Read lubukusu Lif. 16 Bible Online

Lif. 16 - lubukusu bible

Lif. 16

¹Nio, naulila kumumilo kwe angaaki khukhwama mu lukaangu ne kuloma khu malaika saba kuli: “Cha muchukhe bibuumba saba bie lirima lia Wele khu sibala!”

² Nio malaika owe khunyoa aacha achukha sibuumba siewe khu sibala. Kamabiimba kamabi lundi kamarafu kabonekha khwaabo ba baaba ne simanyisio sie esaang'i nende abo ba baaba ne basaaya sifwaani siayo.

³Malaika owa khabili aachukha sibuumba siewe khu nyanja. Kameechi kekela nga kamafuki ko mufu, ne buli sibuumbe silamu mu nyanja siafwa.

⁴ Nio, malaika owa khataru aachukha sibuumba siewe khu njichi ne chisebele, chekela kamafuki.

⁵Naulila malaika owimeelela kameechi aloma ali, “Bukhalaki nibwo mukholile buli buluungi, Ewe Omutakatifu, Ewe oliio lundi owabao!

⁶Bachukha kamafuki ke babaandu ba Wele nende ke bang'oosi, khwako nawe wabaeele kamafuki banywe. Balikho banyoola nisio bakhoyeele banyoole!”

⁷Nio, naulila kumumilo khukhwama khu alutare ne kuloma kuli, “Omwami Wele owe bunyali! Likhalaka liowo lili lia ng'ali lundi liluungi!”

⁸Malaika owa khaane aachukha sibuumba siewe khu nyanga, mala enyanga yasibulwa khukhwosia babaandu ne kumuumu kwayo kumurafu.

⁹Bosebwa ne kumuumu kumurafu, mala balaama lisina lia Wele ooli ne bunyali khu lufu luno. Ne kakhali se bekanila bubwoni bwabwe, ne khuelesia Wele efuma tawe.

¹⁰ Nio, malaika owa kharaano aachukha sibuumba siewe khu ndebe eye bubwami bwe saang'i. Sisiilima siakwa khu bwami bwe saang'i, ne babaandu belumakaka sikila buchuuni bwabwe,

¹¹mala balaama Wele owe mwikulu khulwe buchuuni bwabwe ne kamabiimba, ne se bekanila bubwoni bwabwe tawe.

¹² Ne, malaika owa sita achukha sibuumba siewe khu luuchi luboofu lwa Efurati. Luluuchi chana lwateenya, khukhwikula engila khu baami babaama ebukwe.

¹³Nio, nabona roho bataru bamayaanu ba bafwaana nga chikhele. Bama mukhanwa mwe kuremu, mukhanwa mwe esaang'i, ne mukhanwa mwo omung'oosi owe bubeeyi.

¹⁴Baba roho be bisieeno baakhola kamayia. Baroho bataru bano bacha khu baami boosi be mu sibala, khu bareera alala mwiie khu Ndaalo emboofu eya Wele Owe Bunyali Bwoosi.

¹⁵ “Rekeeresia! Ndikho nicha nga omwifwi! Oyo orama meso naliinda chingubo chewe, nio akhakhola ario aakeenda sichula ne khuambwa chisoni mu baandu tawe aabiitwa chikhabi!”

¹⁶ Nio, chiroho bara babaami alala abuundu alaangwa mu Lueburania bali, “Hamaketoni.”

¹⁷Nio, malaika owa saba aachukha sibuumba siewe mu mbeo. Kumumilo kwe angaaki kwama khu ndebe eye bubwami eye mu Lukaangu, ne kuloma kuli, “Kakholekhe!”

¹⁸ Liburukha lie chimbeni, litirira, ne khubalukha khwe fula, ne khuterema khwe sibala khukali po khwabao. Literema lie sibala lie lukano olwo likhabakhoo khukhwama nga omundu ne abuumbwa tawe, lino liaba literema liboofu limalayo!

¹⁹ Lukoba luboofu lwakabukhanamo bitonyi bitaru, ne chingoba che bibala choosi chonakwa. Wele akhebulila Babiloni omukali mala amunywesia endali khukhwama mu sikoombe siewe, endali eye lirima liewe lirafu.

²⁰ Kamakenga koosi kataambao, bikulu bioosi bianywelulukha biawa.

²¹ Kamaarara kamaboofu, buli lilala busiro embi chikiilo kamakhumi karaano, kakwa khu baandu ba balaama Wele khulwe lufu lwe kamaarara, sikila lwaba lufu lubi po.