Read lubukusu Lif. 19 Bible Online

Lif. 19 - lubukusu bible

Lif. 19

¹Enyuma wa kano naulila kumumilo nga kwe babaandu bakali khukhwama mwikulu, ne kuloma kuli, “Fumia Wele, buonia, luyali ne kamaani bili bia Wele wefwe!

² Sikila likhalaka liewe lili lia ng'ali lundi liluungi! Wele akhalakile omueeyi omukhulu oyo owonaka sibala sikila sifwaabi siewe. Wele amuukuuma sikila eera bakholi bewe.”

³ Lundi baloma bali, “Wele afume! Liliisi liliama khu memu chibunia lukoba luboofu, liniinanga mu ngaaki mindali na mindali.”

⁴Babemeelesi kamakhumi kabili na bane ne bibuumbe bine bilamu biakwa aasi basaaya Wele owaba ne ekhaale khu ndebe eye bubwami. Baloma bali, “Amina! Wele afume!”

⁵ Nio, kumumilo kwama khu ndebe eye bubwami ne kuloma kuli, “Fumia Wele wefwe, enywe bakholi bewe mweesi ne babaandu boosi, babenyalila nende bakhenyalila ba bamuria niye!”

⁶ Naulila sisiindu siauliilikhana nga babaandu bakali, lundi nga khuoloola khwe kameechi kasuungukha mwikhupo, lundi nga khubalukha khwe fula. Naulila ne baloma bali, “Wele afume! Sikila Omwami Wele wefwe Owe Bunyali Bwoosi, ali Omuruki!

⁷Lekha efwe khwikhoye lundi khusangaale; lekha khufumie bunyali bwewe! Sikila siise sie siselelo sie Limeeme siolile, ne omwea wewe amwirekekheele.

⁸Aaebwa bunyali khufwara enaanga emiliiu eng'enang'ena.” (Engubo eya katani emiliiu eyo, aba bikholwa bilayi bie babaandu ba Wele.)

⁹ Nio, malaika amboolela ali, “Andika kano: Ba balaangwa mu naikara eye siselelo sie Limeeme babiitwa chikhabi.” Malaika chana atasakho ali, “Kano kali kamakhuwa ka ng'ali ka Wele.”

¹⁰Nakwa mu bikele biewe nenya khu musaaya mala amboolela ali, “Okhakhola orio tawe! Ese ndi omukholi wasio ne omusuubili wasienywe, ne naabo boosi batiila bung'ali nibwo Yesu afuunula. Saaya Wele! Sikila bung'ali nibwo Yesu afuunula nibwo kamaani ke bang'oosi.”

¹¹ Nio nabona likulu liekuukhe, mwikulu omwo yabamo efarasi ewaanga. Okitimia lisina liewe bali omusuubilwa lundi owa Ng'ali, mu buluungi akhalaka lundi apana liie liewe.

¹² Chimoni chewe chaba nga lumemu lwe kumulilo, mala aafwara chikuutwa chingali khu murwe kwewe. Aandikwakho lisina, ne se aliio omanyile sifuno sialio tawe, nakhali omwene yeng'ene.

¹³Ekaanjo niyo efwara yaba yenikhwa mu mafuki. Lisina liewe bali, “Elomo eya Wele.”

¹⁴Banamae be liie be mwikulu bamuloondakho, ne batimia chifarasi chiwaanga, baba befwarire chingubo cha katani chiwaanga.

¹⁵ Embalu enjoki niyo akhaulile chikholo yaba mukhanwa mwewe. Alibarukira esiimbo eye sichuuma, lundi aliswalakilila endali mu sisuuriro sie lirima lirafu lia Wele Owe Bunyali Bwoosi.

¹⁶Khu ngubo yewe, ne khwiraango khwewe lisina liaandikwakho: “Omwami owe babaami lundi Omuruki we baruki.”

¹⁷ Nio, nabona malaika emile khu nyanga. Alaanga ne kumumilo kumuboofu chinyuni choosi chipurukha ali, “Yiicha mu buusiane alala khulwa naikara emboofu eya Wele!

¹⁸Yiicha mubooche kimilaambo kie babaami, babemeelesi be liie, ne banamae, chinyama che chifarasi, ne kimilaambo kie bachitimia, ne babaandu boosi, nasioobi ne balekhuule, babenyalila nende bakhenyalila.”

¹⁹Nio, lwanyuma nabona esaang'i chana, ne babaami be sibala ne banamae babwe babuusiana khu khupana ne noyo owaba otimia efarasi ne banamae bewe.

²⁰ Esaang'i chana yaambwa alala no mung'oosi we bubeeyi owaba nakholile kamayia ebweeni wewe. (Khulwe kamayia ako, aba atiimia abo ba baaba ne simanyisio sie saang'i, ne naabo babasaaya sifwaani sie saang'i.) Esaang'i chana no mung'oosi owe bubeeyi boombi bamwaatwa balamu mu nyanja eye kumulilo kumurafu kumubuusi.

²¹Banamae be liie babaandi boosi berwa ne mbalu eyaama mukhanwa mwoyo owaba ne atimia efarasi chana; mala chinyuni choosi chaboocha kimilaambo kiabwe mu khuyaayana.