Read lubukusu Lif. 15 Bible Online

Lif. 15 - lubukusu bible

Lif. 15

¹Nio, nabona mu ngaaki sisiindu sisiindi sie kamakana, siboofu lundi sie khuukia. Babaamo malaika saba ne lufu saba, luli lumaliilisi sikila luli liliekesia limaliilisi lie lirima lia Wele.

²Lundi, nabona sisiabonekhana nga enyanja eye sikioo yatubaanile ne kumulilo. Lundi nabona abo ba baaba ne baulile esaang'i ne sifwaani siayo, nende oyo niye lisina liewe liaanwa ne namba. Baba bemile a nyanja eye sikioo, baambile kamatuungu niko Wele aaba ne abaelesie,

³ baapa ne khukhwimba lulwimbo lwa Musa, omukholi owa Wele, ne kumwenya kwe Limeeme bali: “Omwami Wele owe bunyali, bikholwa biowo bili biboofu lundi bie khuukia! Omwami owe chikholo, chingila chowo chili chinungi lundi cha ng'ali!

⁴ Naanu okhalobe khu khuria ewe Omwami! Naanu okhalobe khufumia bukali bwowo? Ewe weng'ene oli omutakatifu. Chikholo choosi chikheche chikhusaaye ewe, sikila bikholwa biowo biluungi biabonekhaane khu boosi.”

⁵ Enyuma wa kano nabona lukaangu mwikulu lwekuukhe, ne Liiema litakatifu lili mukari.

⁶Malaika saba chana ba baaba ne lufu saba barura mu lukaangu, befwarire chingubo cha katani ching'enang'ena lundi beboyile kimisiipi kie sahabu mu bifuba biabwe.

⁷Ne, mulala khu bibuumbe bine bilamu aelesia malaika saba abo bibuumba saba bie sahabu biechuule lirima lia Wele omenyile mindali na mindali.

⁸ Lukaangu lwechula liliisi khukhwama khu luyali ne bunyali bwa Wele, ne se aliio owanyala khukhwingila mu lukaangu chana olwo tawe khukhwola nga lufu saba lulwareerwa ne malaika saba olwo lwawa.