Read lubukusu Lif. 20 Bible Online

Lif. 20 - lubukusu bible

Lif. 20

¹Nio, nabona malaika ne ekha khukhwama mwikulu, atiilile lufunguo mukhono mwewe lwe liloo likhali ne sisiakamo tawe, ne kumunyololo kumusiro.

² Akhamara sisieeno sie khaale esio, nisio khulaanga khuli Omumayaanu namwe Sietani mala asiboa kumunyololo khulwe kimiiko eelefu ndala.

³Malaika chana aasimwaata mwiloo likhali ne sisiakamo tawe, ekasia ne khulitiimbia, nio sikhatiimia chikholo lundi tawe, nabwila kimiiko eelefu ndala ne kiwa. Enyuma wako khukhwola silekhuulwe khu siise sitiiti.

⁴ Nio nabona chindebe che bubwami, ne naabo ba bachikhalakho, baebwa bunyali bwe khukhalaka. Lundi nabona kimiooyo kiaabo baberwa sikila khuboola bung'ali bubwafuunulwa ne Yesu, ne elomo eya Wele. Bakhasaayakho esaang'i, namwe sifwaani siayo tawe, namwe se baba ne simanyisio siayo mu bweeni bwabwe, namwe khu makhono kabwe tawe. Balamukha mala bamiia nga babaami alala ne Kristo khulwe kimiiko eelefu ndala.

⁵(Bafu babaandi, se balamukha tawe nabwila kimiiko eelefu ndala ne kiawa.) Lino nilio lilamukha lie bafu lie khunyoa.

⁶Abo baali mu lilamukha lie khunyoa lino babiitwa chikhabi. Lifwa lia khabili se lili ne bunyali khu nibo tawe; balaba basaayi ba Wele lundi ba Kristo, mala baliamiia alala naye khulwe kimiiko eelefu ndala.

⁷Enyuma we kimiiko eelefu ndala ekio, Sietani alikangululwa khukhwama mu siboe,

⁸ mala alirura ache khubea be chikholo ba basalanila mu sibala sioosi, nibo Koki ne Makoki. Sietani alibabuusia alala boosi, khulwe liie, mala baliba bakali nga kumuyekhe kwe khu nyanja.

⁹Bamaasia mu sibala sioosi, babotookhelela ekambi eye batakatifu ba Wele, ne lukoba nilwo aasiima. Ne kakhali kumulilo kwama mwikulu mala kwababunia.

¹⁰Nio, Sietani chana owababea, amwaatwe mu nyanja eye kumulilo kumubuusi, nimwo esaang'i no mung'oosi omubeeyi bamwaatwa khale; mala balinyaasibwa kumuusi ne siilo, khulwa mindali na mindali.

¹¹ Nio, nabona endebe emboofu ewaanga eye bubwami nende oyo okikhalangakho. Sibala ne likulu biamwilukha; mala se biabonekhakho lundi tawe.

¹²Nabona babafwa, babenyalila nende bakhenyalila sitube, bemile ebweeni we ndebe eye bubwami. Bitabu biabambulwa mala lundi sitabu sisiindi siabambulwa, sitabu sie bulamu. Ne babafwa bakhalakilwa khuloondekhana ne bikholwa biabwe, nga ne kaandikwa mu bitabu.

¹³Nio, enyanja yarusia bafu baayo. Lifwa ne makoombe bioosi biarusia bafu ba babamo. Mala boosi bakhalakilwa khuloondekhana nende niko bakhola.

¹⁴Nio, lifwa ne makoombe biamwaatwa mu nyanja eye kumulilo. (Enyanja eye kumulilo yino nilio lifwa lia khabili.)

¹⁵Omundu yesi yesi niye lisina liewe likhaandikwa mu sitabu sie bulamu tawe, amwaatwa mu nyanja eye kumulilo.