Read lubukusu Lif. 2 Bible Online

Lif. 2 - lubukusu bible

Lif. 2

¹“Khu malaika ooli mu kanisa eye Efeso andika oli: “Burume buno bwama khuyo owasuta ching'enieesi saba mu mukhono kwewe kumuseecha, mala okeendanga akari we biteetwe bie sahabu bie chitaa.

²Manyile niko okholile; manyile nga okholile ne kamaani, ne liliefwiilisia liowo. Manyile ndi sonyala wekhaliilikha babaandu bamayaanu tawe, lundi wakhaka abo balomanga bali, bali barumwa khane se bali barumwa tawe, lundi wamanyile oli bali babeeyi.

³Ewe oli owefwiilisia, wapisibwa siibi sikila ese, ne se wafwiile kumwoyo tawe.

⁴Ne kakhali lino nilio khwikiicha; se wasiimile ese nga waba ne wasiima mu khunyoa tawe.

⁵Yibaasia niio wakwila! Yikanila mala olekhe bubwoni bwowo okhole niko wakholanga mu khunyoa. Kaaba nokhekanila bubwoni bwowo tawe, ndeecha mala ndusieo siteetwe sie taa siowo abuundu wasio.

⁶Ne kano niko kamalayi niko oli nako. Wabiyila niko Banikolayi bakholanga, nga seesi nakabiyila.

⁷ “Ne oyo ooli ne kamaru, arekereesie niko Roho aboolela chikanisa! “Khwaabo balaula ndabafukiilila khulia kamatuunda ke kumurongooro kwe bulamu kuli mu Paratiso eya Wele.

⁸ “Khu malaika oli mu kanisa eye Simina andika oli: “Burume buno bwama khuyo oli owe khunyoa lundi owe khumaliilisia, owafwa mala alamukha.

⁹Ese manyile butinyu bwowo ese manyile ndi, oli omutaambi ne khane ng'ali oli omuiinda! Ese manyile bibiindu bimayaanu biboolwa khwiwe ne naabo babelangaanga bali, bali Bayuda khane tawe, bali sipupu sia Sietani!

¹⁰Okharia siosi siosi nisio oli siimbi khubiriramo tawe. Rekeeresia! Sietani alamura mwikhako khulwe khumwaata balala khwinywe mu siboe, ne butinyu bwowo bulamala chindaalo ekhumi. Ba basuubilwa khwise, khukhwola khufwa mala ndamuelesia ekuutwa eye bulamu.

¹¹ “Nono, mwaba ne muli ne kamaru, rekeeresia niko Roho aboolela chikanisa! “Abo baliiula se banyoola lifwa lie khabili tawe.

¹²“Khu malaika oli mu kanisa eye Perikamo andika oli: “Burume buno bwama khu mulala oli ne mbalu enjoki chimbeka chombi.

¹³Ese manyile niio ewe wamenya, abwenao niio Sietani ali ne ndebe yewe eye bubwami. Ewe oli owa ng'ali khwise, ne se wanjukha lisuubila liowo mwise tawe, akhaba mu ndaalo nicho Andipa omuloli wase omusuubilwa eererwa, abuundu niio Sietani amenya.

¹⁴ Ne kakhali biliio bibiindu bikeekhe nibio ese khwikiichilakho ewe, babaandu balala bali akari wenywe baloondanga kamekisio ka Balamu, owekisia Balaki nga anyala ayila babaandu ba Isiraeli mu bwoni khulwe khubaombelesia balie biakhulia biaanibwe khu bifwaani ne khukhola sifwaabi.

¹⁵Mu ngila ng'eneyo ne ng'ene muli ne babaandu akari wenywe baloondanga kamekisio ke Banikolayi.

¹⁶Nono yikanila mulekhe bubwoni bwenywe! Mwaba ne mukhakhola murio tawe, ndecha khangu mala ndumikhire embalu eyaama mukhanwa mwase khu khuupana ne babaandu abo.

¹⁷ “Ne oyo oli ne kamaru, rekeeresia niko Roho aboolela chikanisa! “Khwaabo baula ndabaelesia emana eyakukhuulilwa. Lundi ndaelesia buli mundu khu nibo libaale liwaanga liliaandikwakho lisina liya nilio omundu yesi yesi akhamanyilekho tawe, nakhali oyo olinyoola yeng'ene.

¹⁸“Khu malaika ooli mu kanisa eye Siatira andika oli: “Burume buno bwama khu Mwana wa Wele; owe chimoni nga lumemu lwe kumulilo. Owe bikele bing'enang'ena nga kumukasa nikwo bosiisie.

¹⁹Ese manyile niko okholanga. Manyile busiime bwowo, lisuubila liowo, bukhalabani bwowo, ne liliefwiilisia liowo. Ese manyile ndi luno olakholanga kamakali khukhila mu khunyoa.

²⁰ Ne lino nilio khwikiichilakho ewe: wikhaliilikha omukhasi Yesebeli, owilangaanga ali, omurumwa owa Wele. Khulwe kamekisio kewe atiimia bakholi baase, bakhola sifwaabi ne khulia biakhulia biianibwe khu bifwaani.

²¹Namuelesia siise sie khukhwikanila bubwoni bwewe, ne se eenya khulekha sifwaabi tawe.

²²Khwako ndamumwaata khu sitanda, nisio niye nende abo ba baeyananga naye balichuunwa lukali. Luno ndakhola ndio baaba ne bakhekanila bibiindu biibi nibio bakholanga naye tawe.

²³ Lundi ndeera baloondi bewe, nio chikanisa choosi chimanye chili ese niye omanyile kamebaasio kali mu buli mundu ne lilienya liewe. Ndaruunga buli mundu khwinywe khuloondekhana nende niko akholile.

²⁴“Ne kakhali muramire mu Siatira mweesi mu khaloonda kamekisio kamamayaanu kano tawe; se mweyika niko babaandi balangaanga bali, ke simoonyo sie mukari sia Sietani tawe. Ese muboolela enywe ndi se ndamutiuukha enywe busiro bubuundi tawe.

²⁵Ne nabwila ndikobola, khukhwola mukhayile khu nisio muli nasio.

²⁶ Khuyo oula, achiililile khukhola niko ese nenya khukhwola khu siakamo ndamuelesia bunyali bufwaanana nende nibwo nanyoola khukhwama khu Paapa. Ndamuelesia bunyali khu kholo choosi,

²⁷alabaamiia ne siimbo eye sichuuma, ne khu baaraakakamo nga chinyuungu.

²⁸Lundi ndamuelesia niye eng'enieesi eya sulwe.

²⁹“Oyo oli ne kamaru, arekeeresie niko Roho aboolela chikanisa!