Read lubukusu 1 Sam. 12 Bible Online

1 Sam. 12 - lubukusu bible

1 Sam. 12

¹Nio Samweli aboolela Isiraeli yoosi ali, “Ese nauliile koosi niko mwalomile mala namueleesie enywe omwami.

²Nono luno muli no mwami nga omwimeelesi wenywe. Ne ese ndi omusaakhulu, ne chimbuchi, ne basoleeli base bali ne nanywe. Ese nabeele omwimeelesi wenywe khukhwama mu buele bwase khukhwola luno.

³Ese niye oyu. Lomaloma bubi bwase ebweeni wa Wele Omunyali Owa Bioosi ne ebweeni wo omuchukhekho kamafura wewe. Eeyi eya naanu niyo nabukula? Epunda eya naanu niyo nabukula? Namwe naanu niye nabukula bibiewe khulwe khurumikhira bubeeyi? Naanu niye naumisia? Namwe naanu owambongelakho khubofusia chimoni chase? Rusia buloli bwe bubi bwase mala endaruunga.”

⁴Babaandu bakobosia bali, “Tawe ewe se wakhubukulakho sisiindu siosi siosi khulwe khurumikhira bubeeyi, namwe se wakhuumisiakho efwe tawe. Ne ewe se wabukulakho sisiindu siosi siosi khukhwama khu mundu tawe.”

⁵Nio Samweli ababoolela ali, Wele Omunyali Owa Bioosi niye buloli khwinywe, ne oyo ooli omurobore niye omuloli endaalo yino khukhwekesia bali se mwanyoolilekho ne kamabi tawe. Bakobosia bali, “Yee Wele Omunyali Owa Bioosi niye omuloli wefwe.”

⁶ Ne Samweli aboolela babaandu ali, “Wele Omunyali Owa Bioosi niye omuloli, owarobora Musa ne Aruni mala arusia bakukawenywe khukhwama mu sibala sie e Misiri.

⁷Nono, yiima niio muli ao. Ne ese ndamulilila enywe ebweeni wa Wele Omunyali Owa Bioosi khuloondekhana ne bikholwa bioosi bie buonia bia Wele Omunyali Owa Bioosi, nibio aamukholela enywe ne bapaapa benywe.

⁸ Nga Yakobo ne acha Misiri, Bamisiri baapia siibi lisaaye liewe. Nio lisaaye liewe lialilila Wele Omunyali Owa Bioosi. Wele Omunyali Owa Bioosi aruma Musa ne Aruni, ba baabarusia nibo khukhwama mu Misiri mala baabakhola baamenya abuundu ano.

⁹ Ne kakhali bebilila Wele Omunyali Owa Bioosi, Wele wabwe. Nio Wele Omunyali Owa Bioosi abara mu bunyali bwa Sisera komanda owe banamae bo mwami Yabini, omwami owa Hasori. Lundi aabalekhuulila Bafilisiti ne Bamoabu ba bapana ne nabo.

¹⁰ Ne balilila Wele Omunyali Owa Bioosi ne baloma bali, ‘Khwakholile bubwoni sikila khwalekhile Wele Omunyali Owa Bioosi, mala khwakholeele Baali ne Asitaroti. Ne kakhali luno khusikule khukhwama khu Basiku befwe, ne khulakhukholela ewe.’

¹¹ Wele Omunyali Owa Bioosi aruma Yerubaali, ne Baraka ne Yefuta ne Samweli. Mala amusikula enywe khukhwama khu basiku benywe chimbeka choosi mala mwamenya mu muleembe.

¹² Ne nga mwabona Nahasi omwami owa Amoni echa khumwibwaakala, mwamboolela muli ‘Tawe, ne kakhali omwami alakhwamiia efwe’, akhaba ne mwamanya muli Wele Omunyali Owa Bioosi, Wele wenywe aba omwami wenywe.

¹³“Nono luno Omwami niye mwaroboore niye oyu, omwami niye mwareebire niye oyu. Wele Omunyali Owa Bioosi amwamiisilie omwami.

¹⁴Murie omwami mala mumukholele. Muulile ka Wele Omunyali Owa Bioosi ne mukhaukhakho khukhwama khu malaka kewe tawe. Mwakhola murio mala enywe ne omwami wenywe mwaloonda Wele Omunyali Owa Bioosi, Wele wenywe, mukhabe bulayi.

¹⁵Ne mwaloba khuulila ka Wele Omunyali Owa Bioosi, mala mwarura khu malaka kewe, akhamubiile enywe ne omwami wenywe.

¹⁶Nono yiima mala mubone sisiindu siboofu sino nisio Wele Omunyali Owa Bioosi akhakhole mu moni chenywe.

¹⁷Sino se sili siise sie khukesa engaanu? Ndasaba Wele Omunyali Owa Bioosi areere likukuma lie likulu ne efula. Ne mukhamanye ne khubona muli bubwoni bwenywe buli bukali, niko mwakholeele Wele Omunyali Owa Bioosi khulwe khukhwiyenyela omwami.”

¹⁸Khwako Samweli asaba Wele Omunyali Owa Bioosi, mala Wele Omunyali Owa Bioosi aruma likukuma lie likulu ne efula endaalo eyo. Babaandu boosi baria Wele Omunyali Owa Bioosi ne Samweli lukali.

¹⁹Ne babaandu boosi baboolela Samweli bali, “Sabila bakholi bowo khu Wele Omunyali Owa Bioosi, Wele wowo, nio khukhafwa tawe. Sikila khwatasile khu bwoni bwefwe bwoosi bumayaanu buno, khukhwiyenyela omwami.”

²⁰Samweli akobosia babaandu ali, “Mukharia tawe. Mwakholile bumayaanu buno, ne kakhali mukhaukhakho mwalekha khuloonda Wele Omunyali Owa Bioosi tawe, ne kakhali, mukholele ne kumwoyo kwenywe kwoosi.

²¹Mukhaukhakho mwaloonda bawele bakhali ne bukhala tawe. Sikila se bakhamuyeete namwe bamuonie tawe sikila se bali ne bukhala tawe.

²²Wele Omunyali Owa Bioosi se akhamwaate babaandu bewe tawe khulwe lisina liewe liili liboofu. Ne lundi asiimisibwa khumukhola enywe mube babaandu bewe.

²³Lundi bubwoni bwe khukhwakama khumusabila enywe khu Wele Omunyali Owa Bioosi bukhoya bwaba aleeyi ne nase. Ne ndamwekesia enywe kaali kamalayi lundi ka ng'ali.

²⁴Khukhila koosi, ria Wele Omunyali Owa Bioosi mala mumukholele mu bweikinwa ne kumwoyo kwenywe kwoosi. Khebulila bibiindu biboofu nibio amukholeele enywe.

²⁵Mwaba ne muchiililila khukhola bumayaanu, enywe ne omwami wenywe mukhabunisibwe.”