Read lubukusu Lif. 8 Bible Online

Lif. 8 - lubukusu bible

Lif. 8

¹Nga Limeeme liekula kumuuri kukhola saba, mwikulu mwasila busa chi, khulwe nusu eye saa ndala.

²Nio nabona malaika saba bemile ebweeni wa Wele, mala baebwa chikhoombi saba.

³ Malaika okundi, owaba ne sibuumba sie sahabu sie khurakho bie khukhwosia biiunya kumuuya kumulayi lukali, echa mala eema a alutare atakatifu. Aebwa biiunya kumuuya kumulayi bikali, khutasa khu lisaba lie babaandu ba Wele boosi, mala abiiane khu alutare eye sahabu eyaba ebweeni we Ndebe eye bubwami.

⁴Ne liliisi lie biiunya kumuuya kumulayi lianiina alala ne lisaba lie babaandu ba Wele khukhwama mukhono mwa malaika owimile ebweeni wa Wele.

⁵ Nio malaika chana abukula sibuumba sie khukhwoseliakho biiunya kumuuya kumulayi, echusiakho kamaanda ke kumulilo khukhwama khu alutare, mala akachukha khu sibala. Likukuma, libalukha, chimbeni ne literema lie sibala biabao.

⁶Nio malaika saba be chikhoombi saba berekekha khuchipa.

⁷ Malaika owe khunyoa apa ekhoombi yewe. Kamaarara, ne kumulilo, bitubanisiibwe ne kamafuki, biachukhwa khu sibala. Sitonyi silala khu bitaru sie sibala siosibwa, sitonyi silala khu bitaru sie kimirongooro siosibwa ne buli lunyaasi lwaya.

⁸Malaika okhola khabili apa ekhoombi yewe. Sisiindu sisiafwaana nga sikulu siboofu silikho ne siyia siamwaatwa mu nyanja. Sitonyi silala khu bitaru sie nyanja siakaluukhana siekela kamafuki,

⁹sitonyi silala khu bitaru sie bibuumbe bilamu bie mu nyanja biafwa, ne sitonyi silala khu bitaru sie chimeeli chonakwa.

¹⁰ Nio, malaika okhola khataru apa ekhoombi yewe. Eng'enieesi emboofu, eyaburukha nga enjaso, yakwa khukhwama mu ngaaki mala yakwa khu sitonyi silala khu bitaru sie chinjichi ne chisebele che kameechi.

¹¹ (Lisina lie eng'enieesi chana bali, “Bululu”) sitonyi silala khu bitaru sie kameechi siakaluukhana siekela silulu, mala babaandu bakali bafwa sikila banywa kameechi, kakalukhaane kekela kamalulu.

¹² Nio malaika okhola khane apa ekhoombi yewe. Sitonyi silala khu bitaru sie nyanga siapwa, ne sitonyi silala khu bitaru sie kumwesi, ne sitonyi silala khu bitaru bie ching'enieesi, biatibia sitonyi silala khu bitaru sie buwaanga biabio, se bwabao buwaanga khu sitonyi silala khu bitaru sie kumuusi ne akhaba sitonyi silala khu bitaru sie silo tawe.

¹³Nio, nalola, mala naulila efuruusi eyaba ne purukha mu ngaaki tibotibo, yaloma mu mumilo kumuboofu eli, “Engunyi! Engunyi! Engunyi khwaabo abo boosi bamenyile khu sibala nga bakhaulile khu khupwa khwe chikhoombi nicho malaika babaandi bataru khukhwola bape!”