Read lubukusu Ru. 4 Bible Online

Ru. 4 - lubukusu bible

Ru. 4

¹Boasi acha khu kookwa eli a silibwa sie lukoba, mala ekhala asi. Omulebe owe enju eya Elimeleki, niye Boasi alomalomakho echa. Nio Boasi amuboolela ali, “Khe wiiche ano mulebe wase, wikhale asi.” Nio acha, ekhala asi.

²Boasi alaanga basaakhulu ekhumi be lukoba, mala ababoolela bekhala asi.

³Ne bamalile khukhwikhala, aboolela omulebe oyo ali, “Naomi akoboole khukhwama mu sibala sia Moabu. Mala alenyanga khukusia sitonyi sie kumukuunda kukwaba kwa walimusaani, omulebe wefwe Elimeleki.

⁴Nono nibaasiisie ndi ekhuboolele. Ne wenya khukukula, kukule ebweeni we sisiikhasio sino ne basaakhulu be babaandu base. Ne waaba ne okhenya khukusikula tawe, mboolele. Sikila omundu okhoyela khukusikula ali ewe. Ewe niwe onyoa nio ese nondekho.” Omundu chana aloma ali, “Ndakusikula.”

⁵Nio Boasi akobosia ali, “Waaba ne osikula kumukuunda kuno khukhwama khu Naomi, aba nono oleela akhaba khu Ruthi[6] yesi, namulekhwa omukhaana Mumoabu. Nio kumukuunda kurame mu lisina lie lisaaye lia walimusaani.”

⁶Nio omulebe oyo akobosia ali, “Kaaba kario aba ese se endakukula tawe. Sikila nakhola ndio, ndonaka kumukabwa kwe babaana base. Khokusikule. Ese se nyala tawe.”

⁷ Nono mundaalo ng'eneecho, kwabao kumwiima kwe khusikula ne khukulaana kimiaandu. Yaba khukhwekesia bali babaandu bakulaanile kimiaandu, omundu afuulanga siraaro aelesia okula. Mungila yino, Baisiraeli bekesia bali kamakhuwa kaweele.

⁸Nono nga omulebe oyo aboolela Boasi ali, “Khokukule wamwene,” afuula siraaro[7] asiielesia Boasi.

⁹Nio Boasi aboolela basaakhulu ne babaandu ba babao boosi ali, “Endaalo eya luno enywe mweesi muli baloli. Nakulile khukhwama khu Naomi buli siindu sisiaba sia Elimeleki ne babaana bewe babili babaafwa, Kilioni ne Mahiloni.

¹⁰ Lundi, Ruthi omukhaana Mumoabu, ngwa Mahiloni, abeele omukhasi wase. Lino lilalindila be enju eya walimusaani kimiaandu. Lundi lisaaye lia walimusaani lilachiililila akari we babaandu bewe ne mu lukoba lwewe. Enywe muli baloli endaalo eya luno.”

¹¹ Nio Basaakhulu ne babaandu ba baaba a silibwa baloma bali, “Ee, khuli baloli. Wele Omunyali Owa Bioosi akhoyeele akhola omukhasi wowo aba nga Raeli ne Lea, babasaalila Yakobo babaana bakali. Ne ewe okhoya waba omuiinda mu Efurati, lundi omanyikhaane mu Betelehemu.

¹² Babaana nibo Wele Omunyali Owa Bioosi kane akhuue mu mukhasi omuele yuno, bakhoya bakhole enju yowo ebe nga eya Peresi niye Tamari asaalila Yuda.”

¹³Nono Boasi ela khu Ruthi, mala Ruthi aba omukhasi wewe. Wele Omunyali Owa Bioosi abiita Ruthi chikhabi, aesia asaala omwana owe sisoleeli.

¹⁴Nio bakhasi baboolela Naomi bali, “Wele Omunyali Owa Bioosi afume, ookhakhulekhile ne okhali no mulebe tawe. Ne lisina lio mwana yuno, likhoya liamanyikhana mu Isiraeli!

¹⁵Omwana yuno niye okhakhuwe kamaani mala akhuliinde mu buloosi bwowo. Mukho musaani akhusiima, lundi akhila babaana saba be siseecha. Luno akhusaaliile omwichukhulu owe sisoleeli.”

¹⁶Nio Naomi abukula omwana amulela, ne khumuliinda.

¹⁷Bakhasi ba bamenya aembi batiuukha omwana lisina bali Obedi. Baboolela buli mundu bali, “Naomi anyoolile omwichukhulu owe sisoleeli!” Obedi aaba raraawe owa Chesi, ne Chesi aaba raraawe owa Daudi.

¹⁸Nono lino nilio lisaaye lia Peresi: Peresi aaba raraawe owa Hesironi,

¹⁹Hesironi aaba raraawe owa Ramu, Ramu aaba raraawe owa Aminatabu,

²⁰Aminatabu aaba raraawe owa Nashoni, Nashoni aba raraawe owa Salimoni,

²¹Salimoni aaba raraawe owa Boasi, Boasi aaba raraawe owa Obedi

²²Obedi aaba raraawe owa Chesi, ne Chesi aaba raraawe owa Daudi.