Read lubukusu 1 Sam. 10 Bible Online

1 Sam. 10 - lubukusu bible

1 Sam. 10

¹Nio Samweli aabukula kumwendo kwe kamafura mala akachukha khu murwe kwa Saulo. Amwikwayila ne aloma ali, “Wele Omunyali Owa Bioosi aakhuchukhilekho kamafura obe omwami owe babaandu bewe Isiraeli. Olamiia babaandu ba Wele Omunyali Owa Bioosi mala obasikule khukhwama khu basiku ba bababotookhelela. Ne sino silaba simanyisio khwiwe sili Wele Omunyali Owa Bioosi akhurobore ewe obe omwami owe kumukabwa kwewe.

²Nga ne khulalekhana ne nase, endaalo yino olakaanana ne babaandu babili siimbi a siliindwa sia Raeli e Selisa mu maloba ka Benjamini. Ne balakhuboolela bali, ‘Chipunda nicho wachiile khuyiima chanyoolekhe. Ne luno liliembeelela lia raraao liarurire khu punda liakoboole khwiwe. Alareebanga ali, “Omwana wase, ekhola ndiena?’

³Nio olachiililila khukhwama abwenao nabwila wola khu murumba kwe Tabori. Ebweeneyo olakaanana babaandu bataru balikho bacha khu Wele e Beteli. Mulala alaba aasutile chimeeme chitaru, ne okundi alaba asutile kimikaati kitaru, ne owe khataru alaba asutile eoochwa eye endali.

⁴Ne balakhukheesia mala bakhuelesie kimikaati kibili nikio olafukiilila.

⁵Enyuma wako olacha Kibeati-eloimu niio ekambi eye banamae be Bafilisiti eli. Ebweeneyo nga ne wingila mu lukoba olakaanana ne sipupu sie bang'oosi silikho siikha khukhwama abuundu aesuta ne baapa kamatuungu, etamburini, kimilele ne siilili. Balaba balikho bakhola bung'oosi.

⁶Nio Roho owa Wele Omunyali Owa Bioosi alakhwichakho ne kamaani mala olakhola bung'oosi nabo mala okaluukhane obe busa omundu okundi.

⁷Nono bimanyisio bino ne bikhwichakho, khola nisio onyala wakhola sikila Wele ali ne nawe.

⁸Ne okharangire ebweeni wase oche e Kilikali. Ndikho nicha khwiwe khuaana biianwa bie khukhwosia ne khuaana biianwa bie kumuleembe. Okhaliinde chindaalo saba nabwila nicha khwiwe mala khwekesie nisio okhola.”

⁹Nga Saulo ne ayuukha alekha Samweli, Wele aakaluukhasia kumwoyo kwa Saulo. Ne bimanyisio ebio bioosi biakholekha endaalo eyo.

¹⁰Nga Saulo ne omukholi wewe baba Kibea, sipupu sie bang'oosi siamwakaanana. Ne Roho owa Wele eecha khu Saulo ne kamaani mala Saulo akhola bung'oosi nabo.

¹¹Ne nga babaandu ba baaba ne bamumanya khale bamubona nga ne arusianga bung'oosi ne bang'oosi bareebana bali, “Siina sisiikholeekhe khu okhwa Kishi? Saulo yesi ali mulala khu bang'oosi?”

¹² Ne Omundu mulala owamenya abwenao areeba ali, “Ne Paapa owe bang'oosi bano niye naanu?” Lireeba bali, “Saulo yesi ali mulala khu bang'oosi?” Liekhola lusimo.

¹³Nga Saulo ne amala khukhola bung'oosi, aniina abuundu aesuta.

¹⁴Paapa owa Saulo okundi areeba Saulo ne omukholi wewe ali, “Mwachilenge waena?” Saulo aakobosia ali, “Khuyiima chipunda. Nga ne khwaboone khuli se chinyala chanyoolekhwa tawe, khwacha khu Samweli.”

¹⁵Ne Paapa owa Saulo okundi chana areeba ali, “Nosiima mboolele niko Samweli akhubooleele.”

¹⁶Ne Saulo akobosia raraawe oyo ali, “Akhuboolele buwaanga ali chipunda chanyoolekhe.” Ne kakhali kamakhuwa ke bubwami, niko Samweli aalomaloma, Saulo se aboolelakho raraawe okundi oyo sisiindu siosi siosi tawe.

¹⁷Nono Samweli alanga babaandu alala khu Wele Omunyali Owa Bioosi e Misipa.

¹⁸Mala ababoolela ali, “Wele Omunyali Owa Bioosi, Wele owa Isiraeli aloma ali, ‘Narusia Isiraeli khukhwama e Misiri mala namusikula enywe khukhwama khu Bamisiri ne khu bwami bwoosi bubwaba ne bwamumiina enywe.’

¹⁹Ne kakhali luno mwalekhile Wele wenywe, omusikulanga khukhwama mu minaanio kienywe kioosi ne mu butinyu. Lundi mwalomile muli, ‘Tawe! Ne kakhali khwamiisilie omwami.’ Nono, yiicha ebweeni wa Wele Omunyali Owa Bioosi khuloondekhana ne chikholo chenywe.”

²⁰Nio Samweli akhola chikholo choosi checha ebweeni wa Wele Omunyali Owa Bioosi, mala ekholo eya Benjamini yabukulwa khubirira mu kura.

²¹Samweli aareera ekholo eya Benjamini khuloondekhana nende buli luya lwabwe. Ne luuya lwa maturi lwabukulwa khubirira mu kura. Ekhumaliilikha aareera ebweeni luuya lwa Maturi omundu sia mulala mala Saulo okhwa Kishi aaroborwa. Ne kakhali nga ne bamuenja, se anyoolekhana tawe.

²²Bareeba lundi Wele Omunyali Owa Bioosi bali, “Omundu oyo echile ano?” Wele Omunyali Owa Bioosi aakobosia ali, “Aliio ekisile mu bikuku.”

²³Nio batimaka bacha bareera Saulo khukhwama ebweeneyo. Ne nga eema ebweeni we babaandu, aba omuleeyi khukhila babaandu boosi, khukhwama mu mabeka khuniina.

²⁴Ne Samweli areeba babaandu boosi ali, “Mwaboone omundu niye Wele Omunyali Owa Bioosi aroboore? Se aliio omundu nga niye mu baandu boosi tawe.” Ne babaandu boosi bayokela bali, “Omwami akhoya ayindila!”

²⁵Nio Samweli aaboolela babaandu bunyali ne kimilimo kie bubwami. Ne abiaandika mu sitabu mala ara sitabu esio ebweeni wa Wele Omunyali Owa Bioosi. Nio Samweli aboolela babaandu bacha buli mundu engo wewe.

²⁶Saulo yesi akobola engo wewe e Kibea. Acha ne babaandu be kamaani nibo Wele atiila kimiooyo.

²⁷Ne kakhali babaandu balala be sipoli baloma bali, “Omundu yuno anyala akhusikula efwe ariena?” Mala balekelesia Saulo ne se bamureererakho biianwa tawe. Ne kakhali Saulo asila busa.