Read lubukusu Ru. 2 Bible Online

Ru. 2 - lubukusu bible

Ru. 2

¹Nono Naomi aba ne omulebe omuiinda bali Boasi. Ne Boasi aaba owe luuya lwa Abimeleki.

² Endaalo ndala Ruthi Omumoabu aboolela Naomi ali, “Khayo nje mu mukuunda nangale biakhulia nibio bakesa balekhile enyuma. Ndi na ng'ali ndi ndanyoolayo omundu okane akholele siisa andekhele nangale nibio niye alekha enyuma.” Naomi amukobosia ali, “Khoche mukhaana wase.”

³Nio Ruthi arekukha asamula e mukuunda, mala aloonda enyuma we bakesa ne angala biakhulia nibio balekhanga enyuma. Ruthi oola mu mukuunda kwa Boasi owe luuya lwa Elimeleki ne akhamanya tawe.

⁴Enyuma we siise sitiiti, Boasi omwene echa khukhwama e Betelehemu. Akheesia bakholi bewe ali, “Wele Omunyali Owa Bioosi abe ne nanywe!” Ne bakholi bakobosia bali, “Wele Omunyali Owa Bioosi akhubiite ewe chikhabi.”

⁵Boasi areeba omukholi owaba omwimeelesi owe likesa ali, “Omukhasi omuele oyo owa naanu?”

⁶Omwimeelesi amukobosia ali, “Ali omukhaana Mumoabu owakoboole ne Naomi khukhwama mu sibala sia Moabu.

⁷Andeebire mulekhe aloonde enyuma we bakesa ne angala biakhulia nibio balekha enyuma. Akholile khukhwama makhelebeende khukhwola siise sino ne se aolilekho ne atiiti ene tawe.”

⁸Mala Boasi aboolela Ruthi ali, “Rekeeresia mukhaana wase, okhacha wangala biakhulia mu mukuunda kukuundi busa tawe. Lundi okhalekhakho kumukuunda kuno tawe. Chiililila khuloonda khu bakholi base be siikhasi.

⁹Loleelesia mu mikuunda nikio bachamo khukesa biakhulia mala obaloondekho. Nakambiile bakholi base baele be siseecha bakhakhunaania tawe. Ne oli ne bulesia onyala wacha mala wanywa kameechi ke mu soongo niko bakholi base be siseecha baele bechuusie.”

¹⁰Nio Ruthi enama ebweeni wa Boasi bubweeni bwewe bwetiila asi. Ruthi aloma ali, “Siina sikila ne ukholela siisa mala ese omukwa busa?”

¹¹Ne kakhali Boasi amukobosia ali, “Naulila koosi niko wakholela masalaao khukhwama nga omuseecha wowo ne afwa. Lundi nauliile nga walekha raraao ne maao ne sibala siowo, mala wecha khumenya mu baandu nibo abeele okhamanya khale tawe.

¹²Wele Omunyali Owa Bioosi akhoya akhuruunga niko wakhola. Okhoya wanyoola kumuruuru kumwichufu khukhwama khu Wele Omunyali Owa Bioosi, Wele owe Baisiraeli, niye ewe wechilekho khuyiima buliindi.”

¹³Ruthi akobosia ali, “Mwami wase ewe wakholeele siisa lukali. Sikila ewe wamboleele ne khukhundomalomela bulayi akhaba ese ne ekhali mulala khu bakholi bowo tawe.”

¹⁴Mu siise sie khulia, Boasi aboolela Ruthi ali, “Khe wiiche ano olie siakhulia. Bukulakho kumukaati oronge mu muunyu.” Nono Ruthi ekhala embi ne bakholi, ne Boasi amusendao biakhulia bibioosie. Alia khukhwola nga ne ekura, biarama.

¹⁵Nga ne enyokha khucha khukhwangala, Boasi alaka bakholi bewe be siseecha ali, “Lekha angale akhaba akari we binywa, ne mukhamurafwira tawe.

¹⁶Ne lundi musomolele bilala khukhwama mu binywa mumulekhele angale. Ne mukhamurafwira tawe.”

¹⁷Nono Ruthi achiililila khukhwangala eshayiri mu mukuunda khukhwola ekolooba. Nio akiuula anyoola ali echuusie siikula silala sie eshayiri.

¹⁸Abukula biakhulia asuta ayila mu lukoba ekesia masalaawe Naomi bioosi nibio angala. Amua akhaba ne biakhulia nibio aliayo biarama.

¹⁹Naomi areeba Ruthi ali, “Wangaale waena bino bioosi? Okholile mu mukuunda kwa naanu? Wele aane chikhabi khu mundu okhukholeele bulayi buno!” Nio Ruthi aboolela Naomi ali, “Kholile mu mukuunda kwo omundu bali Boasi.”

²⁰ Naomi aloma ali, “Chikhabi cha Wele Omunyali Owa Bioosi chibe khu Boasi. Bulayi bwa Wele Omunyali Owa Bioosi se bulekhanga balamu ne babaafwa tawe!” Boasi ali omulebe wefwe owe aembi[4].

²¹Nio Ruthi Omumoabu aloma ali, “Lundi, ambooleele ali ‘Chiililila khuuba embi ne bakholi base khukhwola nga ne bamala likesa.’ ”

²²Naomi aboolela Ruthi omukhaana wewe ali, “Buli bulayi mukhaana wase oche ne bakholi bewe be siikhasi ne busa okhola orio wacha mu mukuunda kukuundi bakhunanisiliamo.”

²³Nono Ruthi achiililila khukhola embi ne bakholi ba Boasi khukhwola nga likesa lie eshayiri ne ngaanu ne liawa. Ruthi achiililila khumenya ne masalaawe.