Read lubukusu Lif. 22 Bible Online

Lif. 22 - lubukusu bible

Lif. 22

¹ Nio, malaika chana aanjekesia luluuchi lwe kameechi ke bulamu kamakwalaafu lukali, ne kaama mu ndebe eye bubwami bwa Wele ne Limeeme

² mala kekhela akari we kumuyila kwe lukoba. Kumurongooro kwe bulamu kwaba buli lubeka lwe luluuchi, kukwama kamatuunda mu biise ekhumi na bibili khu mwiiko, buli mwesi; ne kamasaafu kakwo kali kaonia chikholo.

³ Se silibao siosi siosi nisio Wele aalaama silinyoolekha mu lukoba olwo tawe. Endebe eye bubwami eya Wele nende eye Limeeme eliba mu lukoba lwene olwo, lundi bakholi bewe balimusaaya niye.

⁴Balibona bubweeni bwewe, ne lisina liewe liliaandikwa khu bweni bwabwe.

⁵ Siilo se silibao lundi tawe, ne se balienya buwaanga bwe chitaa, namwe bwe nyanga tawe; sikila Omwami Wele omwene aliba buwaanga bwabwe, mala baliamiia nga babaami mindali na mindali.

⁶Nio, malaika chana amboolela ali, “Kamakhuwa kano kali ka ng'ali lundi kolaana khusuubilwa. Omwami Wele, Omwami oelesianga bang'oosi Roho wewe, aarumire malaika wewe ekesie bakholi bewe kakhekholekhe ambi ari.”

⁷Yesu aloma ali, “Rekeeresia! Ndikho nicha bwangu! Oyo oria kamakhuwa ke bung'oosi bwe sitabu sino aabiitwa chikhabi!”

⁸Ese Yoana samwene naulila ne khubona bibiindu bino bioosi. Ne nga na mala khuulila ne khubibona, nakwa aasi mu bikele bia malaika owaba ne anjekesie ese bibiindu bino abeele ndi siimbi khumusaaya.

⁹Ne kakhali aamboolela ali, “okhakhola orio tawe! Ese ndi omukholi wasio lundi owe bawandaayo bang'oosi nende abo boosi baria kamakhuwa ke mu sitabu sino. Saaya Wele!”

¹⁰Lundi aamboolela ali, “Okhakukhuulila kamakhuwa ke bung'oosi bwe mu sitabu sino tawe, sikila siise siako sili siimbi nisio kano koosi kalekholekhelakho.

¹¹ Omwoni khukhwola achiililile ario mu bwoni bwewe; ne owe sifwaabi khukhwola achiililile ario mu sifwaabi siewe; ne omulayi khukhwola achiililile ario khukhola kamalayi kewe, ne ooli omutakatifu achiililile khuuba omutakatifu.”

¹² Yesu aloma ali, “Rekeeresia! Oli omutakatifu khukhwola achiililile khuba omutakatifu! Ndikho nicha bwangu! Ndareera kumuruuru kwase, ndunge buli mundu khuloondekhana ne bikholwa biewe.

¹³ Ese ndi Alufa ne Omeka, owe khunyoa ne khumaliilikha, owe khurakikha ne khutabusia.”

¹⁴ Abo basiinga chingubo chabwe nio bafukiililwe khulia kamatuunda khu murongooro kwe bulamu, ne khubira bengile mu lukoba khubirira mu bilibwa babiitwa chikhabi.

¹⁵Ne enje we lukoba chimbwa chiliyo nende abo bakhola bufumu, be sifwaabi, babeeri, abo basaaya bifwaani nende abo baali babeeyi mu makhuwa ne mu bikholwa.

¹⁶ “Ese, Yesu, narumire malaika wase khuboola bibiindu bino khwinywe mu chikanisa. Ese ndi sisina sie lisaaye lia Daudi; Ese ndi eng'enieesi eya sulwe.”

¹⁷ Roho no Mwea baloma bali, “Yiicha!” Buli mundu yesi yesi oulila kano akhoyeela yesi aaloma ali, “Yiicha!” Lekha yesi yesi oli ne bulesia eche; anywe kameechi ke bulamu kakhali ne bukusi tawe.

¹⁸ Ese Yoana, ngambila lukali yesi yesi oulila kamakhuwa ke bung'oosi bwe sitabu sino: aaba bali omundu yesi yesi atasakho khu kano, Wele alamutasakho binyaasio bie lufu lulwaandikwa mu sitabu sino.

¹⁹Ne omundu yesi yesi aaba narusiakho siosi siosi khu makhuwa ke bung'oosi bwe sitabu sino, Wele alamunuula kumukabwa kwewe kwe kamatuunda ke kumurongooro kwe bulamu nende kwe mu lukoba lutakatifu, nga ne kenoosibwa mu sitabu sino.

²⁰Oyo obonanga bibiindu bino bioosi aloma ali, “Yee, ng'ali! Ndikho nicha bwangu!” Amina. “Nio kabe kario.” Yiicha Omwami Yesu!

²¹Kumwalaalo kwo Mwami Yesu kube ne batakatifu boosi. Amina.