Read lubukusu Lif. 7 Bible Online

Lif. 7 - lubukusu bible

Lif. 7

¹ Enyuma wa kano nabona malaika bane bemile khu mbeka chine che sibala, baambile chikhuungu chine, nio ekhuungu yosi yosi ekhaucha khu sibala namwe khu nyanja namwe khu murongooro kwosi kwosi tawe.

²Lundi nabona malaika okundi ne aniina khukhwama ebukwe ne kumuuri kwa Wele omenyile mindali. Alaanga malaika bane ne kumumilo kumuboofu, malaika nibo Wele aelesia bunyali khukhwonaka sibala ne nyanja.

³ Malaika oyo aloma ali, “Mukhonaka sibala ne nyanja namwe kimirongooro tawe; khukhwola nga ne khura kumuuri khu bweeni bwe bakholi ba Wele.”

⁴Mala naboolelwa ndi bukali bwaabo ba barerwakho kumuuri kwa Wele khu bweeni bwabwe baba babaandu chielefu emia ndala ne kamakhumi kane na bane. Bama mu kholo likhumi na chibili cha Isiraeli,

⁵be kholo eya Yuda baba chielefu likhumi na chibili. Be kholo eya Rubeni baba chielefu likhumi na chibili. Be kholo eya Kati baba chielefu likhumi na chibili.

⁶Be kholo eya Asheri baba chielefu likhumi na chibili. Be kholo eya Nafutali baba chielefu likhumi na chibili. Be kholo eya Manase baba chielefu likhumi na chibili.

⁷Be kholo eya Simioni baba chielefu likhumi na chibili. Be kholo eya Lawi baba chielefu likhumi na chibili. Be kholo eya Isakari baba chielefu likhumi na chibili.

⁸Be kholo eya Sebuluni baba chielefu likhumi na chibili. Be kholo eya Benjamini baba chielefu likhumi na chibili. Be kholo eya Yusufu baba babaandu chielefu likhumi na chibili.

⁹Enyuma wa kano nabona babaandu bakali po, babaandu nibo omundu akhanyala abala boosi tawe! Khukhwama buli sibala, buli luuya, buli kholo nende buli lulomo, bema ebweeni we ndebe eye bubwami eye Limeeme befwarire chingubo chiwaanga, mala basutile mu ngaaki kamakheendu.

¹⁰Baloma ne kumumilo kumuboofu bali, “Buonia buli bwa Wele wefwe, owikhalanga khu Ndebe, ne khukhwama khu Limeeme!”

¹¹Ne bamalaika boosi benyokha bema, babotookhelela endebe eye bubwami, basaakhulu, ne bibuumbe bilamu bine. Baakwa aasi mafumala ebweeni we Ndebe chana, ne basaaya Wele;

¹²ne baloma bali; “Amina! Efuma, luyali, limanya, khu khupa orio, lukoosi, kamaani, ne bunyali bili bia Wele wefwe mindali na mindali! Amina!”

¹³Mulala khu basaakhulu andeeba ali, “Baandu siina babefwarire chingubo chiwaanga bano, ne bamile waena?”

¹⁴ Namukobosia ndi, “Omwami, se manya tawe. Ewe niwe omanyile.” Ne amboolela ali, “Bano bali babaandu baonile khubirira mu khupisibwa siibi. Basiinga chingubo chabwe mu malasile ke Limeeme.

¹⁵Kano kakila ne bema ebweeni we Ndebe eya Wele ne khumukholela niye siilo ne kumuusi mu Lukaangu lwewe. Khubao khwoyo owikhalanga khu Ndebe eye bubwami khulabaliinda.

¹⁶ Se baliiulilakho enjala namwe bulesia namwe enyanga namwe bukhafu bwosi bwosi se bulibosia tawe,

¹⁷ sikila Limeeme liili akari we Ndebe eye bubwami, lilaba omwaayi wabwe, ne alabarangirira abayile a sebele che kameechi kaananga bulamu. Mala Wele alabeeya kamasika mumoni mwabwe.”