Read lubukusu Ru. 1 Bible Online

Ru. 1 - lubukusu bible

Ru. 1

¹Mu ndaalo nicho babemeelesi bemeelelanga, enjala yabao mu sibala sia Isiraeli. Nio omundu mulala owa Betelehemu mu Yuda, auyila mu sibala sia Moabu. Aaba no mukhasi ne babaana bewe babili be sisoleeli.

²Lisina lio mundu oyo liaba bali Elimeleki ne lisina lio mukhasi wewe liaba bali Naomi. Ne kamasina ke babaana bewe kaba bali Mahiloni ne Kilioni. Babaandu bano baba Baefurati khukhwama e Betelehemu mu Yuda. Bacha mu sibala sia Moabu mala bamenyayo.

³Ne kakhali Elimeleki afwa, mala Naomi alekhwa yeng'ene ne babaana bewe boombi.

⁴Basoleeli abo batekhia bakhaana Bamoabu: Oripa ne Ruthi. Naomi ne babaana bewe boombi bamenya embi kimiiko ekhumi, mala

⁵Mahiloni ne Kilioni boosi bafwa. Nio Naomi afwilwa omuseecha ne babaana bewe boombi.

⁶Enyuma we siise Naomi aulila ali Wele Omunyali Owa Bioosi aeleesie babaandu bewe likesa lilayi. Nio Naomi ne mukha walimusaani barekukha khukhwama Moabu

⁷khukobola Yuda. Ne basiili khu ngila,

⁸Naomi aboolela bakhaana bewe abo ali, “Khe mukobole engo wa maayi benywe, buli sia mulala. Wele Omunyali Owa Bioosi akhoya aaba omulayi khwinywe nga ne mwabeele balayi khwise ne babaafwa.

⁹Lundi Wele Omunyali Owa Bioosi amunyalile munyoole baseecha mala mube ne chinju.” Abwenao Naomi abakheesia, abekwayila ne ababoolela ali, “Bulayi, muliindwe.” Ne kakhali barakikha khulila.

¹⁰Bamuboolela bali, “Tawe! Efwe khulacha ne nawe mu baandu bowo.”

¹¹Naomi abakobosia ali, “Kobolayo bakhaana base. Siina sikila ne mwenya khucha ne nase? Ese se nyala nasaala babaana babaandi bamwilakho tawe.

¹²Khe mukobole engo wenywe. Ese naloosiaalile. Se nyala naba no museecha lundi tawe. Ne akhaba ne nibaasia khuuba no museecha siilo sia luno mala esaale babaana,

¹³munyala khuliinda nabwila bachoa ku? Munyala mwamenya kimiiko kimikali ne mukhali ne baseecha ku? Tawe bakhaana base. Mumanyile muli kano se kanyalikha tawe. Wele Omunyali Owa Bioosi ayimwaata, mala ese mukholela enywe siisa[1] sikali.”

¹⁴Bakhasi abo balila lundi. Nio Oripa ekwayila masalaawe Naomi ne aloma ali, “Bulayi, nono oliindwe.” Ne Ruthi akhayila khu masalaawe.

¹⁵Nio Naomi aboolela Ruthi ali, “Wangooyo akoboole mu baandu bewe ne khu bawele bewe. Wesi kobolayo nga niye.”

¹⁶Ne kakhali Ruthi naye amukobosia ali, “Okhanjikoonjelela ese khukhulekha namwe khukobola ewefwe tawe! Niio ocha, ndacha ne niio omenya, ndamenyayo nawe. Babaandu bowo balaba babaandu base, ne Wele wowo alaba Wele wase.

¹⁷Niio olifwiila, sesi ndifwilao, lundi abwenao niio endisiikhwa. Wele Omunyali Owa Bioosi akhoya ambeelesie kumunaanio kaba bali se embiikha endakaano yino tawe. Lifwa liong'ene[2] liliinjaukhasia ne nawe!”

¹⁸Nga Naomi ne abona ali Ruthi erusilie elala khucha ne naye, se aalomalomakho khu niye lundi tawe.

¹⁹Nono Naomi ne Ruthi bachiililila nabwila nga boola e Betelehemu. Nga boola e Betelehemu, babaandu boosi be mu lukoba besiindukha. Mala bakhasi bareebana bali, “Oyuno niye Naomi ku?”

²⁰Naomi abakobosia ali, “Mukhanaanga muli Naomi tawe. Naange muli Mara. Sikila Owe Bunyali bwoosi akhola limenya liase liaba lilume.[3]

²¹Nga ne naama ano, naba naindiaala, ne kakhali Wele Omunyali Owa Bioosi angoboosiisie ne ekhalikho ne sisiindu tawe. Siina sikila ne munaanga muli Naomi mala Omwami Wele Omunyali Owa Bioosi andereere kumunaanio ne siibi?”

²²Nono Naomi no mukhaana wewe Omumoabu bakobola khukhwama mu sibala sia Moabu. Nga ne boola e Betelehemu, eshayiri yaba yolile likesa.