Read lubukusu 1 Sam. 13 Bible Online

1 Sam. 13 - lubukusu bible

1 Sam. 13

¹Saulo aba ne bukhulu bwe kimiiko. . . [13] ne arakikha khuruka, aaba omuruki khulwe kimiiko . . . [14] na kibili mu Isiraeli.

²Saulo arobora babaandu chielefu chitaru ba Isiraeli. Ne babaandu chielefu chibili baba ne Saulo e Mikimashi ne mu sibala sie chingulu sia Beteli. Ne babaandu eelefu ndala nabo baba ne Yonasani e Kibea mu Benjamini. Ne babaandu babasikala boosi Saulo ababoolela bakobole engo buli mundu mu liiema liewe.

³Yonasani aula banamae be Bafilisiti mu Keba mala Bafilisiti bakaulila. Nio Saulo apa ekhoombi mu sibala sioosi ne aloma ali, “Lekha Baeburania baulile.”

⁴Baisiraeli boosi baulila bali Saulo erire banamae be Bafilisiti mala ako kakilile Bafilisiti babiile Baisiraeli. Nio babaandu balaangwa khuambaana ne Saulo e Kilikali.

⁵Ne Bafilisiti bebuusia alala khu khuupana ne Baisiraeli. Bafilisiti baba ne kamakaari ke liie chielefu kamakhumi kataru ne babaandu batimia chifarasi che mwiie chielefu sita, ne banamae bakali nga kumuyekhe kwe mu nyanja ne bali alala. Bacha mala baapa ekambi e Mikimashi, ebukwe owa Beta-beni.

⁶Babaandu ba Isiraeli nga babona bali mu butinyu sikila babaandu baba baminikhwa, bekisa mu mabina ne mumaloo ne mu mabaale nende niio biliindwa biaba ne kamaloo kakayabwa ke kameechi.

⁷Babaandu bambukha luluuchi lwa Yoritani bacha mu sibala sia Kati ne Kileati. Saulo aba asili e Kilikali. Ne babaandu boosi bamuloondakho ne bareenga.

⁸ Saulo alindiilila Samweli khulwe chindaalo saba, siise nisio Samweli arobora. Ne Samweli se echa e Kilikali tawe. Ne Babaandu baba balikho basalaanila khukhwama khu Saulo.

⁹Nio Saulo aloma ali, “Ndereere ano siianwa sie khukhwosia ne biianwa bie kumuleembe.” Mala aana biianwa bie khukhwosia.

¹⁰Nga ne amala busa ari khuaana biianwa bie khukhwosia, Samweli echa. Saulo arura khucha khumwakaanana ne khumukheesia.

¹¹Mala Samweli amureeba ali, “Siina nisio okholile sino?” Ne Saulo amukobosia ali, “Mboone babaandu balikho basalaanila khukhwama khwise mala ewe se wechile mu ndaalo chichenyekhana tawe. Lundi abeele Bafilisiti bebuusiisie e Mikimashi.

¹²Nio nebaasia ndi, ‘Bafilisiti balikho becha khu khunjibwaakalila e Kilikali, mala se nareebire kumwalaalo kwa Wele Omunyali Owa Bioosi tawe.’ Nio niyingiliile, mala naana siianwa sie khukhwosia.”

¹³Samweli akobosia Saulo ali, “Okholile ke busilu. Ewe se wariire lilaka lia Wele Omunyali Owa Bioosi, Wele wowo nilio akhulaka tawe. Nono luno Wele Omunyali Owa Bioosi akhakholile bubwami bwowo bwachiililila mu Isiraeli mindali na mindali.

¹⁴ Ne kakhali luno bubwami bwowo se bulachiililila tawe. Wele Omunyali Owa Bioosi ayiimile omundu osiimisia kumwoyo kwewe. Ne Wele Omunyali Owa Bioosi amurobore niye khuba omwami owe babaandu bewe. Sikila ewe se wariire niko Wele Omunyali Owa Bioosi akhulaka tawe.”

¹⁵Samweli enyokha mala acha khukhwama e Kilikali khukhwola e Kibea eya Benjamini. Saulo abala babaandu nibo aba nabo. Baba babaandu chimia sita.

¹⁶Ne Saulo ne omusoleeli wewe Yonasani ne babaandu ba babao bamenya Keba mu sibala sia Benjamini. Ne Bafilisiti baapa ekambi e Mikimashi.

¹⁷Ne banuuli barura khukhwama mu kambi eye Bafilisiti mu bipupu bitaru. Sipupu silala sialola lubeka lwa Ofura, mu sibala sia Saulo.

¹⁸Sipupu sisiindi sialola sibala lubeka lwa Beti-horoni ne sipupu sie khataru sialola lubeka lwe khu lwakha lulwaloleelela litooma lia Seboimu lubeka lwe mu sichiimi.

¹⁹Nono omubasi se aabao mu sibala sia Isiraeli sioosi tawe. Sikila Bafilisiti baloma bali, “Baeburania bakhola bario babasa chimbalu ne kamafumo.”

²⁰Ne kakhali buli Muisiraeli achichanga khu Bafilisiti khuakala chisungura, chimbako, chiaywa ne chingeso.

²¹Kumuruungo kwe khuakala eaywa nende khukhwiikha kwaba esimiri ndala. Ne kumuruungo kwe khuakala esungura namwe embako kwaba chisimiri chitaru.

²²Nono khu ndaalo eye liie se abao omundu khu baandu ba baba ne Saulo ne Yonasani owaba ne embalu namwe lifumo tawe. Ne kakhali Saulo ne omwana wewe Yonasani bong'ene ba baba ne nabio.

²³Ne banamae be Bafilisiti bacha a sibanga sie khukhwingila e Mikimashi.