Read lubukusu Ru. 3 Bible Online

Ru. 3 - lubukusu bible

Ru. 3

¹Endaalo ndala Naomi aboolela Ruthi ali, “Mukhaana wase, se ekhoya ekhuyimile enju nio nawe obe bulayi tawe ku?

²Boasi, owe bakholi nibo wakholilenge nabo, ali omulebe wefwe. Nono rekeeresia. Luno ekolooba kane auule eshayiri.

³Nono yisiinga, wiakhe kamafura, mala wifwaare chingubo chowo chindayi lukali mala oche niio auulila biakhulia. Ne kakhali okhemanyisia khu niye tawe, nabwila amala khulia ne khunywa.

⁴Ne manyilisia abuundu niio acha khukona. Ne liilo ne limuambile, cha omusiimbule ebikele biewe mala okoneo. Alakhuboolela nisio okhola.”

⁵Ruthi amukobosia ali, “Ndakhola buli siindu nisio olomile.”

⁶Nio Ruthi acha niio bauulila mala akhola bulayi bwene nga masalaawe ne aamuboolela.

⁷Nga Boasi ne amala khulia ne khunywa, ekhoya. Acha niio biakhulia biabuusibwa, akona andulo wabio, liilo liamuaamba. Ruthi acha simiinywi, amusiimbula mala akona ebikele biewe.

⁸Oli mu silo akari, Boasi atitukha, eyuusia, mala auka khunyoola omukhasi amukonile ebikele.

⁹Areeba ali, “Ewe naanu?” Ruthi amukobosia ali, “Omwami, ese ndi Ruthi. Mbiimbe engubo yowo sikila ewe oli omulebe[5].”

¹⁰Boasi aloma ali, “Wele Omunyali Owa Bioosi akhubiite chikhabi mukhaana wase. Bulayi nibwo okholile buno bukhila bwe khunyoa. Sikila se wiyiimiile babaandu baele baali baiinda namwe batambi tawe.

¹¹Nono mukhaana wase, okheendekhelela tawe. Ndakhukholela buli siindu siosi siosi nisio osaba. Sikila buli mundu yesi mu lukoba luno, amanyile ali ewe oli omukhasi omweyikinwa.

¹² Kali kang'ali ese ndi omulebe wenywe, ne kakhali aliio omulebe okundi owe enju yenywe owe aembi khukhuukhilakho ese.

¹³Rama ano siilo siramire sino. Kumutikhinyi khulamanya kaaba bali akhwilakho namwe tawe. Akhola ario, aba bulayi, ne alekha khukhola ario, Nga Omwami Wele Omunyali Owa Bioosi ne amenyile mindali, ndakhwilakho. Nono khokone nabwila busia.”

¹⁴Nono Ruthi akona abikele bia Boasi nabwila bwasia. Ne anyoa enyokha makhelebeende enje ne esiili emali. Enyokha makhelebeende sikila Boasi se enya Ruthi amanyikhane ne omundu yesi yesi bali abeleo tawe.

¹⁵Boasi aboolela Ruthi ali, “Reera engubo yowo.” Ruthi akhola ario. Nio Boasi amuchukhilakho eshayiri eyoola embi biikula bibili. Boasi amuyeeta khukhwetiuukha mala Ruthi akobola mu lukoba ne biakhulia ebio.

¹⁶Nga Ruthi ola engo, masalaawe Naomi amureeba ali, “Maayi, ke lukeendo?” Ruthi amuboolela koosi niko Boasi amukholeele.

¹⁷Aloma ali, “Boasi ambooleele ali, se khoyela khukobola niio oli mu makhono busa tawe. Nio amba eshayiri biikula bibili bino.”

¹⁸Naomi aboolela Ruthi ali, “Nono yifwiilisia, nabwila obona sikane siikholekhe. Boasi se kane aole nakhatabusia kamakhuwa kano luno tawe.”