Read lubukusu Lif. 13 Bible Online

Lif. 13 - lubukusu bible

Lif. 13

¹ Nio nabona esaang'i yama mu nyanja. Yaba ne chinjika ekhumi ne kimirwe saba, ekuutwa yaba khu buli lwiika, ne khu buli murwe khwayo lisina liabakho lie khukhoma Wele.

² Esaang'i chana yafwaana nga engwe, ne bikele biafwaana nga bikele bie ling'u ne kumunwa nga kumunwa kwe talang'i. Kuremu kwaelesia esaang'i kamaani kakwo, endebe eye bubwami bwakwo, ne bunyali bwakwo bukali.

³Kumurwe kwe esaang'i mulala kwaba ne mbala eye likuma liboofu, ne likuma elio liaba liaonile. Sibala sioosi siauka mala sialoonda khu saang'i chana.

⁴Buli mundu osaaya kuremu chana, sikila yaba kwaelesia esaang'i bunyali. Akhaba lundi babaandu basaaya esaang'i bosi baloma bali, “Naanu oli nga esaang'i? Naanu onyala apana nayo?”

⁵ Esaang'i chana yaebwa kumunwa khuloma ke khukhwefumia eng'ene ne khukhoma Wele, mala yafukiililwa khuba ne bunyali khu miesi kamakhumi kane na kibili.

⁶Yarakikha khulaama Wele, lisina liewe, abuundu niio amenyile, nende abo boosi bamenyile mwikulu.

⁷ Yafukiililwa khu khupana ne babaandu ba Wele ne khubaula, lundi yaebwa bunyali khu buli luuya, ekholo, lulomo, ne babaandu babaandi.

⁸ Babaandu boosi bamenyile mu sibala bakhakisaaye, khurusiakho abo nibo kamasina kabwe kaandikwa mu sitabu sie bulamu sie Limeeme lilieerwa sibala ne sikhabaang'anwa tawe.

⁹“Rekeeresia nono, omundu aaba ne ali ne kamaru khaulile!

¹⁰ Yesi yesi okhoyeele khuambwa ng'ali akhaambwe; oyo okhoyeele khukhwirwa ne mbalu akheerwe ng'ali ne mbalu. Kano kenya liliekhaliilikha ne lisuubila khu baandu ba Wele.”

¹¹Nio nabona esaang'i ekiindi yama aasi mwiloba. Yaba ne chinjika chibili nga chinjika che Limeeme, lundi yalomaloma nga kuremu.

¹²Yarumikhira bunyali bukali bwe esaang'i eye khunyoa, ebweeni wayo, yayingiilila sibala nende abo boosi bamenyilemo basaaye esaang'i eye khunyoa, eye likuma liliaba ne liionile.

¹³Esaang'i eya khabili yino yakhola kamayia ke khuukia; yakhola kumulilo kwekha khukhwama mwikulu kwola khu sibala ebweeni wa buli mundu.

¹⁴Lundi yabea babaandu boosi bamenyile khu sibala mu ngila eye kamayia niko yafukiililwa khukhola ebweeni we esaang'i eye khunyoa. Esaang'i yaboolela boosi khukhwombakha sifwaani khulwe khuana lukoosi khu saang'i yaba ne remirwe ne mbalu mala yaba esiili enamu.

¹⁵Esaang'i eya khabili yafukiililwa khuela kumuuya kwe bulamu mu sifwaani sie saang'i eye khunyoa, nio sifwaani sinyale khulomaloma mala siire abo boosi bakhenya khusisaaya nisio tawe.

¹⁶Esaang'i chana yayingilila babaandu boosi, batiiti ne bakhoongo, baiinda ne bataambi, nasioobi ne balekhuule, khura simanyisio khu mikhono kiabwe kimiseecha namwe khu bweni bwabwe.

¹⁷Se aabaao akhaba mulala owanyala khukula namwe khukusia nakhali ne simanyisio sino tawe, lili, lisina lie saang'i namwe enamba eboola lisina liayo.

¹⁸Lino lienyekhana limanya. Yesi yesi oli omukesi anyala akanakana sifuno sie namba eye saang'i yino. Sikila enamba yino yimeelela lisina lio mundu. Enamba yino eli 666.