele ne alutare, mala obale abo balikho ne basaaya mu Lukaangu.

² Ne okhapiima luuya luuli enje we Lukaangu tawe, sikila lwaanwa khu Be Chikholo, bakhetuye khu Lukoba lutakatifu khu miesi kamakhumi kane na kibili.

³Kharume baloli base babili ba befwarire kamakunia, mala bakhaboole burume bwa Wele khu ndaalo e elefu ndala ne chimia chibili ne kamakhumi sita echo.”

⁴ Baloli babili abo bali kimiseituni kibili ne chitaa chibili chicheema ebweeni wo Mwami owe sibala.

⁵Ne omundu yesi yesi aaba nakhaka khubanyaasia nibo, kumulilo kukharure mukhanwa mwabwe khubunia basiku babwe; ne mu ngila ng'eneyo yesi yesi okhaka khubanyaasia akheerwe.

⁶ Bali ne bunyali khukhwikala likulu nio efula elekhe khukwa mu sise nisio belwachilamo burume bwa Wele. Lundi bali ne bunyali khu sebele choosi khuchikaluukhasia chibe kamafuki; lundi bali ne bunyali khureera lufu lwa buli lukano mu sibala siise siosi siosi.

⁷ Ne bakhamale khukhwilwacha burume bwabwe, kusaang'i kuliama mwiloo likhali ne sisiakamo tawe, kuliipana nabo. Kulibakhila mala kubeere,

⁸ ne kimibili kiabwe kimifu kiliba khu ngila che lukoba luboofu niio Omwami wabwe abaambilwa. Lisina lie lukoba olwo mu khulufwaananisia lulaangwa bali Sodomu, namwe Misiri.

⁹Babaandu khukhwama mu bibala bioosi mu kholo choosi, chinomo ne babaandu khukhwama buli abuundu balilola khu mibili kiabwe kimifu khu ndaalo chitaru ne nusu mala se balibafukiilila nibo bakisiikhe tawe.

¹⁰Babaandu be sibala baliba ne busangaafu sikila lifwa lie babaandu babili bano. Baliekhoya ne khurumanila biianwa, sikila bang'oosi babili abo bareera buchuuni bukali khu baandu.

¹¹ Enyuma we chindaalo chitaru ne nusu kumuuya kuaana bulamu kwecha khukhwama khu Wele ne khubengilamo, mala benyokha; ne boosi ba babona banikina lukali.

¹² Bang'oosi babili chana abo baulila kumumilo kumuboofu khukhwama mwikulu ne kubaboolela kuli, “Niina mwiche ano!” Bachiila mu lifuumbi baniina mwikulu basiku babwe ne ba baloleleele.

¹³ Mu siise siene esio literema lie sibala likali liabao. Sitonyi silala khu bitonyi ekhumi bie lukoba bionakwa, mala babaandu chielefu saba beerwa. Babaandi bareenga mala bafumia bukali bwa Wele owe mwikulu.

¹⁴Sinyaasio sia khabili siawele, ne kakhali sinyaasio sia khataru silikho siicha khangu!

¹⁵ Nio malaika owa saba aapa ekhoombi yewe, mala kimimilo kimiboofu kiauliilikha mwikulu, ne kiloma kili, “Bunyali khukhwamiia sibala bwama khu Mwami ne Kristo wewe, mala aliamiia mindali na mindali!”

¹⁶Nio basaakhulu kamakhumi kabili na bane babekhaale khu ndebe chaabwe che bubwami ebweeni wa Wele, bakwa mafumala mala basaaya Wele,

¹⁷ne baloma bali: “Omwami Wele Owe Bunyali Bwoosi, oliio lundi owabao! Khu khupila orio nga obukuule bunyali bwowo bukali, mala warakiikhe khukhwamiia!

¹⁸ Babaandu be sibala bechuule bukhalafu sikila siise sie lirima liowo siolile, siise sie khukhalakilakho bafu. Siise siolile sie khuelesia bakholi bowo bang'oosi kumuruuru, ne babaandu bowo boosi, boosi ba bakhuria, babenyalila nende bakhenyalila sitube, siise siolile sie khubunia abo babonaka sibala!”

¹⁹ Lukaangu lwa Wele mwikulu lwekulwa, mala Lisanduku lie Ndakaano liabonekhamo. Nio liburukha lie chimbeni liabao, litirira ne khubalukha khwe fula, literema lie sibala, ne kamaarara kamakali.