Read lubukusu 1 Sam. 1 Bible Online

1 Sam. 1 - lubukusu bible

1 Sam. 1

¹Abao omundu mulala lisina liewe bali Elikana owamenyanga Ramataimu-sotimu mu sibala sie bikulu sia Efuraimu. Elikana aba okhwa Yeroamu. Yeroamu aba okhwa Eliiu. Eliiu aba okhwa Tohu ne Tohu aba okhwa Sufu.

²Elikana aba ne bakhasi babili. Mulala aba bali Hana ne okundi bali Penina. Penina aba ne babaana ne kakhali Hana se aba ne babaana tawe.

³Nono buli mwiiko Elikana aniinanga khukhwama mu lukoba lwewe khucha khusaaya Wele, ne khuaana biianwa khu Mwami Wele Omunyali Owa Bioosi Wele owe Banamae e Shilo. Ebweeneyo niio ba okhwa Eli babili Hofini ne Fineasi baba basaayi ba Wele Omunyali Owa Bioosi.

⁴Buli siise nga Elikana aananga biianwa, aelesianga Penina bitonyi bie nyama ne buli mulala khu baana bewe basoleeli ne bakhaana.

⁵Ne akhaba ne asiima Hana amuelesianga busa sitonyi silala, sikila[1] yaba Wele Omunyali Owa Bioosi ekala enda yewe.

⁶Penina abelesianga wangoye Hana lukali mala ne amurangana, sikila yaba Wele Omunyali Owa Bioosi ekala Hana enda.

⁷Lino liachiililila lirio buli mwiiko. Buli lwosi nga Hana achichanga munju eya Wele Omunyali Owa Bioosi, Penina arangananga Hana. Nono Hana alilanga mala se anyala khulia tawe.

⁸Nio omuseecha wewe Elikana aamureeba ali, “Hana siina sikila ne olila? Siina sikila ne okhalia tawe? Siina sikila kumwoyo kwowo ne kubeleele lukali? Ese se ndi ne bukhala khwiwe khukhila babaana ekhumi tawe ku?”

⁹Enyuma we khulia ne khunywa e Shilo, Hana enyokha. Nono Eli Omusaayi aba ekhaale khu ndebe siimbi ne kumuliango kwe enju eya Wele Omunyali Owa Bioosi.

¹⁰Hana aba ne bubeeleli bukali mala asaaya Wele Omunyali Owa Bioosi, ne alila burafu.

¹¹ Hana echuba ne aloma ali, “Wele Omunyali Owa Bioosi Wele owe Banamae, ng'ali bona kumunaanio kwo mukholi wowo. Mala ukhebulile, okheebilila omukholi wowo tawe. Ne kakhali elesia omukholi wowo omwana omusoleeli. Waaba ne umba omwana yuno, khamuaane khu Wele Omunyali Owa Bioosi chindaalo che limenya liewe choosi. Ne lubeko[2] se lulitiila khu murwe kwewe tawe.”

¹²Nga Hana ne achiililila khusaba ebweeni wa Wele Omunyali Owa Bioosi, Eli aloleelelanga kumunwa kwewe.

¹³Hana asabilanga mu mwoyo kwewe. Kiminwa kiewe kiong'ene kikiapakilisianga ne kumumilo kwewe se kwauliilikhanangakho tawe. Nio Eli ebaasia ali Hana ameelile.

¹⁴Ne amureeba ali, “Olachiililila ne bumeesi khukhwola aasi? Meelulukha!”

¹⁵Ne kakhali Hana aamukobosia ali, “Tawe, mwami wase. Ese ndi omukhasi owe butinyu bukali. Ese se nanyweelekho endali namwe sisiindu sie limela siosi siosi tawe. Ne kakhali naama khuboolelanga Wele Omunyali Owa Bioosi butinyu bwase bwoosi.

¹⁶Okhebaasia oli ese ndi omukhasi owe sipoli tawe. Biise bino bioosi nama khusaayanga mu bubeeleli bwase bukali ne butinyu.”

¹⁷Nio Eli amukobosia ali, “Cha mu muleembe mala Wele owa Isiraeli akobosie lisaba liowo nilio omusabile luno.”

¹⁸Mala Hana aaloma ali, “Lekha omukholi wowo anyoole siisa ebweeni wowo.” Nio omukhasi oyo aacha, aalia siakhulia ne se abaakho ne bubeeleli lundi tawe.

¹⁹Elikana nende be enju yewe benyokha makhelebeende endaalo eyaloondakho, mala basaaya Wele Omunyali Owa Bioosi. Nio bakobola mungo mwabwe e Rama. Elikana aaba ne omukhasi wewe Hana, mala Wele Omunyali Owa Bioosi akhebulila Hana.

²⁰Enyuma we siise Hana aaesia mala asaala omwana omusoleeli. Aamutiuukha lisina ali Samweli[3] sikila aloma ali, “Nareeba Wele Omunyali Owa Bioosi ambe omwana.”

²¹Elikana nende be nju yewe boosi baniinanga ne bacha e Shilo buli mwiiko khuaana khu Wele Omunyali Owa Bioosi embosio ne khukhola niko Elikana echubila Wele Omunyali Owa Bioosi.

²²Ne Hana se aniinanga ne achayo tawe. Aaboolela omuseecha wewe ali, “Nga omwana ne alata, khamureere ebweeni wa Wele Omunyali Owa Bioosi mala amenyeyo mu bulamu bwewe bwoosi.”

²³Omuseecha wewe Elikana aamukobosia ali, “Khola likhusiimisia ewe. Liinda khukhwola nga ne omulatia. Ne Wele Omunyali Owa Bioosi akhoya aakhola nga likhuwa liewe[4] ne liaboola.” Nio Hana asikala engo mala anuunia omwana wewe khukhwola nga ne amulatia.

²⁴Enyuma we khumulatia amubukula amuyila e Shilo. Aabukula ne euunwa[5] eye kimiiko kitaru, endubi ndala eye bufu, ne eoochwa eye endali. Mala ayila Samweli ne asili omutiiti munju eya Wele Omunyali Owa Bioosi e Shilo.

²⁵Nio beera euunwa, mala bayila omwana khu Eli.

²⁶Ne Hana aloma ali, “Ee omwami wase! Nga ne omenya, Ese niye omukhasi owaba ne emile ano ebweeni wowo ne saba Wele Omunyali Owa Bioosi.

²⁷Omwana yuno niye nasaba. Wele Omunyali Owa Bioosi aakobosie lisaba nilio namusaba niye.

²⁸Nono, namureerire khu Wele Omunyali Owa Bioosi. Mu bulamu bwewe bwoosi, aelesibwe Wele Omunyali Owa Bioosi.” Nio basaaya[6] Wele Omunyali Owa Bioosi ebweeneyo.