Read lubukusu Lif. 18 Bible Online

Lif. 18 - lubukusu bible

Lif. 18

¹Enyuma wa kano, nabona malaika okundi ne ekha khukhwama mwikulu. Aba ne bunyali bukali, ne luyali lwewe lwakhosia khu sibala sioosi.

² Aalomaloma mu mumilo kwe angaaki ali: “Lwakwiile! Babiloni luboofu lwakwiile! Luno lwekholile bumenyo bwe bisieeno ne baroho babi, ekholile abuundu niio chinyuni chinyaalu choosi nende nicho babiila chimenya.

³ Sikila chikholo choosi chanywele endali eluluue eye liliekoomba lie sifwaabi sialwo. Babami be sibala bakhola bueeyi naye, ne baboofuli be sibala baindiaala sikila liliekoomba lialwo likali.”

⁴ Nio naulila kumumilo kukundi khukhwama mwikulu ne kuloma kuli, “Baandu base, khemurure! Khemurure mu lukoba olwo! Mukhaambaana nalwo mu bwoni bwalwo tawe; mukhakhola murio mwasaanga mu siiukuumo sialwo tawe!

⁵ Sikila bubwoni bwalwo buli bukali khukhwola mwikulu, mala Wele akhebulila chingila chalwo chimayaanu.

⁶ Lukholele bulayi bwene nga lwamukholela enywe; ruruungie khabili khu koosi niko lukholile. Yichusia sikoombe sialwo khukhwola khabili nga nisio lwamuelesia enywe.

⁷ Luelesie buchuuni bukali ne bubeeleli nga luyali ne bukoote nibwo lwaba nalwo. Sikila lwachiilililanga khuloma luli, ‘Ese ndi Kwini, nekhaale ano! Se ndi namulekhwa tawe, se ndimanya bubeeleli nisio siina tawe!’

⁸ Khulwe sifuno sino endaalo ndala alinyoola butinyu buno. Bulwaale, bubeeleli ne njala. Ne aliosebwa ne kumulilo, Sikila Omwami Wele, omukhalakilanga ali ne bunyali.”

⁹Babaami be sibala ba baaba mu sifwaabi ne kumuliuliu naye, bakhalile ne khukhwiunamila mu lukoba nga balibona liliisi ne lituukha khukhwama khu memu chilwosia.

¹⁰Bakhemele ataayi, sikila bakharie khusaanga mu sinyaasio siewe. Bakhalome bali, “Engunyi! Engunyi engali! Babiloni lukoba luboofu lundi lwe kamaani luno, khu saa ndala yong'ene siiukuumo siakhunyoola!”

¹¹ Ne baboofuli be mu sibala boosi balalila ne khusooma, sikila se aliio akhaba mulala okula bibiindu biabwe tawe;

¹² se aliio akhaba mulala okula esahabu yabwe, efwesa, kamabaale ke bukusi bwe angaaki, chisiimbi, chingubo chabwe cha katani, chingubo chifwaana buseemwa, laasi, ne chimbesemu, ne chimbako choosi chikhasala tawe, ne bibiindu bibiindi bioosi bibiakholwa khukhwama khu misaanga, nende bie chimbao che bukusi bwe angaki, bie kimikasa, bie bichuuma, nende bie kamabaale kamamiliiu,

¹³ne kumutalasini ne bing'aa bulayi bie mu biakhulia, bupaani, manemane, uti; endali ne kamafura ka museituni, bufu bunosie ne ngano, chikhaafu ne kamakheese, chifarasi ne kamakaari ke liie, nasioobi, aakhaba ne bulamu bwe babaandu.

¹⁴Baboofuli baboolela omukhasi oyo bali, “Bibiindu bilayi bioosi nibio wekoombanga khuba nabio biaweeleo; ne kimiaandu kiowo nikio weboneseliakho kiaelile, ne se olikinyoola lundi tawe.”

¹⁵ Baboofuli ba baindiala khulwe khukhwofulila mu lukoba olwo, bakhemele aleeyi, sikila bariire khusaanga mu buchuuni bwewe. Balalila ne khusooma,

¹⁶lundi balaloma bali, “Engunyi! Engunyi engali! Lwaba lwanala khukhwifwara chingubo cha katani, chifwaana buseemwa ne chindandaafu, ne khukhwekwalaasia ne bibiuma bie sahabu, kamabaale ke bukusi bwe angaaki, ne chisiimbi.

¹⁷ Mu saa ndala lwaba lwatibiisie buiinda!” Bakhulu boosi be chimeeli nende ba chikeendelamo, ba baandereba baacho ne babaandi boosi banyoolanga kumuruungo khu nyanja, bemela aleeyi,

¹⁸ mala balila nga babona liliisi liliama khu memu che kumulilo kulwosia bali, “Lukhabakhoo lukoba luboofu luluundi nga luno tawe!”

¹⁹ Bepuuka lipukhuulu khu mirwe kiabwe, balila ne khu sooma, ne baloma bali, “Engunyi! Engunyi engali khu lukoba luboofu! Luli lukoba nilwo be chimeeli chikeenda mu nyanja baindialilamo khuloondekhana ne buiinda bwalwo! Mala mu saa ndala yong'ene lwatibiisie buli siindu!”

²⁰ Likulu, sangaala, sikila khukhwonakwa khwalwo! Batakatifu ba Wele, barumwa ne bang'oosi sangaala! Sikila Wele akhalakile omukhasi oyo sikila niko aamukholela enywe!

²¹ Nio malaika owe kamaani lukali aabukula libaale lilekhaana ne lususi luboofu, alimwaata mu nyanja, ne aloma ali, “Babiloni lukoba luboofu lulimwaatwa aasi mwirima lutibile elala.

²² Khukhwimba khwe kimienya kie kamatuungu, ne kimimilo kie babaandu ne bakhupi be kimilele, nende be chikhoombi, se baliuliilikhanakho lundi mwiwe tawe! Mbao omukholi owe sisiindu siosi siosi sie bukhala olibonekhela mwiwe lundi tawe; liiuliilikhana lie lususi se liliba lundi mwiwe tawe!

²³Buwaanga bwe taa se bulibonekha mwiwe lundi tawe; namwe kumumilo kwo mundu niye baakhile se kuliuliilikhanakho lundi mwiwe tawe. Baboofuli bowo baba be kamaani kamakali khukhila mu sibala sioosi, khubirira mu bufumu bwowo bwe bubeeyi wabea babaandu be mu sibala!”

²⁴ Babiloni lwaukuumwa sikila kamafuki ke bang'oosi ne batakatifu ba Wele kakanyoolekhanamo, yee, kamafuki kaabo boosi baberwa khu sibala.