Read lubukusu Lif. 21 Bible Online

Lif. 21 - lubukusu bible

Lif. 21

¹ Nio, nabona likulu liiya ne sibala siiya. Likulu lie khunyoa ne sibala sie khunyoa biabira, mala enyanja yatambao.

² Lundi nabona lukoba lutakatifu, nilwo Yerusalemu, luya, ne lwikha khukhwama mwikulu wa Wele, lwefwarire lwerekekhe nga omwea nacha khukhwakanila omuseecha wewe.

³ Naulila kumumilo kwe angaaki kumuboofu ne kuloma khukhwama mu ndebe eye bubwami kuli, “Lola! Bumenyo bwa Wele buli mu baandu! Alamenya nabo, mala balaba babaandu bewe. Wele omwene alaba nabo lundi alaba Wele wabwe.

⁴ Alabeeya kamasika koosi sia moni. Lifwa se lilibao lundi tawe, lisooma, namwe khulila namwe buchuuni tawe. Sikila bibiindu bie khaale biabirire.”

⁵Nio, oyo owikhaale khu ndebe eye bubwami aloma ali, “Ne luno ese khola bibiindu bioosi khuba biiya!” Lundi aamboolela ese ali, “Andika kano, sikila kamakhuwa kano kali ka ng'ali, lundi kanyala khusuubilwa.”

⁶ Nio aamboolela ali, “Kakholekhe! Ese ndi owe khunyoa lundi omumaliilisi. Khuyo oli ne bulesia ndamua bunyali khunywa kameechi khukhwama mu sebele eye kameechi ke bulamu niko akharuunga tawe.

⁷ Abo baula balinyoola kumuruuru kuno khukhwama khwise: Ese ndiba Wele wabwe ne nabo baliba babaana base.

⁸Ne kakhali baari, bachongani, batiimia, babeeri, be sifwaabi, bafumu, basaayanga bifwaani, ne babeeyi boosi, abuundu wabwe aliba mu nyanja eye kumulilo kumubuusi; lino nilio lifwa lia khabili.”

⁹Mulala khu malaika saba, ba baaba ne bibuumba saba, bibiechula lufu chingano saba, chimaliilisi echa mala aamboolela ali, “Khowiche mala kane khwekesie Omwea, omukhasi owe Limeeme.”

¹⁰ Roho amwichamo mala malaika aasuta ese aaniinia khu sikulu sileeyi lukali. Anjokesia Yerusalemu Lukoba Lutakatifu, lulwaba ne lwikha khukhwama mwikulu wa Wele,

¹¹lwakhosia ne luyali lwa Wele. Lukoba lwakhosia nga libaale lie bukusi bukali, nga libaale liwaanga limelamela nga sikioo

¹² Lwaba ne lisiisi liboofu lileeyi, lie bilibwa ekhumi na bibili, ne malaika ekhumi na babili baliinda bilibwa ebio. Khu bilibwa kamasina ke chikholo ekhumi na chibili che babaana ba Isiraeli kaandikwakho.

¹³Buli lubeka lwaba ne bilibwa bitaru; ebukwe bitaru, ebunaswa bitaru, siafubo bitaru, ne mumbo bitaru.

¹⁴Lisiisi lie lukoba liombakhwa khu misiingi kie kamabaale ekhumi na kabili ne khu nikio, kamasina ke barumwa be Limeeme kaandikwakho, ekhumi na kabili.

¹⁵ Malaika chana owalomalomanga ne nase aba ne lusaala lwe sahabu lwe khupiima lukoba, bilibwa bialwo, ne lisiisi lialwo.

¹⁶Lukoba olwo lwalekhaana chimbeka choosi, bubalaayi ne buleeyi bwalwo. Malaika chana apiima lukoba chana ne lusaala lwe khupiima; lwaba buleeyi chikilomita chielefu chibili ne chimia chine, ne bukhiikha balwo ne khucha mu ngaaki bialekhaana.

¹⁷Malaika chana apiima lisiisi lioosi, liaba chimita kamakhumi sita khucha angaaki, khuloondekhana ne sikelo sie khupiima nisio arumikhiranga.

¹⁸ Lisiisi elio liaba liombakhwa ne kamabaale ke bukusi bwe angaaki kamanapenda kamelamela, ne lukoba lulwene lwaba lwombakhwa ne sahabu engwalaafu nga sikioo similiiu.

¹⁹Kamabaale ke kumusiingi kwe lisiisi lie lukoba kaba kang'oonwa mu ngila endayi eye kamabaale ke khurobarobana ke bukusi bwe angaaki. Libaale lie lukhelela lwe khunyoa mu musiingi liaba libuusi elala, lia khabili liaba lie kamabuusi, lia khataru likokhakokhe, lia khane libookha,

²⁰lia kharaano libuusi lifulaafulane, lia sita libesemu, lia saba linapenda, lia munaane liaba libuusi libookha, lia tisa liaba likokhakokhe, lie khumi liaba lifwaana lufutu, lie khumi na lulala liaba lia mayayi nga liki, lie khumi na chibili liaba linakhanyuusi.

²¹Bilibwa ekhumi na bibili ebio biaba chisiimbi ekhumi na chibili. Ne buli silibwa silala siakholwa khukhwama mu siimbi ndala. Engila eye mu lukoba yaba eye sahabu engwalaafu nga sikioo sing'enang'ena.

²²Se nabona Lukaangu mu lukoba tawe, sikila Lukaangu lwalwo luli Omwami Wele Owanyala bioosi ne Limeeme.

²³ Lukoba olwo se lwenya enyanga namwe, kumwesi khu lukhosiakho tawe. Sikila luyali lwa Wele lulukhosiangakho, ne Limeeme nilio etaa yalwo.

²⁴ Babaandu be mu sibala balakeendela mu buwaanga bwalwo. Ne babaami balareeramo buiinda bwabwe,

²⁵ Bilibwa bie lukoba bilirama khwasie endaalo yoosi; se biliikalwa tawe, sikila siilo se silibayo tawe.

²⁶Lukoosi ne buiinda bwe chikholo bulireerwa mu lukoba.

²⁷ Ne siosi siosi siili sinyaalu se silingila mu lukoba olwo tawe, namwe yesi yesi okhola bibiindu bie chisoni namwe omubeeyi se alingilamo tawe. Ne kakhali abo nibo kamasina kabwe kaandikwa mu sitabu sie bulamu sie Limeeme bong'ene balingilamo.