Read lubukusu Lif. 17 Bible Online

Lif. 17 - lubukusu bible

Lif. 17

¹ Nio, mulala khu malaika saba ba baaba ne bibuumba saba aanjichao aaloma ali, “Yiicha, ndakhwekesia nga omueeyi owamanyikhana nga ne akhoyeele auukuumwe, lukoba luboofu olwo, lulwombakhwa embi ne chinjichi chingali.

² Babaami be sibala bakhola sifwaabi naye, lundi babaandu be sibala bameela endali eye sifwaabi siewe.”

³ Roho aba nase, mala malaika aameema aambila mu sichiimi. Ebweeneyo nabona omukhasi ekhaale khu saang'i embesemu eyaba ne kamasina ke mbelekeu khu Wele kakaandikwa khu sikhoba khwayo khwoosi, esaang'i eyo yaba ne kimirwe saba ne chinjika ekhumi.

⁴ Omukhasi chana aba efwara engubo enapeenda ne mbesemu, afuniikhwe ne bibiuma bie sahabu, kamabaale ke bukusi bwe angaaki ne chisiimbi. Mukhono mwewe aba aambile sikoombe sie sahabu siechule bibiindu bie bunyaalu lundi biibi, bibiekesia bueeyi bwewe.

⁵Khu bweeni bwewe lisina liaba liaandikwakho, lisina lie sifuno sisiekisa sili; “Babiloni omukali, maawe owe baeeyi boosi ne babi mu sibala.”

⁶Nio nabona omukhasi chana ameelile kamafuki ke batakatifu ba Wele, ne kamafuki kaabo babeerwa sikila baba basuubila Yesu. Nga ne namubona, narangararwa lukali.

⁷Malaika aandeeba ali, “Siina sikila norangaraarwe? Ndakhuboolela sifuno sisiekesia omukhasi ne saang'i emumemanga, esaang'i eye kimirwe saba ne chinjika ekhumi.

⁸ Esaang'i eyo yabechanga enamu, ne luno yafwiile, eli siimbi khurura mwiloo likhali ne sisiakamo tawe, mala eche ebunisibwe. Babaandu ba baamenya khu sibala be kamasina kakhaandikwa mu sitabu sie bulamu, sibala ne sikhabaang'anwa tawe, nga balibona esaang'i eyaba enamu eyo, ne luno yafwiile, balirangararwa, ne kakhali ekhabonekhe lundi.

⁹“Kano kenya bukesi ne limanya. Kimirwe saba kili bikulu saba, nikhwo omukhasi chana ekhalanga. Lundi bali babaami saba,

¹⁰baraano khu nibo bakwiile, mulala asiamiia, ne okundi akhecha tawe nga akheche, aliamiia busa siise sitiiti.

¹¹Ne esaang'i chana eyaba enamu, ne luno yafwiile, eng'ene eli omwami owa munaane eli ndala khu saba mala echa khubunisibwa.

¹² “Chinjika ekhumi nicho wabona chili babaami ekhumi bakharakikha khukhwamiia tawe, mala bakhaebwe bunyali khukhwamiia nga babaami khu saa ndala ne saang'i.

¹³Ekhumi bano boosi bali ne sifuno silala, mala baana kamaani ne bunyali bwabwe khu saang'i.

¹⁴Bakhapane ne Limeeme, ne kakhali Limeeme, alala ne baloondi bewe basuubilwa, babalaangwa lundi babaroborwa, balibaula, sikila ali Omwami owe babaami lundi Omuruki we baruki.”

¹⁵Lundi malaika aamboolela ali, “Kameechi niko waboone, niko omueeyi ekhaalemo, kali chikholo, babaandu, lukoondo lwe babaandu, ne chinomo.

¹⁶Chinjika ekhumi nicho waboone echo ne saang'i bikhabiile omueeyi oyo; bilimubukula buli siindu nisio ali nasio, mala bimulekhe sichula; chikhalie kumubili kwewe, mala chimwosie ne kumulilo.

¹⁷Wele ara mu miooyo kiabwe lilienya lie khukhola sifuno siewe, khulwe khukholela alala ne khuelesia esaang'i bunyali bwabwe yamiie nabwila nga kamakhuwa niko Wele aaloma kekholekha.

¹⁸“Omukhasi niye mwaboone ali lukoba luboofu lulwamiia babaami be sibala.”