Read lubukusu Lif. 4 Bible Online

Lif. 4 - lubukusu bible

Lif. 4

¹Enyuma wa kano naba ne kamalola kakaandi mala nabona kumuliango kuuli khwasie mwikulu. Nio kumumilo kwauliilikha nga ekhoombi nikwo abeele naba naulilakho khale, kwalomaloma nase, ne kuloma kuli, “Niina wiche ano mala ndakhwekesia niko khukhwola kakholekhe enyuma wa kano”

² Abwenao Roho aanjichulamo. Mwikulu omwo Endebe eye bubwami yabaamo, ne omundu aba aakikhaalekho,

³mumoni mwewe mung'enang'ena nga kamabaale ke bukusi bwe angaaki kamawaanga, kamelamela ne kamarandaafu; ne lufutu lwaba lwakarire Endebe yoosi, lukoondo lwe lubookha.

⁴Chindebe che bubwami chichiindi kamakhumi kabili na chine chabotookhelela Endebe eye bubwami, ne basaakhulu kamakhumi kabili na bane baba bachiikhaalekho, befwarire chingubo chiwaanga ne chikuutwa che sahabu.

⁵ Khuburukhaka khwe lueni, likukuma ne libalukhaka lie fula biama mu Ndebe eye bubwami. Ebweeni we Ndebe eye bubwami, chinjaso saba chaba chikhosia, chino chaba roho saba ba Wele.

⁶ Lundi ebweeni we Ndebe eye bubwami siabao sisiafwaana nga enyanja eye sikioo sikwalaafu sibonekha nga epirauli. Bibuumbe bilamu bine bibiechula chimoni ebweeni nende nyuma biabotookhelela Endebe eye bubwami.

⁷Sie khunyoa siafwaana nga etalang'i, sie khabili siafwaana nga euunwa, sie khataru siafwaana mumoni nga omundu, ne sie khane siafwaana nga efuruusi epuruukhe.

⁸ Buli silala khu bibuumbe bie bulamu bine chana, siaba ne chindaa sita; mala siechulakho chimoni mukari ne nje. Kumuusi ne siilo, se bilekhanga khukhwimba bili: “Omutakatifu, Omutakatifu, Omutakatifu ali Omwami Wele Omunyali Owa Bioosi; Owabao, oliio, lundi oolikho owiicha.”

⁹Bibuumbe bilamu bine chana ebio biemba chinyimbo che luyali, ne lukoosi ne khu khuupila orio oyo owikhaale khu Ndebe eye Bubwami, omenyile mindali na mindali. Nga biakholanga birio,

¹⁰basaakhulu kamakhumi kabili na bane abo basikama ebweeni woyo owikhaale khu Ndebe eye bubwami, mala basaaya oyo omenyile mindali na mindali. Bamwaata aasi chikuutwa chabwe che bubwami ebweeni we Ndebe eye bubwami mala bemba bali:

¹¹“Omwami wefwe lundi Wele wefwe! Ewe wolaana oeebwe luyali, lukoosi ne bunyali, Sikila ewe wabuumba bibiindu bioosi, ne khulwe lilienya liowo biaebwa limenya ne bulamu.”