Read lubukusu Lif. 6 Bible Online

Lif. 6 - lubukusu bible

Lif. 6

¹Nio nabona Limeeme liafunaka kumuuri kwe khunyoa khu miuuri saba, mala naulila silala khu bibuumbe bine, ne siboola mu mumilo kukwauliilikha nga likukuma lie fula ne kuloma kuli, “Yiicha!”

² Nalola mala nabona efarasi ewaanga. Okitimia aba asutile buyiingo mu ngaaki, mala aebwa ekuutwa eye bubwami. Aakitimia nga omuuli ocha khuula.

³Nga, Limeeme liekula kumuuri kwa khabili, naulila sibuumbe silamu sia khabili ne siloma sili, “Yiicha!”

⁴ Efarasi ekiindi, embesemu yarura enje. Okitimia aebwa bunyali khureera liie khu sibala nio babaandu berane babene khu beene. Aebwa embalu emboofu.

⁵ Nga, Limeeme liekula kumuuri kwa khataru; naulila sibuumbe silamu sia khataru ne siloma sili, “Yiicha!” Nalola; nabona efarasi emali. Okitimia asutile mu ngaaki bikelo bibili mukhono mwewe.

⁶Naulila sisiauliilikha nga kumumilo kukwama akari we bibuumbe bilamu bine, kwaloma kuli, “Sikalabo silala sie bufu bwe ngano khulwe kumuruungo kwe ndaalo, ne bikalabo bitaru bie shayiri khulwe kumuruungo kwe ndaalo. Ne kakhali okhonaka kamafura ka museituni namwe liruuti lie kimisabibu tawe.”

⁷Nga, Limeeme liekula kumuuri kwa khane; naulila sibuumbe silamu sikhola khane ne siloma sili, “Yiicha!”

⁸ Nalola, nabona efarasi emuluku yabao. Lisina lioyo okitimia bali Lifwa, ne Makoombe yakiloondakho siimbi. Baebwa bunyali khu sitonyi silala khu bine bie sibala; beere khulwe khurumikhira liie, enjala, bulwaale, ne chisaang'i che mundaa.

⁹Nga, Limeeme liekula kumuuri kwa kharaano. Nabona aasi owa alutare kimiooyo kiaabo babeerwa sikila khuboola elomo eya Wele, ne khuba basuubilwa khu buloli bwabwe.

¹⁰Baapa luyoka mu mumilo kwe angaaki ne baloma bali, “Omwami owe Bunyali, omutakatifu lundi owa ng'ali! Lilabukula siise siina nio khalakile babaandu be khu sibala ne khubaelesia sinyaasio khulwe khukhwira efwe?”

¹¹Buli mulala khu nibo aebwa ekaanjo ewaanga, mala baboolelwa khuola khu siise, khukhwola bukali bwe bakholi basiaabwe, ne bakristo berwe nga bosi baba.

¹² Lundi nabona Limeeme chana liekula kumuuri kukhola sita. Literema liboofu lie sibala liabao ne enyanga yamaliia ti nga embilo, ne kumwesi kwakaluukhanila elala kwekela kumubesemu pe nga kamafuki.

¹³ Ching'enieesi chakwa khu sibala nga chinduli chimbisi ne chikwa khukhwama khu mutuli ekhungu engali ne ucha.

¹⁴ Likulu liakoriokha nga sitabu nisio baulukuuse ne buli sikulu ne likenga biarusibwa niio bibechanga.

¹⁵ Nio babaami be khu sibala ne baruki, bakhulu be liie, baiinda nende be bunyali ne babaandu babaandi boosi, nasioobi ne balekhuule, bekisa mu mabina ne mu mbangaachi mwe chinyaanda ne khu bikulu.

¹⁶ Balaanga bikulu ne chinyaanda bali, “Khemukhukwekho mala mukhukise khukhwama mumoni choyo owikhaale khu Ndebe eye Bubwami; ne khu lirima lie Limeeme!

¹⁷ Endaalo emayaanu eye lirima liabwe yolile ne naanu onyala emao?”