Read lubukusu Lif. 9 Bible Online

Lif. 9 - lubukusu bible

Lif. 9

¹Nio malaika okhola kharaano aapa ekhoombi yewe. Ese nabona eng'enieesi eyaba ne ekwile aasi khu sibala, mala yaebwa lufunguo lwe liloo likhali ne sisiakamo tawe.

² Eng'enieesi yekula liloo elio, mala liliisi liamamo nga liliisi khukhwama mu mwanya kwe bukhafu kumuboofu; buwaanga bwe nyanga ne mbeo biamaliisibwa ne liliisi khukhwama mu mwanya omwo.

³ Chisike chaama mu mwanya mala checha khu sibala mala chaebwa bunyali busa nga bwa walute.

⁴ Chaboolelwa chikhonakakho bunyaasi namwe kimirongooro namwe simelwa sisiindi siosi siosi tawe; ne kakhali khunyaasia babaandu ba baaba ne bakhali ne kumuuri kwa Wele khu bweeni bwabwe tawe.

⁵Chisike chino se chasibulwa khukhwira babaandu bano tawe, ne kakhali khubaa sinyaasio siong'ene khu miesi kiraano. Burafu bwe sinyaasio siacho buli nga burafu bwe luboola lwa walute.

⁶ Mu miesi kiraano ekio, bakhayime lifwa, ne se bakhalinyoole tawe; bakhenye khufwa, ne kakhali lifwa likhabelukhe.

⁷ Chisike chafwaana nga chifarasi chicherekekha liie; khu mirwe kiacho chaba ne sisiaba nga chikuutwa che sahabu, ne mumoni mwacho mwaba nga mumoni mwe babaandu.

⁸ Lichuune liacho liaba nga lie bakhasi, kameno kacho kaba nga kameno ke talang'i.

⁹ Bifuba biacho biafuumwa ne sisiabonekhana nga chingabo che bichuuma, ne luyoka lulwakholwa ne chindaa chacho lwaba nga luyoka lwe kamakaari kamakali kakakhweswanga ne chifarasi ne kacha mwiie.

¹⁰Chili ne bibuno ne chimboola nga cha walute, ne bibuno biacho bilimo kamaani ke khunyaasia babaandu khulwe kimieesi kiraano.

¹¹Chili no mwami ochamiia, niye malaika owimelelanga liloo likhali ne sisiakamo tawe. Lisina liewe mu Lueburania lili Abadoni; mu Lukiriki lili Apoliyoni (liboola lili “Omwonaki”)

¹²Sinyaasio sie khunyoa siawele, enyuma wa sino, bisiliio binyaasio bibili bibiindi bikheche.

¹³ Nio malaika okhola sita apa ekhoombi. Ne aulila kumumilo ne kwama sia mbeka chine cha alutare eye sahabu eyema ebweeni wa Wele.

¹⁴Kumumilo chana kwaboolela malaika okhola sita kuli, “Kangulula malaika bane abo, bababowa e luuchi luboofu lwa Efurati!”

¹⁵Malaika bane abo balekhuulwa; ba baaba ne berekekhe esaa eyo eye endaalo ng'ene, ne kumwesi kwene ne kumwiiko kwene khukhwira sitonyi silala khu bitaru sie babaandu boosi.

¹⁶Naboolelwa bukali bwe banamae, baba chimilioni chimia chibili.

¹⁷Ne mu malola kase nabona chifarasi, ne bachitimia baba ne chingabo che khu bifuba chimbesemu nga kumulilo, chimbuusi ching'enang'ena, ne chifwaana kamaki nga kumulilo kumubuusi kuburukha. Kimirwe kie chifarasi kiaba nga kimirwe kie chitalang'i ne mukhanwa mwacho kumumilo kwamamo, liliisi, ne kumulilo kumurafu kufwaana kamaki.

¹⁸Sitonyi silala khu bitaru sie babaandu sieerwa ne lufu chingano chitaru echo: kumulilo; liliisi, ne kumulilo kufwaana kamaki kukwama mukhanwa mwe chifarasi.

¹⁹Sikila bunyali bwe chifarasi buli mukhanwa mwacho ne mu mikhiinga kiacho. Kimikhiinga kiacho kili nga chindemu chiili ne kimirwe, mala chikirumikhira khuumisia babaandu.

²⁰ Babaandu boosi ba barama abo, boosi bakheerwa ne lufu luno tawe, se bekanila nibio babeene baba ne bakholile tawe. Se balekha khusaaya bisieeno, namwe bifwaani bie sahabu, efwesa, kumukasa, libaale ne kumurongooro, bibiindu bikhabona namwe biaulila, namwe biakeenda tawe.

²¹Se bekanila bubwiri bwabwe, bufumu bwabwe, sifwaabi siabwe namwe bubwifwi bwabwe tawe.