Read lubukusu Lif. 14 Bible Online

Lif. 14 - lubukusu bible

Lif. 14

¹ Nono nalola, mala nabona Limeeme liemile khu Sikulu sia Sayuni; liaba ne babaandu emia ndala ne kamakhumi kane na bane ba baaba ne lisina liewe nende lia Raraawe liliaandikwa khu bweeni bwabwe.

²Lundi naulila kumumilo khukhwama mwikulu kukwauliilikha nga khuoloola khwe kameechi ke mwikhupo, nga khubalukha khwe fula khukali, lundi khwauliilikha nga kimienya kie bakhupa ka matuungu, ne baapa kamatuungu kabwe.

³Babaandu chana emia ndala ne kamakhumi kane na bane abo bema ebweeni we ndebe eye bubwami, bibuumbe bine bilamu, ne basaakhulu; baba balikho bemba kumwenya kumuya. Se aabao onyala eyika kumwenya okwo tawe, ne kakhali babaandu emia ndala ne kamakhumi kane na bane abo ba baaba ne baonisibwe khukhwama khu sibala.

⁴Bali babaandu babeliinda mu bukwalaafu se bakholanga sifwaabi ne bakhasi tawe; sikila baloba bakhasi. Baloondanga khu Limeeme buli niio licha. Baonisibwe khukhwama khu baandu babaandi boosi mala bali be khunyoa khuanwa khu Wele ne khu Limeeme.

⁵ Se bamanyikhanakho mu khuloma bubeeyi tawe, bali baluungi.

⁶Nio nabona malaika okundi apurukha mu ngaaki lukali, ne burume bwa buli lwoosi bwe Lomo Endayi naboolela baandu be sibala, ba buli lukoondo lwe babaandu, buli luuya, buli lulomo, nende buli ekholo.

⁷Aaloma mu mumilo kwe angaaki ali, “Ria Wele lundi mufumie bukali bwewe! Sikila esaa yewe eye khukhalakila babaandu yolile, saaya oyo owabuumba likulu, liloba, enyanja, ne chimoni che kameechi!”

⁸ Ne malaika owa khabili aloonda khu we khunyoa ne aloma ali, “Akwiile! Babiloni omukhasi omukali akwiile! Omukhasi owakhola babaandu boosi banywa endali yewe, endali endafu eye bueeyi bwewe!”

⁹Malaika owa khataru aaloonda khu bataayi babili, ne aloma ne kumumilo kwe angaaki ali; “Yesi yesi olasaaya esaang'i chana ne sifwaani siayo, mala anyoole simanyisio khu bweeni bwewe namwe khu mukhono kwewe,

¹⁰ omweneyo akhanywe endali eya Wele, endali eye burafu bwewe, niyo achukhile ne kamaani koosi mu sikoombe sie lirima liewe! Boosi bakhola lino bakhanyaasibwe mu mulilo kumubuusi ebweeni wa malaika batakatifu ne Limeeme.

¹¹ Liliisi libanyaasianga nibo lituukhanga mu ngaaki mindali na mindali. Basaaya esaang'i ne sifwaani siayo, nende omundu yesi yesi oli ne simanyisio sie lisina liayo se balikho ne siiuluukho siilo ne kumuusi tawe.”

¹²Ano niio liliekhaliilikha lie babaandu ba Wele lienyekhanga, abo ba baria kamalaka ka Wele, mala bali basuubilwa khu Yesu.

¹³Nio naulila kumumilo khukhwama mwikulu ne kuloma kuli, “Andika kano: Abo bafwiila mu khu khalabanila Omwami khukhwama luno ne khuchilila babiitwa chikhabi!” Ne Roho akobosia ali, “Yee ng'ali! Bakhekhoyele liiola khukhwama khu milimo kiabwe kimiandalafu, sikila bikholwa biabwe bikhabaloondekho.”

¹⁴ Nio, nalola lundi, mala nabona lifuumbi liwaanga, nende sisiekhala khu lifuumbi chana siabonekhana nga omundu, ne ekuutwa eye sahabu yaba khu murwe kwewe, ne engeso enjoki mukhono mwewe.

¹⁵ Nio, malaika okundi echa khukhwama mu Lukaangu ne aboolela mu mumilo kwe angaaki oyo owaba ne ekhaale khu lifuumbi, ali, “Rumikhira engeso yowo mala okese, sikila esaa eye likesa yolile, sibala sialabile siolile likesa!”

¹⁶Nio, oyo owaba ne ekhaale khu lifuumbi auucha engeso yewe khu sibala, mala sibala siakesibwa.

¹⁷Lundi nabona malaika okundi arura mu lukaangu mwikulu, mala yesi aba ne engeso enjoki.

¹⁸Nio, abwenao malaika okundi, owimeelela kumulilo, aama khu alutare aochelela ne kumumilo kwe angaaki malaika owaba ne engeso enjoki ali, “Rumikhira engeso yowo, mala okhale kamatuunda ke kumusabibu khukhwama mu mukuunda kwe sibala, sikila chisabibu charobire!”

¹⁹Nio malaika oyo auucha engeso yewe khu sibala, akhala kamatuunda ke kumusabibu khukhwama khu sakia aakamwaata mu sisuuriro sie endali eye burafu bwe lirima lia Wele.

²⁰ Kamatuunda ke kumusabibu kakhamululilwa mu sisuuriro sie endali enje we lukoba, mala kamafuki kama mu sisuuriro sie ndali kumukhula buleeyi bwe chikilomita chimia chitaru ne embi chimita chimia chibili khukhwiikha aasi.