Read lubukusu Lif. 5 Bible Online

Lif. 5 - lubukusu bible

Lif. 5

¹ Nabona sitabu mu mukhono kumuseecha kwoyo owikhalanga khu Ndebe eye bubwami, siechula kamaandiko chimbeka chombi mala siapwakhwo kimiiuri saba.

²Lundi nabona malaika owe Bunyali bukali lukali, aaloma ne kumumilo kumuboofu, ali, “Naanu owolaana khurusiakho kimiiuri kino mala abambule sitabu sino?”

³Ne se abao na mulala yeng'ene mwikulu namwe khu sibala namwe aasi we sibala onyala abambula sitabu chana mala alolemo tawe.

⁴Nio nalila lukali sikila se abao na mulala owolaana khubambula sitabu chana, namwe aasilolemo tawe.

⁵ Nio, mulala khu basaakhulu abo amboolela ali, “Okhalila tawe. Lola! Etalang'i khukhwama mu kholo eya Yuda, Omukali, owe lisaaye lia Daudi, abeele omukhili mwiie, ne anyala arusiakho kimiiuri saba mala abambula sitabu esio.”

⁶ Nio, nabona Limeeme liemile akari we Ndebe eye bubwami chana, bibuumbe bilamu bine ne basaakhulu boosi balibotookheleele, Limeeme liabonekha nga nilio beerire. Liaba ne kimisaanga saba ne chimoni saba; nibo baroho saba ba Wele barumirwe mu sibala sioosi.

⁷Limeeme liaacha mala liabukula sitabu chana khukhwama mu mukhono kumuseecha kwoyo owikhalanga khu Ndebe eye Bubwami.

⁸ Nga ne liakhola lirio bibuumbe bilamu bine chana ne basaakhulu kamakhumi kabili na bane chana bakwa aasi ebweeni we Limeeme. Buli sia mulala aba ne lituungu ne sibuumba sie sahabu siechuule bimuli bie khukhwosia biiunya kumuuya kumulayi, bimuli bino bili lisaba lie babaandu ba Wele.

⁹ Bemba kumwenya kumuya bali: “Ewe wolaana khubukula sitabu ne khurusiakho kimiiuri kiasio, osibambule. Sikila ewe werwa, mala khulwe lifwa liowo lie khukhwerusia wasikula babaandu ba Wele khukhwama mu buli kholo, lulomo, baandu ne lukoondo lwe babaandu boosi.

¹⁰ Wabakhola bubwami bwe basaayi khukhalabanila Wele wefwe, mala balamiia khu sibala.”

¹¹ Lundi nalola, mala naulila bamalaika, chielefu ne chimilioni! Bemile babotookhelele Endebe eye bubwami; bibuumbe bie bulamu bine ne basaakhulu,

¹²mala bemba ne kumumilo kwe angaaki bali: “Limeeme lilierwa lili liliolaana khunyoola bunyali, kimiaandu, limanya, ne kamaani, lukoosi, luyali ne fuma!”

¹³Nio naulila buli sibuumbe mwikulu, khu sibala, mu sibala sie aasi ne mu nyanja, bibuumbe bilamu bioosi mu limala lioosi biembanga bili; “Khuyo owikhalanga khu Ndebe eye bubwami ne khu Limeeme, efuma ne lukoosi, luyali ne bunyali bibe khwinywe mindali na mindali.”

¹⁴Bibuumbe bilamu bine chana biakobosia bili, “Amina!” Basaakhulu chana bakwa aasi mala basaaya