Read lubukusu Lif. 12 Bible Online

Lif. 12 - lubukusu bible

Lif. 12

¹Nio, libonekha liboofu lundi lie kamakana liabonekhana mu ngaaki. Omukhasi aabaao, engubo yewe yaba enyanga lundi aaba ne kumwesi aasi we bikele biewe, ne kuutwa eye ching'enieesi ekhumi na chibili khu murwe khwewe.

²Aaba siimbi khusaala, ne buchuuni bwe khulumwa bwakila niye aalila.

³ Sisiindu sie kamakana sisiindi sia bonekha mu ngaaki. Kuremu kubesemu kwabao, kwaba ne kimirwe saba ne chinjika ekhumi, kwaba ne kuutwa khu buli murwe kwakwo.

⁴ Ne kumukhiinga kwakwo kwarusia sitonye silala khu bitaru sie ching'enieesi khukhwama mu ngaaki, mala kwachimwaata khu sibala. Kwema ebweeni wo mukhasi chana oyo, nio kulindiilile omwana khusaalwa mala kumulie.

⁵ Nio omukhasi oyo, aasaala omwana omusoleeli oliamiia chikholo choosi ne esiimbo eye sichuuma. Omwana chana ayuulwa mala ayilwa khu Wele, ne khu ndebe yewe eye bubwami.

⁶Nio omukhasi elukha acha mu sichiimi, abuundu niio Wele aaba ne amurekekheele, niio akhaliindwe khu ndaalo e elefu ndala ne chimia chibili ne kamakhumi sita.

⁷ Nono, liie liaba mwikulu. Mikaili ne bamalaika bewe bapana ne kuremu ne bamalaika bakwo;

⁸ne kakhali kuremu kwaulwa, ne bamalaika bakwo se bafukiililwa khumenya mwikulu lundi tawe.

⁹ Kuremu kuboofu chana kwamwaatwa aasi, kuremu kwe khaale okwo, kulaangwa bali Omumayaanu, namwe Sietani, kukwabeanga sibala sioosi. Kwamwaatwa khu sibala, ne bamalaika bakwo boosi.

¹⁰ Nio naulila kumumilo kumuboofu mwikulu ne kuloma kuli, “Luno buonia bwa Wele bwechile! Luno Wele ekeesie bunyali bwewe nga Omwami! Luno Kristo wewe ekeesie bunyali bwewe! Sikila oyo owema ebweeni wa Wele wefwe mala asitaka bawandaayefwe kumuusi ne siilo, amwaatilwe, khukhwama mwikulu.

¹¹Bawandaayefwe bamukhila niye khulwe kamafuki ke Limeeme ne khulwe bung'ali nibwo belwacha; lundi baba berusia khuana bulamu bwabwe ne khufwa.

¹²Ne ewe, likulu sangaala, ne nanywe mweesi mu menyilemo! Ne kakhali silaamo sili khu sibala ne nyanja! Sikila Omumayaanu ekhile mwinywe, mala ali omukhalafu, sikila amanyile ali aramire ne siise sitiiti.”

¹³Nga Kuremu chana kwakhebulila kuli kwamwaatiilwe khu sibala, kwarakikha khutimania omukhasi owaba ne asaalile omwana omusoleeli.

¹⁴ Ne kakhali omukhasi oyo aebwa chindaa chibili che efuruusi emboofu, nio apurukhe ache abuundu wewe mu sichiimi, niio aliliindwa khu miiko kitaru ne nusu, aliindwe bulayi kuremu kukhamwibwaakala tawe.

¹⁵Kuremu kwakhaasa kameechi nga luluuchi khukhwama mukhanwa mwakwo khuloonda khu mukhasi chana, kamwire.

¹⁶Ne kakhali sibala siayeeta omukhasi oyo; siasama kumunwa kwasio mala siamila kameechi kakaba ne kechile khukhwama mukhanwa mwe kuremu.

¹⁷Kuremu chana kwakhalalila omukhasi oyo, mala kwacha khu khupana ne lisaaye lio mukhasi oyo lioosi nende abo boosi babaria kamalaka ka Wele ne basuubili khu bung'ali bubwafuunulwa ne Yesu.

¹⁸Mala kuremu okwo kwema khu sikiingi sie nyanja.