Read lubukusu Lif. 3 Bible Online

Lif. 3 - lubukusu bible

Lif. 3

¹“Khu malaika oli mu kanisa mu Sarite andika oli: “Burume buno bwama khu mulala oli ne roho saba ba Wele ne ching'enieesi saba. Ese manyile niko olikho okhola; manyile ndi oli ne fuma eye khuba omulamu; ne kakhali wafwa!

²Yinyokha! Waramire ne kamaani matiiti, koosi kali siimbi khuwa. Khwako khaka obe ne kamaani. Naboone ndi niko olakholanga se kali kamechufu ebweeni wa Wele tawe.

³ Nono khebulila niko wekisibwa nende niko waulila; karie mala wekanile, ndeecha nga omwifwi; ne se okhamanye esaa niyo khechelekho tawe.

⁴Ne kakhali bakeekhe khwinywe mu Sarite omwo mumwaliinda chingubo chenywe mu bumiliiu. Mulakeenda nase, mwefwarire chiwaanga, sikila mwolaana khukhola murio.

⁵ Abo baula balafwarwa mu waanga; mala se ndarusia kamasina kabwe mu sitabu sie balamu tawe. Ebweeni wa Paapa ne bweni wa malaika bewe ndabeyama abuwaanga ndi bano bali babaase.

⁶“Oyo oli ne kamaru, arekeeresie niko Roho aboolela chikanisa!

⁷ “Khu malaika oli mu kanisa eye Filatelefia andika oli: “Burume buno bwama khuyo ooli omutakatifu lundi owa ng'ali. Ali ne lufunguo lulwaba lwa Daudi; ne ekula kumuliango se aliio onyala wekala tawe, ne nga akwikala, se aliio onyala aakwikula tawe.

⁸Ese manyile niko okholanga, manyile ndi oli ne kamaani matiiti, waloonda kamekisio kase mala waaba omusuubilwa khwise. Nakhwikulila kumuliango nikwo omundu akhanyala ekala tawe.

⁹ Rekeeresia! Sipupu sia Sietani esio, babeeyi balomanga bali nibo Bayuda ne se bali Bayuda tawe, ndabakhola beche basikame mu bikele biowo. Balamanya bali ese nakhusiima.

¹⁰Sikila waliinda lilaka liase ne khukhwekhaliilikha, sesi ndakhuliinda bulayi mu saa eye kamakhako kalikho kakeecha khu sibala sioosi khukhaka babaandu be khu sibala.

¹¹Ese ndikho nicha khangu. Liinda bulayi nisio oli nasio nio omundu akhakhola ario akhunuula kumuruuru kwowo kwe liiula tawe.

¹² Ndakhola oyo oula abe enjeko mu Lukaangu lwa Wele wase, mala se aliruramo tawe. Ndamuandikakho lisina lia Wele wase, ne lisina lie lukoba lwa Wele wase, Yerusalemu luya, lukheekhe aasi khukhwama mwikulu wa Wele wase. Lundi ndamuandikakho lisina liase liiya.

¹³“Oyo ooli ne kamaru, arekeeresie niko Roho aboolela chikanisa!

¹⁴ “Khu malaika ooli mu kanisa eye Laotikia andika oli: “Burume buno bwama khu Amina; omusuubilwa lundi omuloli owa ng'ali, lirakikha lia bioosi nibio Wele abuumba.

¹⁵Ese manyile niko wakholile; namanya ndi se oli omunyifu namwe omubile tawe. Ese nenya ndi, andi oli silala khu bino.

¹⁶Ne sikila oli busa siyambola, se oli omubile namwe omunyifu tawe, ndikho nja khu khufuucha orure mukhanwa mwase!

¹⁷Ewe olomanga oli, ‘Ese ndi omuiinda, lundi ndi busa bulayi, ndi na buli siindu.’ Ne kakhali se wamanyile nga ne oli owe ngunyi lundi owe bubeeleli tawe! Ewe oli omutaambi, oli sichula, lundi omubofu.

¹⁸Khwako khusaba okule esahabu khukhwama khwise esahabu engwalaafu nio oindiaale. Lundi kula chingubo chiwaanga wifware mala webiimbe sichula siowo. Lundi okule kamafura weakhe chimoni nio obone.

¹⁹ Ese ndarafwiranga ne khuukuuma abo boosi nibo nasiima. Nono ba ne silukuluku mala wekanile bubwoni bwowo.

²⁰Rekeeresia! Ese nemile amuliango ndikhokhong'oonda, omundu yesi yesi oulila kumumilo kwase mala ekula kumuliango, ndengila munju mwewe mala ndie naye.

²¹Oyo oula, ndamuelesia niye bung'ali bwe khukhwikhala nase khu Ndebe yase eye bubwami, bulayi bwene nga sesi ne naula mala luno nekhaale alala ne Paapa wase khu Ndebe yewe eye bubwami.

²²“Oyo, ooli ne kamaru; arekeeresie niko Roho aboolela chikanisa.”